Sawhkhawk (June 10, 2018)

Sawhkhawk of the Day
Governor leh Kristianna chungchang rawn ziaktu kha a rawn ziak tha ka ti. Ni e, Mizo Kristiante hian hlauh hi kan ngah lutuk a, kan insawithaih peih bawk si a, thil hre vak lote thleng hian kan tihlauthawng mai mai thin ni hian kei chuan ka hria. Kristiante chu min dinpuitu leh kan lama tang hi a pui em mai, chuti maiin min hlamchhiah dawn lo. Chuvangin, eng pawh lo thleng sela, Pathian kan hnaiha a lama kan tan tlat chuan engmahin min tinghing lo vang, huaisen taka lo hmachhawn tura kan inbuatsaih a ngai a ni. Nakin zelah, tun ai hian Kristiante hi chu kan la chep zel dawn bawk tih hi i hre teh ang u. – KL

Zalen-in dan leh hrai chungchang in rawn ti hi ka lawm khawp mai. A dang tam tak, chhiar manhla tak tak in paih chuang bawk si lo. Mizote hi mahni thu thua kal, engmah ziah fel leh tih thlip thlep nei lem lo hi kan tam a, tawngkaa sawi ringawt hi chu dan hmaah hian a lo tling zo leh thin lo va. Hei vang hian dan hi kan hriat a pawimawh a, chumi tura in rawngbawlna leh a ziaktu thawhrimna hi a fakawm thlawtin ka hria. – Mapuia pu

Zan khat thil thua kan rama chhiatna avanga nunna chân mi 21 zet an han awm chu a va han rapthlak em! A tuartute ka tawrhpui takzet a ni. Hetiang chhiatna a thlen hian kan ram hruaitute leh tu tute emaw lah hian, “Khuarel chhiatna hi a inven theih a awm,” an lo ti ve sek zel a. Ani mai thei a; mahse, miin chhiatna rapthlak tak an tawrh laia hetiang thu lo sawi hi a hun lo ka ti, tawrhpuina thu bak sawi chiam hi tute tan mah lo tih chi a ni rih lovin ka hria. – Sangpuii

Mizo Pastor pakhatin kan Governor thar a lo tawngtai thu kha ka lo hre ve a, a lawmawm hlein ka hria. Ni e, a thu sawi ang khan kan ram hruaitute hi ringtute hian kan tawngtaipui fo thin a, hei tak hi kan ram, zim tak leh kan hnam, tlem tak si hi Pathianin hnam dang fing leh tam zawk, thiltithei zawk lakah min la humhim niin ka hria. Tuna kan Governor thar pawh hi lo hlau chiam ringawt lovin, Pathian puihna nen lo hmachhawn ila, a rawn dahtute rilru hre chiah lo mah ila, engmah lovah a chhuak daih ngeiin kei chuan ka ring. – Mamuana

BJP hi kan ngainep deuh ngawtin ka hria a, kei chu tun inthlanah hian chhim lamah sawn bial hnih emaw tal kan lak hi a rinawm tlat ka ti. An tang nasa mai si a, an insawi ang hi a tak a nih chuan an party zawmtu hi an awm ve reng bawk si a, ngaihthah ngawt hi a harsain ka hria. PRISM tih vel ai hi chuan party dangte tan pawh hian an hlauhawm zawkin kei chuan ka ring. India ram puma an thawm na leh chet thatna hian Mizo tam tak rilru hi a hneh ve thei dawn tlatin ka hria. – Ahmaa

Tun hnaia kan rama chhiatna thleng hi a va rapthlak ngai em ve le! Eng emaw chang chuan Pathian pawh hian thil hi a rel fair tawk lo tih mai hi a awl ngawt mai. Lunglawna chhiatna thlenga pa ber chante kha a va na dawn ngai ve le! In thar, harsa taka a thawh chhuah chu a chhe vek a, lu a sun nasa bawk si. A zia ka hre lo va; mahse, amah aia hrem awm tak tak kha a hmu teuhvin ka ring; mahse, ani khan a tuar ta bik tlat mai si a. Angkhat veka kan chunga rorel thin tia kan sawi Pathian hi dem a awl ve khawpin ka ring; mahse, a hnua a sawi chanchinbu vela kan lo hmuh vete han chhiar chuan, a tawrhna hi a thlawn lo vang tih ka rinpui hle a ni. – Rampuii

Mizorama rorel lai hian kawng siam leh hmasawnna ruhrel din chungchangah hian an infak tehchawk a; mahse, a tak takah hi chuan fak hi an phu lo niin ka hria. Ni tin mamawh chi hrang hrang lama an hlawhchhamzia chu kan hria a, hei bakah hian kawngpuiah mawlh hian an hlawhchham niin ka hria. Kar hmasa Sawhkhawk ang khan, eng khaw kawng mai pawh hi a chhe em em vak mai ni hian ka hria. Thingtlang mite leh lirthei khalhtute hi an khawngaihthlak lutuk, a hahthlak piah lamah an lirthei pawh a a uiawm lutuk. Kawngah kher hi chuan infak tawh lo teh se. – Muana

Pathian lamah hian han tang tlat mai ila, Pathian hi chu kan lamah a tang mai; mahniin kan zir a ngai. – Ama

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?