Sawhkhawk (June 3, 2018)

Sawhkhawk of the day
Kan Governor thar tur chungchangah hian thil dang daih ka lo ngaihtuah ve a. Kristiante hian hlauh hi kan ngah ta lutuk deuh em maw ni tih ka ngaihtuah a ni. rSS a ni thei a, BJP pachal pawh a ni thei a, eng mi pawh a ni thei; mahse, kan rin Pathian hian engkim a tithei a, a mite a thlahthlam ngai lo va, a tul hunah chuan a che mai zel tih hi kan sawi a, kan hria a; mahse, kan ringngam lo thin ni mai hian kei chuan ka hria a ni. tu pawh an rawn dah ang; mahse, he rama Kristiante hian kan Pathian hi ring satliah ni lo, ring takzet kan nih chuan kan chantawk tur chu a awm zel ang. a enga hma hma hian kan hlau nghal ngawt zel ni maiin ka hria, eng pawh ni se, hlau chiam lovin, inven thiam erawh kan ngai a ni mai rihin ka hria. – Mamawitea KL

Hmanni chu Ngopaah ka han kal ve a, a kawng chu a lo chhe nasa mai hi a lo ni a. Rin aiin an ngawi thei hle hian ka hria a, Champhai kawng kha a chhe em em mai a, kawlkulh atanga a peng, Ngopa panna phei chu chhe lehzual tak ni hian ka hria, a tlan pawh kan tlan rei ngat ngat khawp mai. Tun kan sorkar hrawn mek hi han infak ve viau thin mah sela, mipuiin kan mamawh, kan hman theih mai ang chi – gas, electric, kawngpui tih ang chi-ah hi chuan an tanawm loh thlawtin ka hre ve mai. hei hi keini ang mi nawlpuiin kan teh thiam dan tawk chu a ni bawk si a, thil dang thuk tak tak, a sum leh pai dinhmun that tih ang duang hi chu kan hre thiam lo. Mipuiin kan hmuh mai theih leh mamawh mai min tihawlsamsak thei sorkar neih hi a nuam ber. – Mapuia pu

Party thar, PRISM hi sorkar ta se mipui tan hi chuan an tha dawn ngawtin a langin ka hria. Parking fee an han titawp ang a, MLA leh Minister-te hamthatna dawn an titlem ang a, ei rukna chhuitu tur lokayukta an din thuai dawn bawk a, an tih vek theih chuan a tha dawn em asin! Chutih rual chuan kei chuan an sorkar hi ka ring lo tlat lawi a; tin, lo sorkar ta tehreng pawh ni se, chuti tak chuan an ropui bikin ka ring chuang lo, kan hrawn tawhte ang tho hi an ni lehin ka ring. kan rama party hi rinngam an awm meuh tawh lo niin ka hra. – Mamuana

Inthlan kan hnaih ta takzet mai a, boruak pawh a sa ta halh hlah khawp mai. Party tin lah hian an tlin hi an han inring hlawm em em hlawm bawk si a, a ngaihnawm viau mai. Chutih rual chuan engmah ni lo hi an awm teuh dawn tih chu a chiang reng mai si, ka ngaihtuah mai mai a, inthlan dawn tak takah hi chuan party lian sa bawk hi kan rilru hian a awn leh deuh tlat zel ni maiin ka hria a ni. – Sangpuii

BJP hian Kristian ram hi min run hi chu an tum tih hi a chiang khawpin ka hria. kan Governor thar chu thuhran ni sela, tunah hian kristian state-ah hian tharum hmanga che si lovin tan an la tih hi a chiang viauin ka hria. Meghalaya inthlan hma khan Shillong-a kan vai thianpa pakhat chuan Assam an lak tawh thu leh Meghalaya pawh an tum tur thu a sawi a, lak pawh an inrin thu a sawi bawk a. A sawi ang ngeiin an ti a, Mizoram pawh hi an rawn bitum leh tan tih hi a chiang tlatin ka hria. hlauh tur chu a ni mai thei a; mahse, kan tan chu a ngai khawpin ka hria. – Ahmaa

Pathianni hmasaa Rev. Chanchinmawia chungchang an rawn sawi kha kei pawh ka ngaihdan chiah. A thihna pawh a rei tawh, a dam laia pa chhuanawm leh Pathian leh ram tana thahnemngai em em a ni a, tun thlenga inpuh leh politics thila inchirhtheh mai mai nana hman hi a tul lo. hahdam takin i chawlhtir tawh teh ang u. – Rampuii

Tuirini lei chhia chungchangah hian Mizo tlawmngaihnate hi dal tawh leh tlahniam ta viau ang hian han sawi thin chu kan hnamze nghet tak, tanpui ngaia awmte tlansan duh miah lohna rilru hi a lo lang leh tho tho thin tih chiang takin a lo lang niin ka hria. YMA nge nge! – Muana

Quarry chim kha TV lama an tihchhuah kha ka lo en ve a. YMA hruaitu pakhatin phal loh leh him lo a nih avanga eng emaw changa an um haw thin a; mahse, an ei zawnna neih chhun a nih miau avangin tih tir loh theih loh a nih thu a sawi khan ka rilru a lo khawih khawp mai. Tin, naupang thi an lo awm lehzel khan rilru a khawih zual. kan ramah hian a nuamsate hi chu an nuamsa em em reng a, thenkhat tan erawh ni tin ei khawp pawh hi a harsa a ni si a, kan inkhairual lo a ni. hmanah, mi pakhatin thu a sawinaah, kawngpui chhia avanga mi pakhat chesual a hmuh thu leh a chhan ber chu sorkar nia a ngaih thu a sawi a. Tun tuma thil thlengah pawh hian, eng emaw chenah chuan kan sorkar bawk, tuna kan hrawn ni kher lo, kan ram rorelna hi ka puh tel deuh tlat mai. – Ampuia

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?