Sawhkhawk (May 13, 2018)

Sawhkhawk of the day
Pu Duhoma chu ZPM chuan Chief Minister atan an vawrh chhuak ta a ni a, amah hi IPS a nih lai pawha tha taka hna thawk kha a ni a, ram rawngbawlna ngai pawimawha bansan a ni bawk a. Kohhran Upa, an kohhranin camp an siam pawha speaker-a hman ngam a ni a, mi tha lo tak hi chu a ni lo tih a chiang viau mai. Chutih rual erawh chuan kan ramah hian tangrual pawl kan tih ang chi hi an ropui vak thei lo ni hian ka hria a. MPC hi chu an ruh nget nget thin viau a, an tam lem lo va, mi dang zawng hi chu Congress leh MNF hi kan ni deuh thum mai ni hian ka hmu a. Neutral deuh anga insawite pawh hi mi tha thlan tur tiin inhrilh chamchi thin mah ila inthlan tak tak a nih meuh hi chuan awn lam hi kan lo nei tho zel. Heng thil ka ngaituah hian, mi tha tak tak hi kal kânin a ngaite zinga mi bawk hi kan thlang leh mai hian ka ring rilru deuh tlat mai. – Rsa

Chawlhkar hnih liam ta vel kha a ni ta mai thei, ‘Sawhkhawk’-ah hian Congress sorkar hlawhchhamna kha an rawn ziah a, a dik ka lo ti ve khawp mai. NLUP hlawhtlinna an sawi te, khelmual tha kan neih te leh thil dang dang, an hmalakna, ram tana chhenfakawm tak tak chu a awm teuh vang; mahse, mipui nawlpuiin kan chhawr theihna tur chi-ah hian an hlawhchham ni hian ka hmu ve a, chu tak chu mi retheite kan retheihna tizualtu a ni bawk si niin ka hria. An rawn sawi ang khan ni tin mamawh buhfai, chini, gas leh thil dang angah hian sorkar hmasa kha an tluk lo riau hian ka hmu ve a, hei hi man tova lei ve zung zung thei lote tan chuan a hrehawm em a ni. – Ampuia

Tun Pathiannia in article chhuaha inziak ang khan, kan ram hian inthlan kan lo hnaih leh ta hle mai a, ram hruaitute chu an pawimawh ngei mai a; mahse, nang leh kei hian tih theih kan nei a ni. Tun tum inthlan na na na hi chu party ni lovin, kan ram tana tha tur hi thlang chhuak thei turin rilru leh ngaihtuahna seng ila ka va ti em! Vote an rawn zawng leh dawn a, an intitlawm leh dawn a; mahse, a tak taka thawk duh mihring hi kan mamawh tawh a ni. Kha chen kha bumin kan lo awm tawh a, tun tum chu bum theihin i awm lo teh ang u. Tawngtaina nen, Pathian rawn chungin he inthlan lo awm tur hi kan ram hian lo hmachhawn ila, Pathian aw ngaihthla chungin vote i thlak teh ang u. – Sylvia

Tuirini lei chhia tuartute chu an va khawngaihthlak ve aw! TV chanchin thara an YMA hruaitute emaw ni an kawmnaah khan an MLA leh sorkar lam kha an dem deuh niin a lang a, a dawhtu tur lam lah an insawi thiam bawk si a. A enga pawh chu ni sela, kan sorkar hrawn mek hian mipui hi chu kawng hrang hrangah hian min ngaihthah deuh ni chuan ka hria. Thingtlang lam chang ni lo, khawpuiah pawh hian ni tin mamawh – tui, gas leh thil dang hi a buaithlak em mai! – Ampuia

Mizote hi eng emaw chang chuan nihna duh kan inti ve fo thin a, a dikin ka hria. Hlawh neih theih miah lohna pawlah pawh hian hruaitu tur inthlan dawnah meuh hi chuan chuh tumte hi chuan tan an la viau zel a, tlawmngaia thawh ngai chi angah pawh hian campaign ang ema sawi theih ni chiah si loh hian tan hi chu an la vak zel tho. Nihna hi chu a hlu a, chutih rual chuan eng pawlah pawh tel ila, kan dinhmunin a tlin tawk chanvo leh mawhphurhna kan chan theuh tha taka kan hlen hi a pawimawh ber tih i i hre thar theuh teh ang u. – 9436360899

Kristian rama thleng âwm ang lo tak tak hi kan ramah hian a thleng ta fo mai. Tun hnaiah khawlaia mi sawisak tih thawm a ri a, thihna hial a thleng a. Hei hi a chhan chhui dawn chuan thil tam tak a awm thei ang, a pawimawh ber chu chhungkua hi a ni ngei ang, chhungkaw inenkawlna tha atanga seilian naupang hi chu tleirawl sual kan tih angte hi han neiin han thle ve bak bak thin mah se, Pathian zahna chen hi an nei tlat thin. Kan ram a that zel nan hian Kohhran a tan a ngai a, a pui turin mahni in chhung theuhvah nu leh paten rim taka kan fate tana kan thawh hi a ngai bawk a ni. Kan tan rual chuan zu zawrh tih mai mai hi chuan min tibuai lo tawp ang. – Mamuani

Mi tam tak chuan Kohhran hi an han sel thin a, zu zawrh chungchangah te pawh mahni kuang lo nawrah te pawh kan chhuah a. Mahse, kan rinpui ber Bible kan chhiar chuan sakhaw hruaitu, Puithiamte kha an Lalten an rawn ber zel a ni a. Ram rorelna hi Pathian hian a kut ken tur a ni a, a rawngbawltute chuan an thawk thei kher lo vang; mahse, Kohhran thurawn hi chu a ngaichang thiam turah ka ngai. Tin, kan ramin hetiang dinhmun a thlen theih chhan hi hi Kohhran leh Kohhran mite tawngtaina rah a tih loh theih loh, Kohhran hi awm lo ta se, sorkar kan hrawn tawh tam tak hian tun hi min thlen ka ring lo. – Sampuia

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?