Sawhkhawk (March 3, 2019)

Sawhkhawk of the day
Mizona chungchang kan sawi thin a, Chapchar Kut kan lo thleng leh ta a, he hunah hian i Mizo thar leh ang u. Kuminah hian Kut thupui atan inpumkhatna kan ti a, hnam khat a indo chuan din chhuah ngaihna a awm lo. Mizote phei chu kan tlem si a, hmun hrang hranga awmte hi kan intihunau that chuan kan hnam hi a thang zel ang. Tunah phei chuan kan dai thui ve ta hle a, khawvel hmun hrang hrangah Mizo hi kan lo awm ve zel tawh a, kan awmna apiangah Mizo nih kan inzahpui lohna tur leh kan Mizopuite pawhin min zahpui lohna tura kan khawsaka Mizo kan chawisan zel a pawimawh. Kut kan thleng ang a, kan hnam incheina pawh a lar leh dawn a, hemi piah lamah hian chhung lama Mizona hi a pawimawh ber zawk chu a ni tih hria ila, eng maw tia Zo chiam tum lam pawh a ni lo va, kan hnam leh thil hi humhalhin chawisang ila, kan theihtawpin kan hnam tan hian thawk ila, chu chu a Mizo ber a ni. – Mamuani

Kan MNF sorkar chu thla hnih emaw chauh kan la hrawn chungin an khawsakziaah chuan an piangthar ve tak tak niin a hriat rih mai ka ti. An sorkar hmasak pawh khan an ziaawm viau tho va, tun tum erawh a theihna chin chinah hma an la pawp pawp a, an chanchin ngaihthlak pawh a thlamuanthlak rih viauin ka hria. Nihna thar ang deuh an nihna lai a awm a, tha thar an ni bawk a, chuvang pawh chu a ni mai thei a; mahse, tun term chhung hi chu phur takin han thawk sela chu kum 5 lek chhung pawh hian kan ram zim te hi chu nasa takin hma a sawn phah theih hi ka ring a ni. – Zari

Mizote kut ropui ber, Chapchar Kut hi kan hmang ropui ta deuh deuh zel a, a lawmawm ngawtin ka hria. Nikuma hman dante kha ka ngaihtuah let a, naupang lehzual zawkte pawhin an zir leh an chhiar ringawt piah lamah a takin kan pi leh pute nun dan leh khawsak zia an hriat phah teuh thei dawnin ka hria a, a lawmawm ka ti. Chhiar ringawt hi chuan engmah hi a chiang tawk lo va, cheziaa entir theihna tur remchang inhawng niin ka hria. Chutih rual chuan kan thinlung hi Mizo deuh deuh sela, kan incheina piah lamah hian kan chhung lam zawk hi Mizo hle thei se a duhawm. – Muantei

Chapchar Kut kan hlut deuh deuh leh kan lawm dan pawh a ropui ta deuh deuh zel hi a lawmawm ngawt mai. Keini hian kan hnam hun ropui leh thilte hlut leh chhuan nachang kan hriat loh chuan hnam dang hi chuan engah mah min ngaihsak dawn lo tih hi kan sawi thin a, kan hre reng bawk a. Tunah chuan a takin kan ti ve ta niin ka hria. Mizo han tiha Zo chiam tum pawh a ni lo, kan hnam leh thil hi humhalhin chawisang ila, chubaka Mizona a awm chuang lo. – Ampuii

Sikul tan hma leh tlai chungchangah hian chhangchhenu hi min rawn ngat sela chuan kan chhanna tur hi chu a chiangin ka hria. Intihre deuh deuh, paho hi a tawng ring ring hi an nia, a buaithlak, chhangchhenu tan hi chuan tan hma an tih tlat hi chuan buai hi chu a na khawp mai. – Numami NU

Mizoten kut kan neih zinga kan ngaihhlut leh tun thlenga kan la lawm awm chhun, Chapchar Kut kan lo thleng leh ta a. Kum danga kan hman tawhah, thlalak leh video vela kan hmuh thin angin hmeichhia, zu han in mai leh rui chhe lutuk thlengin an awm thin a, kan Mizo zia a ni lo va. Kuminah erawh a awm ta lo niin a lang, a lawmawm hle. – Mamawitei

Hmanni khan he hmunah hian tu emaw khan a rawn sawi tawh a, kei pawh ka lo vei ve khawp mai. Social media, a bikin WhatsApp-ah hian thu maksak tak tak hi kan theh darh leh chiam a, kan nu leh pa, kan pi leh pu, a mawlmang ve zawkte hi kan tichiai leh chiam thin. ‘Chumi kha miah Kristian chuti zat an khaihlum dawn, tawngtaipui ang u,’ tih ang chi te, ‘PM-in Good Friday a titawp dawn,’ tih ang chi, thu awihawm loh deuh deuh hi kan vawrh darh chiam a. Kan thu dawn hi a dik nge dik lo tih hi kan vawrh darh hmain kan phone atang vek hian a check theih tih hriain, thu rintlak loh, mite tichiai thei vawrh darhtu hi i ni ve lo ang u ka rawn ti ve leh a ni. – Hruaitea

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?