Sawhkhawk (March 26, 2017)

SAWHKHAWK of the day
Kan rama kawng pawimawh tak mai nia ka lo hriat ve, Aizawl – Lunglei road, Tuirial kawng hi a chhe em em reng mai eng nge maw a chhan ni ang le? He kawng hi chhim lam khua eng emaw zat kalpawhna, khawchhak lam phei chuan an hman rim em em mai a ni si a, siam that dan hi a awm lo em maw ni le??Tunah fur a ni leh dawn a, chhuanlam a tha leh dawn tih ka hre reng mai, thal lai zawng lahin siam a awm thei bawk si lo. A?buaithlak ngawt chuan ka hria a ni. Siam tha teh se. – Kawng tha mamawha

Pu Chhuanliana a lo kir leh ta a, a lawmawm hle mai. Ani hi a thu ziah hi eng emaw ti tak hian chhiar a nuam fu zel mai a, a awm loh chuan, in thu chhuah dang hi ngaihnawmin chhiar vek tho mah ila, a kim lo riau hian ka lo hre thin. Chhiat an lo tawk a ni awm lehnghal a, a zia lo hle mai, ka tawrhpui takzet e. – Mapuii

In chanchinbuah hian an lo sawisel tho cheuvin ka hria a, Mizo tawng ziah chungchangah hian kei pawhin ka duhkhawp lo deuh thin che u. Ziah zawm leh zawm loh chungchangah hian in tidik lo nasa thin niin ka hria. Zawm ngei tura ngaih zawm loh hi in ngah khawp mai, kei ai chuan in thiam mai thei, tan la ula chuan a dik theih mai ka ring,. Chu chu ka sawisel ve duh lai cheu a ni. – Mapuia

Kar hmasa sawhkhawk-a basketball vela kan inel dan rawn sawi kha ka ngaihdan chiah a ni ve mai. Infiamna lamah hian kan thang nasa khawp ngei mai a, kan hruaitute pawh ram pum huap pawhin hriat an hlawh a, chanvo sang tak tak an chelh phah mek zel tihte pawh kan lo hre lehzel a. Chutih rual chuan invawrh kan tum dan, kan rama inelna kan buatsaih dan vel hi chu behchhan mumal awm lo deuhva hriatna hi ka nei deuh tlat mai a. Mi sum reng rengin kan tlan ni mai hian ka hmu a, player-te lahin ei hmuhna tak tak an la phak bawk si lo va, chhungte tihek mai an ni ang em tih hi ka lo ngaihtuah ve thin. – Mka pu

Zalen Chanchinbu hi ka lo chhiar uluk thei khawp mai a. Tan in lak lai leh lai loh pawh hi a hriat thin khawp mai. Tun hma deuh, nikum vela phek hma lam rang bei buai, en maia fel fai lo deuh pawh kha a awm ta lo, a ziaawm ta khawp mai. Tin, Chhut sual pawh a vâng ta khawpin ka hria, tan han la zel teh u – Mamawitea

Mi pakhatin a sawi ka hriat reng chu, “Hun rei tak tharum nena hneh theih loh pawh hi sum hmang hi chuan awlsam takin hneh theih an ni ang,” a tih kha. Ni e, kan ramah pawh vai rama sumdawng liante an lo lut mek zel a, a sawia sawi hi chuan kan rama vai awm hi kan phal lo va, kan duh miah lo bawk a; mahse, hetianga an rawn sumdawnna ang hi kan dang thei lo va, kan dang phal lo bawk thin a. Reilo teah an thuhnuaiah kan awm mai ang tih hi ka lo hlauthawng a ni. – 9436360899

Kan ramah tun hnaiah vai rama dawr lian tak a rawn inhawng dawn tih thawm a awm leh ta a, a lawmawm rualin mi tam takten tun hmaa an lo sawi tawh thin, heng sumdawnna hmang hian kan rama Mizo tlemte ni sa hi min chimral mai ang tih hi ka lo hlauthawng ve thin. – Hruaitea

Vai rama sumdawnna lian pakhat chu kan ramah hawn tum mek a ni a, a lawmawm khawpin ka hria. Kan dawrkaiten vai rama an lak, an duh duh zat min chhiar khum ringawt, thil tha site man tlawm zawkin kan lei ve thei tawh dawn a, keini mi rethei zawkte tan chuan a lawmawm hlein ka hria. – 8014357478

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?