Sawhkhawk (March 18, 2018)

Sawhkhawk of the week
MZP-in Kohhran hruaitute leh pawl dangte ngenna ngai pawimawha Chawlhbuk sak hnatlang an han thulh rih hi a mawi ka hle mai, tlawmna entirna anga ngai pawl an awm erawh a pawi. A tul huna hnungtawlh ngam hi tlawmna a ni lo, huaisenna chi khat a ni zawk. Khawvela mi ropui leh hnam ropui tak takte pawh hi a tul dawih aw chhuak ngam an ni fo va, mawl taka bawh pup pup hi hlawhtlinna a ni vek kher lo va, a tul a nih chuan tanhmun siam rem tura hnungtawlh ve fo hi a ngai thin. Chawngbawla pawh kha a tul hunah chuan a tlanchhe ve duai duai tho va, a chanchin kan sawinaah mi dawihzep angin tumah kan chhuak ngai chuang lo. Chuvangin, MZP-te pawhin huaisen taka hnam hnatlang an koh tawh an thulh leh kha a tha zawkin ka ring a, pawl dangin an ngenna an ngai pawimawha an zah khan pawl puitling tak an nihzia a tilang bawkin ka hria a. A tul a nih chuan kha aia naa kal tur pawh khan an thei em em tih ka ring tlat a ni. – Mamawitea

Kan ramin buaina a’n tawk a, hetih mek laia insawiselna ang deuh thu a ri leh thin hi a ninawm. Ram leh hnam taka tanrual hun a nih laia party inchirhtheh nana kan hmang hi a khamawm. Tu party pawh hi an sorkar loh lai hian an tha ber zel mai ni hian ka hria, an han sorkar ve tak tak hi chuan eng an ni tak tak ngai lo. Tuna ramri chungchanga huai tak taka sawite pawh hi hmana chingfel thei lo, sorkar pawh ni se chingfel leh thei chuang lo tho an nih a nia ka rin ni. – Sylvia

Kan ram ngei chu hnam dang min chuhpuh a, chhan kan tumna lamah kut min la thlak zui a. Kut thlak satliah pawh ni lo, silai hialin min kap a, Mizopa rilru atang chuan a na a ni. Chutih laia sorkar a ngawi tlat reng kha a mak a, kan chanchinbu mite hial kut an thlak lai pawha engmah an ti tak tak ngam lo hi chu ram hmangaihah inchhal ve tawh lo teh se. Kan awih tawh chuang lo vang. – Mazuali, TKK

In TV programme tar lan hi a dik lo zeuh zeuh em? Nge, ka lo chik tawk loh vang zawk. Inmil lo zeuh zeuh hi chu a awmin ka hria. Update loh a ni mai thei. – Amatea

Pathianin ram min pe a, chumin hum tuma che chhuak kan thalaite hi an va huaisen em! Ram leh hnam tana nun pe ngam hi kan lo va la ngam em! An chet dan ka hmuh khan kei chu ka thla a muang huai huai mai, an tawrhna erawh na ka tihpui em em a ni. – 9436360899

Congress Legislature Party-in Zophaia Chawlhbuk sak tur a tih hi a kal a kal ang a, a zuzi leh mai ang tih ka hlau hle mai. Inthlan a hnai tawh si a, inbiakna neih tur anga an ruahman ang hian an inbia ang a, thiam taka kalpuiin sak loh hian a awm leh reng ang tih hi a hlauhawmin kei chuan ka hria. Tuna an nawr ang reng hian MZP hian nawr reng teh se. – MZP val

Chanchinbu mite meuh kut an han thlak duh kha chu rapthlak ka lo ti ve khawp mai. Indona hmunah pawh vanduai vang tih lovah chuan heng mite hi tumahin kut an thlak ngam lo a ni ngai a nia, tunah erawh anmahni an insawi mawlh mawlh chung pawhin an khawih duh a nia, hmeichhia lehnghal an khawih a ni a, a khawihtute kha chhui chhuaha ban vek tlak an ni. An ban hmain chawhma vuak ve tlak an ni bawk. Khatiang mihring kha chu in chhungah pawh nupuite kutthlak duh ut ut chi an ni ngeiin kei chuan ka ring. – Mama

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?