Sawhkhawk (June 11, 2017)

Sawhkhawk of the Day
In Chanchinbu chhiar vetu zinga mi ka ni a, an sawisel luih luih lai cheu pawha lo tan ve tang tang thin cheu ka ni a. Kei chuan tan man hi in awm ka ti viau mai. In tihsual leh dik lovah tan in la niin ka hria a, chu chu a chhiartute hian kan hre thei khawp a nia. Pathianniah hian chanchinbu dang a chhuah loh vang nge, a ngaihnawm ve hrim hrim vang ka hre lo va; mahse, in chanchinbua in chhuah hi chu chhiar a manhlain chhiar chhuah dap a awm bik riauin ka hria. Sawiselna lai tur chu in awm lo tawp chu a ni tawh lo va; mahse, in tan phawt chuan hengte pawh hi a ziaawm chho zel ang tih ka ring tlat a, tan han lain han ngaihnawm zel teh u. – Chhantei

Zalen chhiar a manhla thin e. Hawrawp dik lo hi an sawisel thin cheu va, inziaawm chho viau a; mahse, a chhuak hnuhnung vawi hnih vel hi a awm leh ta nual mai. In fimkhur leh fimkhur loh leh in tan leh tan loh hi a hriat khawp mai. Han tangmar pat teh u. In thu chhuah erawh a chhiartu tan a manhle em em reng mai. – Asawmi

Pathian thu hi a ngial a ngana lehlin vek kher ai chuan eng nge a swi tum tih fiah taka leh a tha zawk. Sam 23-na pawh ‘Min vengtu chu Lalpa a ni a, ka tlachham lo vang,’ tih khan a fiah tawk em em a ni. ‘Ka beram vengtu a ni’ tih chuan keiin beram ka nei a, kan Lalpa Isua chu a vengtuah ka ruai lek tih a kawk! A dik thei hlawl lo. Sakawlh hlau leh hlau lo/a number pu duh leh duh lote kan inthliar mek. Mi tin amah haitu zawng chuan kouluihna ri an hria ang. Unau, koh luih i nih loh nan tun lai thil awmzia i Bible nen lo zir chiang ngam teh. Khawvel thil tha hi kan hai bik lo, kan Pathian duh loh thil a inzeh ruk avangin kan chân ngam a ni zawk. Amah ringtute hi kan Pathian hian Joba te, Stephana te, Daniela te anga kan tawrh a phal asin. – Sampuia

He Mizoram, Kristian ramah hian Zu hi a va han sual tak em! Aizawl veng hrang hranga pawl hrang hrang hruaituten an vengah zu dawr awm an phal lo vek mai chu a ni si a. Mizo Kristiante tan zu baka sual hi a awm lo a lo ni e. Zu zawrh duh lova kawng zawhten zu lei theihna card an nei a, zu zawrh duh lova tawngtai thin leh lehkha tar thinten zu lei theihna card an nei a, zu do nasa ber Excise-ho leh YMA-ho lahin an zu man sa leh an zu kawlte an inin an hralh zel bawk si. Kum 17 chhung zu khap burna rama zu tamzia kha aw… Heti mai hian maw Mizo Kristianten zu kan huat a.. Kan Bible-in eng nge sual a tih ber leh a huat ber hi hua ila, i do tlang zawk teh ang u khai, Mizo Kristiante hian… – Tea, Azl.

Kohhranin sorkar kalphunga sawi a lo neih hi a tih tur awm tak a ti a ni zawk em? Kan Bible kan en chuan zawlneite khan an ram roreltute kha an kal dik loh chuan an khak a, na tak takin an bei a, an sawisel thin a, tunah hian Kohhrante hi kan zawlnei an ni ve mai zawk lo maw? An sawisel leh kawng dik nia an hriat an sawi hi an tih loh tur an ti a ni lutuk bik lo a ni mai zawk lo maw? Kan rin Bible-a zawlneite chet thin dan nen hian a inang riau zawkin ka hria. Huai taka mahni lawina Kohhran sawisel ching phei hi chu an Kohhrana an lungawi loh chuan chhuahsan daih mai awm tia ngaihtuah chang ka nei fo mai. Mahnia ngaihdan nei theuh kan ni a, sawi chhuah fo hi tul ka ti lo.- Ropuia

hawi lam neih chu a tha a; mahse, chanchin pheka chhuah ringawt te, sawi ringawt maite hi a tawk lo. Tin, thawhlawm thawh tha tura intih te, inkhawm thahnemngai tura sawi ringawtte pawh hi a tawk lo. KTP hruaitu te, Kohhran hruaitute hi an chet chhuah a ngai a ni zawk. Chuvangin, rinna hi thiltih tel lo chuan thi a ni zawk e. Kan hawi lam tura inkhawm kan ngaih pawimawh ang chiah hian thenawm khawveng inrem lohna te, rawngbawltu leh rawngbawltu inrem lohna te, Beram leh a pu inrem lohna te, thian leh thian inkara inrem lohna zawng zawngte pawh hi kan inrem theihna tur atana kan hawi lamte pawh ni tel ve se a tha ang. Eng emaw mai maiah hi chuan i inhambuai tawh lo teh ang u. Rawngbawltute u, in khandaih kha a hmanna turah hmang tawh teh u, in Jerusalem-ah khan Setana a pawng talh a nia. – Point Out

Ei ru lo pakhat ka hriat ve chu, engineer a ni a, mi dang angin a ei ru lo khawp mai a, an fanu pakhat, tun hnaia pasal nei ta chuan, “Ka hriat theih tirh atangin in kan sa tawh a, pasal ka neih pawhin kan la sa zo chuang lo,” a ti a. A pa hian duh sela chu a ei ru thei khawp ang a; mahse, ei ru lovin an inkhawl hram hram a, an theih ang tawkin kum tam tak chhung in an sa a lo ni a. An ngaihsanawm chhungkua ngawtin ka hria. – MkSiama

Ni hnih khat ruah a sur deuh chuan kan ramah hian leimin avanga chhiatna hrang hrang a thleng nghal chum chum zel mai chu a nia, kan khawngaihthlak ngawt mai. Chhiat tawkte hi an khawngaihthlak khawp mai a, chutih rual chuan tam tak hi chu kan fimkhur loh leh kan inven lawk loh vang hi a ni thinin ka hria a. Tam tak hi chu inven theih ni hian ka lo hre ve a, sorkarin inven dan leh tuichhe paihna kaltir dan tur a sawi mai mai, ho mai mai leh kan ngaihthlak liam mai mai hi hetiang kan tawh chiah hian a lo tangkai tih a lang thin a. Mizote hian kan thatna tur hi chu zawm mai ang u, a harsa lo thin viau a nia. In kan sa huai lutukte pawh hi sim dan awm se kan chhiatna tawh hi a tlem deuh mai thei bawk e. – Mawimawia

Mizoten hnam dang zinga rawng kan bawl dan hi kan Kohhran hruaitute hian ennawn se ka duh ngawt mai. Kan hnam tih dan khera Pathian biaktir kan tum hi Pathian hnena kan hruaina kawng min daltu niin ka hria. Keini aia hnam upa fe zawk an ni a, an hnam kalphung nena inmil tura Pathian biak kan zirtira kan hrilh hian a hlawk zawk ka ring tlat. A tir atanga khuang nena kan chumchilh nghal ngawt chuan anni chuan awlsam taka pawm mai harsa an tih ka ring. Ngaihtuahna sen tharna chi tak niin ka hria. – Muana

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?