Sawhkhawk (Nov. 26 2017)

Masi a hnai ta, chhungkua leh
khawtlangten kan compound te, kan veng chhung a rem lai kan chei leh ta sup sup mai a, a lawmawmin khawhawi a tinuam a, rilru a ti-Bethlehem ruih bawk nen, uar zel atan a tha hle. Mahse, mi mal in, veng chhung kan cheite hi a tlangpuiin ‘zan lama hmuhtlak/nuam chauh’ a ni lo maw? Zan lama pawn chhuak hleithei lote tan thlir tur a vang hle mai, a chei nana kan sum sen hian chhun lam leh zan lama thlir nuam ni kawp tur hian a siam rem theih ka ring tlat. Kum tharah chuan November thla laihawl vel atangin chei tan ila, chhun lama mawi leh hmuh nuam ni tel tura chei ni thei tawh se, a va duhawm em! – TSA

Zawlnei ka ni lo na a; mahse, hei erawh ka chiang. Eng party pawh sorkar se, rethei leh pachhiate lam hawia ke pen reng reng an hmuingil zel ang. Pathianin, ‘Heng mite ber chunga intih hi ka chunga ti in ni,’ a ti miau alawm. Kan Bible hi a daw ngai si lo va.. – M2

Khawvel ropuina leh mawina te a la chuai ang a, reilo te chhung nawmna nge kan thlakhlelha kumkhaw nawmna tur zawk le? Kawng dik lo lam kan zawh palh hlauh a nih chuan thlarau sual leh ramhuai awmkhawmna hmun, a hming pawh hremhmun an tih hmun chu i chang dawn tihna a ni mai. Felna kawng dik zawk kan zawh a nih erawh chuan riltam, tui hal, nat leh hrehawm awm tawh lohna hmun, Lal Isua hmun buatsaih chu ringtuten kan chang thung dawn a ni. Tupawh sawmna ngaithla duh lo chu an sawm nawn fo dawn em ni? – 9402520257

Mizoramin thil thleng lian tham kan tawh chang pawha national news – DDK, NDTV, CNNIBN etc. leh AIR News Delhi leh NE News Shillong atanga puan takngialah pawh min han puang ve ngai miah lo hi kan journalust te thiam loh nge, kan ziak, report-te min chhuahsak tha duh lo zawk? Kan saptawng thiamte hian thil tak tak ziak hi an ngam lo em ni zawk le? Facebook lama kuthlei kan tam tehlul nen hian hei aia awmze nei zawk hian tak lak han tum teh u. – Kûtdenga

Sumah miin a rilru zawng zawng a pek chuan mi hmantlak a ni ngai lo. Kan dam chhung khawsakna atan hian sum chu pawimawh tak a ni a; nimahsela, sum ringawtah miin a rilru a pek chuan chhungkua pawh a vawng fel thei lo va, chhungkua chuan harsatna leh buaina a tawng ngei ngei a ni. Chunakah Pathian aia sum kan lo hmachhuan zawk chuan a fuh thei lo va, chhungkua a thlahthlam a, ama chungah pawh chhungkua a vui bawk thin. Amah Pathian lovin a thilsiam kan lo Pathian hian pawi tak a ni. Sum pawh hi Pathian avanga awm chauh a ni tih kan hriat a tul hle. Chuvang chuan chhungkua i vawng him tawkin i inhria em tih lo inzawt teh. Taksa bawrhsawmna han tawk ta chiah la, i sum kha ip pawpa thlak ang hlauhvin a ral hiau hiau mai ang. Chutah chuan sumin a chhan zawh lohzia che chu i hre mai ang. Pathianin i damdawi ei thinte kha mal a sawm loh chuan i tan thihna turah a chang thei bawk. – The Slam

Ringtu kan niha vanram pana kan kal mekna kawngah hian rumin chauh chang nite nei thin mah ila, hnung lam hawikir tawh lovin, ramtiam van Jerusalem thar nuam kan thlen hma loh zawng ringtute hma lam panin i kal zel mai ang u aw, he khawvel hun hmawr tawh takah hian. Kan duh ang leh beisei ang thil a thleng lo a nih pawhin hnual mai lovin chakna thar kan neih zual deuh deuhva kan rin PATHIAN kan belh tlat hi nakinah vanramah nuama kan chen ve theihna tur chu a ni. He khawvelah hian zawng innghahna, inhnemna a awm mawlh lo, chhandamtu LAL ISUA hnenah chauh lo hi chuan. – 9402520257

Mizoram state kan nih hnuah tuna kan hrawn mek, Congress sorkar tluka nghet lo leh chak lo hi a la awm ngai lo. Finance an enkawl thiam si lo, mipuiah chhiah chawi hreh lo turin pu berin a ngen teh ngawt a, an mamawh miah loh, mamawh nia an inhriat, intihzahawmna atana nawmchenna motor leina atan ringawt tuman kan chawi châk vak ka ring lo. Tunah pawh mi harsate lehkha zir ve zel theihna tur awmchhun, book grant an titawp leh dawn a nia, VIP chanai chhuhsak an thupui a ni bawk a, an VIP mi retheiho chu kan rek tulh tulh mai dawn a nih hi. Duh leh NLUP hmanga an duhsak em em an party mi NLUP dawngho hian chawi mai se a tha mai lo maw?! – SANGSANGI PU

Kan Pathian thu chuan zu in mite chu tuifinriat lai taka mu ang leh lawng puanzar chhipa mu angin an dinhmun rapthlak tak a sawi a,retheihna nasa tak an chunga thleng tur nen. Thufingte 23:21 leh 34-ah chiang takin a ziak a. Chu mai ni lovin a tihsualtirtute pawh rawhtuina meiah paih an nih tur thu Matthaia 13:41-ah kan hmu bawk a. Heng mi chi hnih hremtar turte zingah hian tel ve lo turin Zofa ka unau zawng zawngte ka han sawm nghal che u a ni e. – Kristiana

Ni, mihring hi mak deuh kan ni. An rilru hah changa zan rei tak taka min text a, min men hreptute hi harsatna tawh ve changa zan reia han biak ve dawn hian an reh tlat zel nia. An harsat chang chuan min hre leh viau lawi a, mak ve tak a ni. Mahse, khawvel a ni miau va, mahtea lungawi hi zir a ngai a ni ber awm e. Chan chau zawk hi chu harsat lai chiah hian min hria a nih hi tih a awl duh khawp mai; mahse, riangvaite thian Isua kan nei alawm.. – LRA

Kan sualte sima inchhira inlamlette hnar ngai lotu Pathian Engkimtithei kan nei hi kan vannei hle a ni, lawm nachang kan hriat duh deuh hi ringtuten kan bat a ni a. A fapa pawh ui lova hringfate kan sual lak ata min tlan nan min petu Pathian chu tunge fak lo awm thei ang? Hun tha kan la neih lai hian muang lovin Chhandamtu Lal Isua hnen lam chu aw unau, i pan ve dawn lo’m ni? Khawngaihna kawng khar a nih hun chuan inchhirin kan awm palh ang tih a hlauhawm alawm, chatuan Gehena meipuia awm zawng a hrehawm dawn em mai! – 9402520257

ram Kawng chhiat chungchang hi, “UT hun laia Zawhte Dum kha tunah chuan a upa deuh tawh a, Var tawh tak a ni; chuvang chuan, Zawhte dum kha a hma aiin a Var tawh ti zawngin a Var tawh ti ula, a Var lo tiin A Var lo ti rawh u le,” tih ang vel a ni. – A.Mawia, Tkv

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?