Sawhkhawk (March 5, 2017)

Sawhkhawk of the day
Mitthi vui chungchang kha ka lo sawi ve châk deuh va. Hmun khata invui mai ang chi hi a awlsamin a zangkhai deuh ngei chuan a lang. Chutih rual chuan chhungkhat pa ber emaw, nu ber emaw, ama din ngei in atanga a ruang pawh chhuak lo, a hun hmanna hnuhnung ber hmun dang a han ni daih tur te. Inleng leh chhung leh khat lo kalkhawmte lo dawnsawn leh tih dan tur vel ngaihtuahin kan la zo lo deuh chuan ka ring. Kan mitthi vui leh sawngbawl dan kan thlak hlawk a nih erawh chuan a tih dan chu a awm mahna le! – Rema

Lalthlamuana Ralte thuziak hi ka chhiar ve ziah a, a ngaihnawm thei khawp mai. Min tibengvartu a ni a, keini ang mi inchhiar zau lo leh hre thui lo tan pawh fiah takin thil kan hriat phah thin a, a lawmawm ka ti hle a ni. Chutih rual chuan sorkar dik lohna leh tlin lohna lai ringawt hai chhuah tum ang deuhva ziah hi a awm leh zauh thinin ka hria a, ram tana thahnem a ngaihna vek chu a ni mai thei a, ninawm lek lek chang a nei a. Rorel lai beihna lam hawi a an chang a awm ka ti. Chutih lai chuan min tivengvatu chu a ni a, neutral tan chuan a chhiar a manhla hlein ka hria. – Mawipuia

Kangmei chungchang kha ka vei khawp mai, chhiatna kan tih tam tak hi keimahni insiam chawp a tam thin; chuvangin, khua a lo thal leh takah hian mi tinte kan fimkhur thar leh theuh hi a ngai em emin kei chuan ka hria a ni. Tumah vanduaina tawk lo tura kan fimkhur chuan keimahni kan him ang a, mi dangte tan himna kan siamsak dawn tihna a ni tel dawn bawk a. Tan i la sauh sauh ang u. – Siama u

Hun hi a kal zel a, tunah chuan kum pawh kan hmang thui leh ta hle mai. March thla kan lo chuangkai chu a ni leh deuh ta reng mai a, Pathian min hruaina a ni e. Hun hi a kal zel ang a, dam i hauh zel phawt teh ang u- Ama

Miss Mizoram thlanna chuan sawi a hlawh hle mai a, a buatsaihtute tan pawh a lawmawm ka ring. Engmah thawm nei lova thil tih ve ngawt chuan miin an ngaihven lo tihna a ni thin. Bikini round an han ti phei hi chuan sawi leh sep a tam ta hle mai. Kei chuan ngaihdan ka nei tehchiam lo; mahse, kan hnam zia nena inmil hian Miss hi a thlan theih thovah ka ngai. Miss thlannaah bikini khera en lo hian kan hnam nulate pawhin an entawn theih tura thianghlim a thlan chhuah theih ngei ka ring a ni. – Kimkima

Engtikah emaw khan TV programme in tihsual kha an rawn chhuahchhal cheuin ka hria a, ka lo chik thin cheu va, khami tum lo pawh kha tihsual leh zauh hi a awm tawh tlat. Tihhmaih palh awl tak tur chu a ni a, fimkhur zual nan a tha hle a ni. Ka rawn hrilh ve hrim hrim cheu a ni. – Zalen fan

Khawi hmunah pawh Pathian hi i hre reng ang u. Ani tel lo hian tumah kan che, kan awm thei si lo va. Thei ve emaw kan intih viau pawh hian min neitu, Pathian a chet meuh hi chuan engmah lo mai hi kan lo ni leh tlat thin a nia. – 9436360899

Pathian zarah kan dam ang a, kum pawh a liam veleh mai ang. Pathian hian hunbi hi a ruat zel a, nakin lawkah ni a pui ang a, fur leh thlasik pawh kan thleng leh ang. Fur kan lo thlen hun atan tun atang hian inbuatsaih tha ang u aw. Fur laia kan ramin chhiatna a tawh hrang hrang hi keimahni siam tam tak a awm niin ka hria; chuvangin, kan tui chhe paih leh thli kan luantir dawnah hian kan fimkhur chuan leimin leh chhiatna tam tak hi kan pumpelh theiin ka ring tlat a ni. Fimkhur teh ang u. – Puipuia

Hmeichhia chuan thu awih tlatin ngawi rengin zir rawh se. Amaherawhchu, hmeichhiain zirtir zawng ka phal lo, mipa chunga thuneih ka phal hek lo, nawi rengin awm zawk rawh se. Bible, Pathian thu a ni. Hriatna tura beng nei chuan hre rawh se, mihring thu a ni lo tih hi. Eng mi pawh nise mipate zah thiam nih hi ringtute awm dan tur dik tak chu a ni. Tlawma lak chi a ni lo, mipa kan nih avanga a nawm a maka hmeichhiate chunga inlulin erawh kan tih loh tawp tur a ni, hmangaiha lungruala cheng za tur kan ni zawk e. – Hruaitea

Kan inkhel thiam chhuanvawr chu a khelh thatna leh a goal thun aiin a saptawng thiam lohna kan sawi zui nasa zawk a maw? A va han hahthlak em! Saptawng thiam lo nuihzattute hi an khaw hawi a la zau tawk lo em maw ni ka ti ve deuh. Khawthlang inkhel thiam tam tak, kan star tak takte khu saptawnga tawng mumal thei lo an tam asin. Saptawng thiam lo chu hlawhtlin loh tur ni sela chuan kan hre lo vang, mi nuih pawh an tiza ngawt ang. Mahse, a ni lo, tunah chuan kan star ber berte an ni tlat. Danmawia pawh tang zel rawh, an sawiselna che hi nangmah fuihtuah hmang hlauh ang che. – Sangpuii

Saptawng thiam lo lo nuihzat ve ringawt hi a zia lo ngawt mai. Kan ram atanga India ram huapa football inelna sanga kan club tirhchhuah chhun timawitu chu fak zui tak aruangin a saptawng thiam mumal loh chu kan titi zui duhzawng a ni ta tlat mai a, a zia lo khawp mai. Football avanga a hlawh chhuah tawh sum chu sawi loh, a hmingthanna ringawt pawh hi a nuihzattu tam tak kha chuan kan la hlawh chhuak pha lo vang maw le!! – 9436360899

Kan sorkar zet chu mi rethei a va rawk nasa ve aw, tax a sang em em a, bill lah a sang uchuak em em a, ram hmangaihtute hian mi harsa zawk min lo rawk reng alawm mawle! Kan sorkar hotute hian hria se ka duh chu anmahni anga sum leh pai awlsam taka lak luhna nei kan ni lo e. – 8014357478

Engati nge thangtharho hian ‘Thang leh Cham’ hi an hriat hran loh mai le aw..? US?President chu India ramah lo zinin Chawlhniah a lo thleng a, Thawhlehniah a haw leh a. Doordarshan, Aizawl pawhin ni thum chamin a sawi tlat mai. Ni thum thangin emaw, ni khat chamin emaw a lo zin a ni si a. Ni khat, Thawhtanni chauh a cham a ni. Khawiah pawh zin ila, kan thlen ni leh kan haw ni hi kan cham hun chhunga chhiar tel a ni ngai lo. – Matea pu

Khua hi a thal chho leh tan dawn ta khawp mai a, mi tinte kan fimkhur tlan a ngai leh tawh e, kan inhrilh hriat thar nawn leh a ngai tawh a ni. Tun ang chho hi kum tina kan rama in kang avanga chhiatna thleng a tam hun lai a ni thin a, tam tak hi chu vanduai vang chu a ni ngei mai a; mahse, thenkhat hi chu kan fimkhur tawk loh vang a ni thin ang. Current kal sual hi kan puh fo thin a, hei hi a ni mai thei a; mahse, kan kalsan dawna current kan off hmak hmak hi chuan leak pawh a tlem a, short pawh a awm loh phah deuh thei ang. Fimkhur nan a tha hle a ni. – Mahruaii

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?