Sawhkhawk (Nov. 12, 2017)

Sawhkhawk of the Day
Kan khawpuia kan kawngte hi
kawngsira lirthei an hun loh hi chuan kan mamawh tawk vel a nihna lai hi a awm niin ka hria a. Kawngpui sira lirthei hung thin zawng zawng hian kawngpui ni lo, lirthei hunna in tha tawk nei vek sela chuan, kawngpui pangngai tak a awm thei dawn a. Thuneitu lam hian tun laia tan an la hi ka lo lawm ve khawp mai, an lirthei leh Kea kalte tan pawh a him zawk ngeiin ka ring tlat a ni. – Siami pu

Hmana Pu Chhuanliana’n Ka Huanga a rawn ziah kha a dik khawp mai. Tun hma deuh pawh khan tuten emaw chuan an sawi tawh thinin ka hria a, sim ta phei chu an awm lo emaw ni chu ka tia…; mahse, tunlaiah hian thalaite hi kan harh thar zel a, a bân ve hret hret zel hi chu ka ring a ni. Sap hming neih leh neih loh lam hi a pawi leh pawi lohna ka hre chiah lo va, a nei lote pawh hi ram hla leh ram chhung pilril zawkah pawh an zinin an awm ve tho va, an buai tak chiam thu sawi awm hi a tam lem lo. A harsat phah lutuk lo a niang! – Patea & Partei

In chanchinbu hi chhut sual a tlem sawt khawpin ka hria. In tan leh tan loh hi keini a chhiartute atang hian a hriat khawp thin a nia, han tang zel teh u. – Muantea

Pathianni hmasa article kha ka lo chhiar a, a hmasa zawk pawh kha ka lo chhiar tawh bawk a. A ziaktu khan a ziak thiam khawp mai a, a ngaihnawmin a bengvarthlak khawp mai. Tunge dik lo zawk ta ni. – Zorini

Inthlan hun a hnai a, kan political party-te pawh an inbei na leh tan ta sak sak khawp mai a. Mipuite hi kan â khawp hian ka hria a, kan han inthlang leh mah ang a, mahni khawtlang hmangaihtu âwm tur ngawih ngawiha kan hriat rengte hi kan kal kân leh nual ngei ngei ang. Inthlan hma hi chuan ‘kan veng/khua tana mi tha tur’ han ti dup dupin kan hmelhriat hnai takte pawh hi ni mah se, a hun tak takah hi chuan kan rilrua kan lo awn lam thin party bawk hi kan rilruah hian a lo arh chhuak leh ang a, kan veng/khua tana tha tur aiin kan awn lam party condidate bawk kan vote leh mai ang! – Papari

Mizoram hi India ramah chuan football inpui tia sawi ve mai theih khawp kan ni chho ve mek zel niin ka hria a. MPL te kan ti a, kan lawm viau zel a. Veng leh veng intihsiakna phei chu kan hlut em em zel a. MFA-in mumal taka league a kalpui pawh hi a tha ka ti a; mahse, kan vawrh lar danah hian fuh lo a awm em ka lo ti ve mai mai. Kan footballer-te ai hian kan model, team jersey nena thlalate hi an lar zawk tlata hriatna ka nei deuh reuh tlat mai a. Ka hre dik lo pawh a ni mai thei a, a vawrh lar tur zawk tak hi kan hre sual deuh tlata hriatna ka lo nei ve a ni, dik tak maw? – 8794686442

Thawkkhat lai khan kan ramah Bible lehlin thar chungchangah inhnialna a awm a, Pathian thu hi kan hre tam lutuk niin ka hria a, saptawngte pawh hi kan lo thiam leh lutuk bawk a, hei hian min tibuai mai mai ni hian ka lo hre ve ringawt thin. Pathian hi ring bur mai ila, ‘Pathian thu hriaa zawm chu mi hamtha an ni,’ tih ang khan, kan hriat chhun hi zawm ila, chu chu ringtute tih tur lian ber chu a ni mai. Inrinsiak, inhriat thuksiak leh chhiar tamsiak lam pawh hi ni chiah lovin ka hria. A theiin an zir leh an chhuina erawh ka sel lem lo, kan inang lo miau mai si a. – Veitu

Kan Kristianna hian mi dawihzepah min siam zawk a ni lo maw? Kan thenawm ram leh state thenkhatte an rama ei rukna an duh lohzia lantir nana an chet dante hi kan hmuin kan hre tlang theuh awm e. Kristian tih atan chuan a mawi lo kan ti thin zawk em ni le? Assam leh Manipur-a zirlai intelkhawmin an nawr, an ram chhung venhimna tura tha an thawh dante hi a va ropui bik tak em! Mahse, keini ramah ve thung chuan phun ri leh thusawiah chauh a thamral leh thin si a nih hi le! Che chhuak tur kan awm lo va, a che chhuak chhun tlemte pawh Kristiana hmaikawr hmanga lo tehin tanfung chhe te, mi sual zawkte tipawngpawrh zawnga lo dodal tawk an awm zel si, huihammm, a va hahthlak tak! Thalai tam tak hi kaihruaitu tha leh rintlak zawk awm se chuan chet chhuah chak zek zek hi kan awm teuh asin. Kan rama ei rukna, ram leh hnam humhalh nan hian chet a hun ta e, hruaitu tha erawh kan mamawh a ni. – Ralte Boyz

Biak In leh Kohhran thiltihnaa ringtu mai ni lovin, Biak In pawn leh Pulpit piahah ringtu nihna hi i lantir ang u. Thenawm khawvengah, office-ah, kan awmna hmun theuhvah. Sawi aiin thiltih leh nun hian a sawi ring zawk. Sawi that viau aiin tih that hi i tum zawk ang u. – 9856836216

Aizawl Hospital hian belhchian a va dawl em! An nurse-te hian mahni fate an duat ang mai hian min duat a, doctor nise min duhsak bik emaw tih mai tur khawpin min ngaihsak a, fak an phu a ni. An hnathawk, a hniam ber atang hian mi zawng zawng fak an phu a ni, fak an phu em a ni. – SANGTEA

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?