Sawhkhawk (March 10, 2019)

Sawhkhawk of the day
Chapchar Kût kan hmang zo leh ta a, kumin chu tun hnai kum eng emaw zat chhunga a hmanna hmuna intibuai an tlem ber tum a ni mai thei a, a lawmawm khawpin ka hria. Ka’n sawi duh tak zawk chu keini ang rualin a chhiara kan chhiar phak chauh, kan mitthla thiam miah lo, naupang infiamna te, khuangchai te kha mit ngeiin kan hmu ta a, kan lo chhiar thin pawh a chiang kuar mai a. Kan nau veleh chhawng, la chhiar leh zir turte tan pawh a manhla khawpin ka ring. Mizote kût ropui ber tiin kan sawi chamchi a, Nagaland sorkarin Hornbill Festival leh Manipur-in Sangai Festival an tih ang hian kan kût hi hmang thei phei ila chuan a nuam lehzualin ka ring a. Tourism lamin khualzin hip lamah tan an la reng bawk a, chawlhkar khat daih emawin, uar leh nuam tak hian duang chhuak thei ta ila, ram dang mite ngaihven leh kal châkna kût-ah a chhuah theih ka van ring em! – Mamawitea

Zalen-in hma a sawn zel tih ka lo hmu thei e. A lawmawm hle mai. Pathianni chhuaka Pu Lalthlamuana Ralte thu ziak kha ka lo chhiar a, a ngaihnawmin lung a tileng a, chutih rual chuan a tawp lama a ziah, Mizote zalenna sual leh India-in a ram chhung ngei a bomb thu a ziahte khan thin a tirim lek lek mai. Kan hriat ngai loh leh kan lo ngaihven vak lo; mahse, pawimawh tak tak si a ziak thin a, a ngaihnawm ka tiin a vengvarthlak thin e. – Sangliana
Chapchar Kût kan hmang zo leh ta a. Kan thianpa pakhat chuan hman hma lawk khan, “Kumina an hman dan tur ka hria, nakuma an hman dan tur pawh ka hria, a kum leh pawh ka hria,” a ti zuah zuah a. A sawi awmzia chu kan hman dan hi a ngai reng tih a sawina a ni a. Mi thenkhat tan chuan hmang uar kan ni thei ang a; mahse, kan hman dan hi kum 5/6 thlir kir ila, a ngai deuh reng mai. Thu sawitute thu sawi pawh hi a danglam meuh lo. Tih dan hranpa vak chu a awm lo mai thei a; mahse, ngaihtuahna seng hret ila chuan, tuna pui zawk hian a hman dan hi a awm ang. Kan thenawm state-a chawlhkar khat daih, khawvel pawhin a hriatpui an kutpui ang pawh hian a tih theih ka ring tlat. Kan uar telh telh ta sa sa, tih vak a chakawm ka ti. – Hruaitea

MNF sorkar thar chuan zu khap hi a tum hle tih a lang reng mai a, chhungkaw tam tak tan chuan a lawmawm a, Kristian ram tan phei chuan a inhmeh hliah hliah niin a lang. Chutih ruala ka rilrua lo awm chu, Mizote, a bikin thalaite, zu in thiam lo tia kan sawi thinte khan zu an inthiam ve tan dawn deuh chiah niin ka hria a, chutih laia kan khap leh chuan a ni lo zawng hian a thawk tha leh ang tih ka lo hlau mai mai. A hmaa zawrh dan kha chu a tha pawh ka ti lo, zu tha an sawi kha a ni lutuk lo bawkin ka hria a, engtin emaw, zu khap si lova khauh zawka thunun dan hi ngaihtuah chhuah chu a ngai a ni. – Zari

Chapchar Kût hi kan hlut deuh deuh va, kan lawm telh telh zel a, a lawmawm viau mai. Keini takngial pawhin kan hmuh phak tawh loh leh kan hriat thiam phak chiah lo, hman lai Mizo nun dan hrang hrang pho chhuahte khan a tiropui ka ti khawp mai. Kan chhang rual veleh chhawngte tan phei hi chuan kan pi leh pute khawsak zia kha mitthla thiam chi rual a ni tawh lo va, naupangte infiamnnate pawh hriat ngaihna a awm tawh lo. Zirlaiah chuan an zir a ni mai thei a; mahse, a taka hmuh lohva chhiar ringawt chuan a kim lo, ti kha chuan an zirlaiah pawh nasa taka a puih theih ka ring ve tlat a ni. – Ampuii

Sikul tan hma leh tlai chungchangah hian chhangchhenu hi min rawn ngat sela chuan kan chhanna tur hi chu a chiangin ka hria. Intihre deuh deuh, paho hi a tawng ring ring hi an nia, a buaithlak, chhangchhenu tan hi chuan tan hma an tih tlat hi chuan buai hi chu a na khawp mai. – Numami NU

Pu ZOramthanga kaihhruai MNF sorkar chuan an insawi ang deuhvin, thla hnih emaw lek chhungin kan nin em em mai, Assam Rifles chu an sawn chhuak dawn ta a. Anni hi a hma pawha lo sawn chhuak thei tep tawhtu kha an ni a, hetiang a nih chuan a lawmawm dawn hlein ka hria. Vawi hnih khat vel chu Kohhran hnuaia pawlin an hman turin ka dil ve tawh a, a buaithlak khawp mai. MFA lam programme ngaihchan ngai bawk, sipai thu em em bawk, MFA lam inkhelh hun leh tlai lama naupang training emaw nena insu buai lo tur hisap ngai bawk. Tawng thiam vak lo tan phei chuan rilru a hah duh hle a, tunah erawh chuan khatiang kha a awm tawh lo turah ngai ila, a thawventhlak huai dawnin ka hria. – Mamawitei

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?