Sawhkhawk (Nov 11, 2018)

Sawhkhawk of the day
Mizo thalai rual khati tak maia kan han inlungrual thei han hmuh khan thla a muang vawng vawng mai. Hnam chhan hnatlangah kal ve thei lo mah ila, khati taka Mizote hi kan tanrual theih chuan kan hmabak pawh ka hmu êng hle a ni. Kan duh ang ngeiin thil thleng zui turah ngai ila a tha ang. Thil dangah pawh, eirute dona kawngah te, ruihhlo dona kawngah te pawh, kan ram leh hnam hi chhanhim a ngai a ni tih hriain i tangrual zel teh ang u. Hnam huaisen, zam ngai lo, thiante chhan nana mahni nunna pawh hlan ngam thin Mizo kan nihna hi tun hnaiah therhlo itna avangin a chhe mek kan ti a, a dikna chen pawh a awm ang; mahse, tha thar thawha kan tan rual chuan a la tlai lo va, he ram leh hnam hi kan la chhan thei, chutiang tur chuan tangrual ila, tuna hnam hnatlang hi chutiang rilru min puttirtu ni hlauh teh se. – Siamsiami

Hnam chhan hnatlang zet chuh… Mizote kan lo duai lohzia a lang chiangin ka hria. Khawpui pakhata thil thlengin kan ram leh hnam chhan nan chuan Mizote hi kan lo dawih lohzia a tilang bawk. Chutih ruala mawi ka tih em em pakhat, vai chanchinbu lam pawhin an ziah, ‘tharum tel lova lungawi lohna lantir’ kha a ve mawi em!! Kan rama NGO hrang hrang hruaituten fing takin ro an rel a, an hruaiten tha takin kan zawm bawk a, kan tum leh duh chu kan nawr chhuak ang tih ka ring. Tharum tel lo, dikna chauh tanchhana kan han che chhuak kha a mawi a ni. – Vantea

Mizote hi kan Kristianna hian huaisen lo tur hian min chiah nia ngaih chang ka lo nei thin a; mahse, a lo ni lo. Kan duhnaah chuan, dikna tanchhan leh ram leh hnam chhan nan meuh chuan kan phurin tel loh kan hlau a ni ber mai, hnam dangte tan pawh hmuhnawm a nih ka ring. Pathian auvin, khati zata tam mipui kan han tawngtaite kha, chung lam tan pawh chhan loh a harsat ka ring. A mi Israel-te pawh, an sual, an tlu thin, a thu an awih lo thin; mahse, amah an zawn chuan a tlanchhiatsan ngai lo, an tan a rinawmna a pangngai reng thin. Chutiang chiah chuan, kan ram leh hnam tan khati zat kan tawngtai kha, Pathian hi a awm mai maitir theih ka ring lo a ni. – Mamuana

TV lamah hian inthlan lo awm tura party hrang hrang aiawhte leh an candidate te pawh, an kawmna ka lo en ve thin a, beng pawh a tivar khawp mai a. An insawi ang vek hian han awm thin sela chuan kan ram hi heti lek hi chu a ni lo vang maw le… Mahse, anmahniho bak hi thlan tur dang kan nei der bawk si lo va, a tua pawh hi han tling se, chuti takin thil hi an ti leh dawn lo nia ngaihna lian tak hi kan nei sa a, a dik duh angreng viau bawk a, a manganthlak lam niin ka hria. – Mahmua

Hnam chhana kan hnatlan niah khan thu sawitu pakhatin, NGO-te ngenna ngai pawimawh lovin party tinin Chakma candidate an siam tih a sawi khan ka rilru a la khawp mai. Hnam dang zawkte pawh nawr nan kan tangrual a, helaiah, kan ram chhung ngeia political party-te hian kan ram chhan nan hian NGO thu an zawm leh si lo em ni ang tih zawhna a awm. Tlin duh theuh chu an ni ngei mai a; mahse, ram leh hnam tan hi chuan tlem hi chu han inseng ngam ve sela chuan tun ai hian kan ram hi a that ka ring. – Amuana

Kan thianpa pakhat chuan, “ZPM hi an tha ka ti a, an hruaitute pawh ka duh an ni hran lo; mahse, Pu Lalthanhawla leh Pu Zoramthanga chuan Mizoram pawi hi an sawi hnem tawh a, Pu Lalduhoma hi chuan a la sawi tlem deuh ber a…,” tiin ZPM lam a awn deuh chhan a sawi a, a nih duh hmel hi ka ti khawp a. Kan CM tawh pahnihte hi chu an insawi ang hian an awm lo khawp nia hriatna hi kan nei thumin a rimawm a, Pu Duhoma erawh la ni chhin lo a ni a, a insawi ang a ni dawn em tih chu rinthu bak sawi tur kan hre lo. A lo tha phian thei a, a hmaa mite ai pawha chhia pawh a lo ni thei bawk a; mahse, kan thianpa thu sawi hi a awm ang riauva hriatna erawh ka nei. – 9436360899

Pu Duhoma hi kan sel sel thin a, a zuanglawr tia sawi pawh an tam tih ka hria a; mahse, kan ram hian ani ang pa fing, India sorkar pawhin a rama lal ber a ventir ngam kha a ni a. Exam sang bera inziak tling thei a ni bawk a, mi theuneu lo a ni. Ani ang hi kan ram hian a mamawh niin kei chuan ka hria; tin, inthlanna thianghlim leh dik, roreltu tha kan dil thin a, kumin inthlan phei chu Kohhranhote politics an sawi nasat ber kum a ni thei mai lo maw tih tur khawpin kan kohhran hruaituten an tlangaupui nasa a, ZPM hi kan tawngtai chhanna a ni thei mai lo maw? Party lian dang pahnih chu kan enchhin tawh a, eng min thlenpui lo. ZPM hi enchhin an chakawm ve tawh niin ka hria. – Ram hmangaihtu

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?