Sawhkhawk (Nov 13, 2016)

Sawhkhawk of the day
Kar hmasa khan thalaite leh politics chungchang in rawn chhuah a, a tha hle mai. Thalaite hi politics-ah hian inhmang ve awm tak pawh kan ni a; mahse, ka lo hmuh danah chuan kan rama inhmang mek kan rual ute han thlir hian inhman leh tel ve hi a châkawm loh em a, hei hi kan peih loh chhan niin ka hria. Politician reng reng chu eng emaw ti deuh tak hian kan enin kan ngai nghal a, a dik tlangpui bawk a. Chuvangin, thalai zawk tan chuan anmahni ang nih ve kan tum a nih si loh chuan han luhchilh thar veleh hi a phurawm loh a ni. Kan mi hmasate hi an sulhnu a pawr em a, kan nuihzat deuh tlat tawh a, nuihzatte ang nih chu tumahin kan duh lo ni berin ka hria. – K-a

US President inthlan dan article in rawn chhuah chuan keini mi mawlte beng a tivar hle mai, keini tan chuan electoral vote leh popular vote pawh kan hre hrang lo va. State-in hlutna an neih dan pawh kan hre thiam chiah lo bawk a, an sawi lar bawk si a, ram ropui an nih avangin kan ngaihven ve deuh eih lo thei bawk si lo va, a buaithlak khawp mai. Chutih laiin awlsam taka hriat theih turin in rawn chhuah a, a fiah ta kuar mai. Tun inthlan pawh mite zingah hre ve deuh ni awm takin kan sawi ve ngam ta a, a lawmawm hle a ni. – MkSiama

Hun rei deuh hhlek chu a ni tawhin ka hria, Pu Lalthlamuana Ralte-in a rawn ziah, hunpui laia kan rama dawrkaiten hlawk loh hlauva an thil zawrhte to uchuak tak taka an tih thin chungchang kha ka lo sawi thar ve teh ang. A dik ka ti a, ringtute hian hunpuiah hian mi rethei zawkte pawh an bazar ve theihna turin hlep tam lo deuh zawkin hralh ngam se ka ti hle a ni. A khât tawka harhnain a nuai deuh reng Mizo Kristiante hian kuminah hian Krismas pualin thil man tlawm lei tur nei ve ila ka ti kher mai, dawrkaite khan in rilru han siam teh u le! – Sangtei

Gas a lo tam leh ta hret chu a lawmawm hle mai, a van tak tak lai kha chuan keini ang mi rethei tana gas bur khat, chu pawh a khat tha lo leh tihchingpen deuh tawh cheng sang chuanga han lei kha chu a na a, a hautak a, daih reng chi a ni lo. Tuna a tam thei ta leh a thianghlim deuh thei ta hi a lawmawm a, hetiang a thlen theih nana hmalatu langsar, YMA hian fak an phu thlawtin ka hria. – Chhungpui nu

Central YMA hmalaknaa gas a ziaawm leh tan chu a lawmawm hle mai. Gas neih loh leh tui nghei hi chu retheihah pawh kan retheih zual hmel bik riau hian ka hre thin a, tunah YMA hmalaknaa a tam hi a lawmawm hle a ni. Mi hausate hi chuan an tuar lem lo, keini mi retheite hian kan tuar thin si a, chumi hriaa huaisen leh taima taka tha thawhtute hi kan thlamuanpui takzet zet a ni. – Zuala

Kan rama Kristiante hi kan dawihzep thin khawpin ka hria. Tun hnaiah thim thuah hnih an sawi a, kan han hlau nghal em em ringawt mai a. Ringtute hi kawng engkimah kan rin Pathian avanga huaisen tur, hlauh nei lo tur ni awm tak kan nih lai hian keini chu eng emaw hlek thawm a awm hi chuan kan hlau hi kan phili chung ni mai hian ka hria. Tute mahin sawi lo mah se hun hnuhnungah hi chuan chhiatna hi chu a lo thleng dawn tih hi a chiang, Bible pawhin a sawi a ni. Heng hunah pawh hian huai takin awm tur kan ni a, amah ringtute chu him takin kan awm thei ang. Chuti ni lova tute emaw sawi avang mai maia philia chiai tur kan ni lo, piangthar inti tak tak zingah pawh Pathian leh keimahni inkar hi a fel lo ta deuh em maw ni tih tur hi kan awm leh thin. Kan harhna dawn thinte hi Pathian leh a thu min hriat chiantirtu lo ni thin teh se. – 9436360899

Ringtute hi chiaia zam mai tur kan ni lo, kan rin Pathian hi a rintlak a, amah ringtute a tithlawn ngai lo. I nunah eng pawh i lo tawk a ni thei, chauvin zam mai lo la, amah chu enin hmalam panin i ke pen la, ringhlel ngai suh ang che. – Azuali

Kan ram hi khawi lai kawngpui mai pawh hi a chhiat thu hi kan hre zut zut reng mai hi eng nge maw a chhan ni ang le? State puitling ve meuh, kawngpui tih theih deuh zawng zawng a chhia hi chu tute emaw hi chuan a mawh hi an phur ngeiin ka ring. Fur a rei lutuk tih vang mai maia chhe ta vek hi chu a nih ka ring thei lo, khawiah emaw hei aia a chhan dik zawk hi a awm ang. Hmunpui lam atanga a siamna tur sum lo kal lo eitute pawh an awm a nih mahna, Kristian ram, state puitling nih leh kawngchhe lutuk hi a inhmeh lo, sorkar khan tan la teh u. – Sangtea

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?