Sawhkhawk (March 19, 2017)

SAWHKHAWK of the week
Pathian zarah kan dam ang a, kum pawh a liam veleh mai ang. Pathian hian hunbi hi a ruat zel a, nakin lawkah ni a pui ang a, fur leh thlasik pawh kan thleng leh ang. Fur kan lo thlen hun atan tun atang hian inbuatsaih tha ang u aw. Fur laia kan ramin chhiatna a tawh hrang hrang hi keimahni siam tam tak a awm niin ka hria; chuvangin, kan tui chhe paih leh thli kan luantir dawnah hian kan fimkhur chuan leimin leh chhiatna tam tak hi kan pumpelh theiin ka ring tlat a ni. Fimkhur teh ang u. – Puipuia

Tunlai chu Pu Chhuanliana a awm ngai lo va, a ngaihawm angreng hle mai. Mahse, a thu ziaka a insawi angin a kum hi a tam ve tawh em a, kar tin a ziak thei ta lo a nih pawhin a awm lohna ka hre lem lo. Chutih rualin rawn ziak zel thei sela chu ka ti khawp mai. In article chhuah dangte pawh hi a tha viau zel mai, ka bengtivartute in ni takzet a ni. – Mapuii

In chanchinbu hi an sawisel thin cheu va, tunah chuan chhut sual pawh a tlem ta khawpin ka hria a. Tan in lak leh lak loh hi chhiartute tan hian a hriat khawpin ka hria a; chuvangin, tan han la zel ula, in tidik deuh deuhvin ka ring a ni. In chanchinbua thu in chhuah hrim hrim erawh a ngaihnawmin beng a tivar viau zel a ni. – Mapuia

Zalen chanchinbu hi ka chhiar tanna a rei ve ta khawp mai a, tluang takin in kal zel a, min tibengvartu tha tak in ni a. A phek in pun chinah phei hi chuan chhiar hi a manhla lehzual hlein ka hria a, tan han la sauh sauh teh u. – Mka pu

Zalen Chanchinbu duh em emtu zingah hian ka tel ve phakin ka inhria a, in chanchinbu phek tin mai hi ka chhiar hmai ngai mang lo. Tihsual zeuh zeuh hi chu in nei tih pawh ka pha lo va, a bikin TV programme vel hi dik lo palh zauh a awm thin a, a tam chuang lo. Tan in lang chuan hei aia dik hian in chhuah thei ang tih pawh ka ring a ni. A ngaihnawm a, chhiar tur a tam thin khawp mai. Hmasawn tur theuh kan ni a, a changa eng emaw tihsual chiang lutuk ang chi hi chu fimkhur loh vang a ni a, tan han la sauh sauh teh u. Miin an sawisel nasat em em thin che u, chhut sual pawh a tlem tawh khawpin ka hria. – Mamawitea

Mi pawi ka sawi em lo turah ka inngai a, tun lai kan Chapchar Kuta Miss kan thlang ve sek hi eng nge maw a tulna le aw….? Mi pangngai ni ve mai mai thin kha mi hriat hlawhah kan siam a, a tha a, kut denchhena eng emaw thil dang lo tih vena remchang a ni a, a tha viau mai thei bawk. Chutih rual chuan mi tam tak nun tihchhiatna a ni thei em? Mi hriat an hlawh tawh chuan tu pawh ni se, a hmaa mi anga an nun kha a remchang tawh lo thei a, hei hian an nun kawngah danglamna thlenin thil a tisukuk thei ang em? Miss an thlan chhuah tawhte hi an nun a sukuk phah tih phei chu tu sawi mah ka la hre lo va; mahse, nakin zelah mi tu emaw chuan a nun a hloh phah thei ang em tih ka lo hlauhthawnpui ve deuh a ni, ngaihdan dik lo chu a ni mai thei bawk a. – 9436360899

Hmeichhia chuan thu awih tlatin ngawi rengin zir rawh se. Amaherawhchu, hmeichhiain zirtir zawng ka phal lo, mipa chunga thuneih ka phal hek lo, nawi rengin awm zawk rawh se. Bible, Pathian thu a ni. Hriatna tura beng nei chuan hre rawh se, mihring thu a ni lo tih hi. Eng mi pawh nise mipate zah thiam nih hi ringtute awm dan tur dik tak chu a ni. Tlawma lak chi a ni lo, mipa kan nih avanga a nawm a maka hmeichhiate chunga inlulin erawh kan tih loh tawp tur a ni, hmangaiha lungruala cheng za tur kan ni zawk e. – Hruaitea

Kan sorkar zet chu mi rethei a va rawk nasa ve aw, tax a sang em em a, bill lah a sang uchuak em em a, ram hmangaihtute hian mi harsa zawk min lo rawk reng alawm mawle! Kan sorkar hotute hian hria se ka duh chu anmahni anga sum leh pai awlsam taka lak luhna nei kan ni lo e. – 8014357478

Pathian hian kei chauh min hmangaih lo va, amah ringa inkhawma Bible chhiar thin chauh pawh a hmangaih lo va, mi zawng zawng min hmangaih a, a lam i hawi phawt chuan i lam a lo hawi em em ang. Unau duh tak, Pathian hi bel tlat phawt mai teh, i tisual lo vang. – Mami Vuite

Tunlai hian Mizoram chhunga Basketball inelna sang, Mizoram Super League (MSL) an tih chu an khel leh dawn hnai a, entu pawh an tam leh viauin a rinawm. Nikum lama a khel ve venga mi pakhatin min hrilh ka hriat reng chu ‘Veng tan’ tiin an feh chhuak a; mahse, football leh infiamna dangah chuan ‘Veng tan’ tiin en turin an feh chhuak leh peih lo niin a sawi a. Ka rilrua lo awm ta chu basketball Mizote rilruah hian infiamna changkang niin kan hria a, a entu pawhin chu chu an ngaihsan phah mai mai niin ka lo ngai deuh va. MSL buatsaih te, inkhel ente hi ka sawisel lo va, a tha vek. A entute rilru lam hian changkang nih hi kan lo châk mai mai em ni tih ka rilruah a lo lang deuh va, ka lo sawi chhuak ve hrim hrim. Tu pawi mah sawi ka tum lo a nia, ka ngaihdan hi a dik vek khar lo mai thei bawk. – Amatea

Assembly Session-ah Budget phara sawiho a ni a, kan ram tana tha ber tur angin sorkar lam chuan an chhuah a, a dik leh dik loh chu kan la hre chhawm zel ang chu. Kan sorkar hi a chhia tia sawi chiam chu ka tum lo va; mahse, MNF sorkar lai ai kha chuan kan sorkar hrawn mekah hian pawisa lengvak hi chu a tlem chiang ni chuan ka lo hre ve ringawt mai a ni. Sum leh pai lamah thiamna ka nei tam lo va; mahse, pawisa a van hi chuan inhlawhfa leh taxi pute chenin sum thawh chhuah a tam thei lo va, dawrkai an inhralh thei lo bawk a, chu bak baka a lang apauva mipui mimirin kan tawrhna a awm chuang dawn em ni ka ti ve deuh a ni. – 8794686442

Khawi hmunah pawh Pathian hi i hre reng ang u. Ani tel lo hian tumah kan che, kan awm thei si lo va. Thei ve emaw kan intih viau pawh hian min neitu, Pathian a chet meuh hi chuan engmah lo mai hi kan lo ni leh tlat thin a nia. – 9436360899

Engatinge maw ni kan ram, a bikin kan khawpuiah hian electric current hi a khât tawka nileng leng maia awm loh hi kan la neih fo mai ni. A bikin chawlhah lah hian an ti thei khawp mai a, tunlaiah chuan thing mistiri chu sawi loh, cement mistiri thleng pawhin electric hmang lo chuan hna kan thawk thei tawh lo hi a ni tawh a, chawlh ni hi a awm tak tak tawh mang lo. Hei aia regular deuhva tih theih hun hi a nghahhlelhawm khawp hian ka hria. – Mistiri lungmawl

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?