Sawhkhawk (Nov. 27, 2016)

SAWHKHAWK of the day
Kan ramah hian engati nge electric hi siam that reng mai a ngaih mai ni le aw…? Inrinni tin mai hian khawi lai lai khua leh veng emaw hi chu thim tur hian an puang deuh reng maiin ka hria. Kan la intodelh lo tih hi chu a chiang a, kan lak luh chhun sem rualna khawp hrui em pawh kan zam dik hlei thei lo nge, kan zam dik sa hi a lo chhe leh zawk thin ni. A chhia chu a lo awm thei pawh a ni thei a, a zing lulai lutuk em hi chu a mak deuh a ni. Fur laiin tek leh thli leh ruah hlauvin kan thim a, thalah a hrui zam vang emaw niin kan han thim leh zel bawk a, state khat ve meuh tan chuan a thing ve deuhva hriatna ka nei. – Remrema

Zalen chu a chhiar a manhla thin hle mai. Chhut sual an sawi fo pawh tunah chuan a tam ta lo hle niin ka hria a, a awm zeuh a nih pawhin langsar tham a ni ta ngai meuh lo. Han tang thar zel teh u. Entertainment lamah hian Mizo in ziak thin hi a chhiar a manhla phah hlein ka hre bawk. – MkSiama

Kan ramah hian khawi lai kawngpui mai pawh hi a chhia a ni e. Sawisel loh tum pawhin keini kawngpuia ei zawng tan chuan a ngaihna a awm lo a ni. A hahthlak em mai, a ngaihna hria kha han che chhuak teh u. – Driver lubawk

Pu Modi-an pawisa a tihthih meuh chuan keini mi rethei thlengin kan buai phah char char hle mai. Hetih lai hian ka rilrua lo awm chu, thu lengvak tam lutuk hi a ni. Pawisa lem leh tak chungchang te, chu mi kuma chhuak chin lo chu a hman theih loh tih ang reng, belhchian dawl si lo, thil hre vak lote tichiai thei thil hi vawrh darh hi i sim teh ang u. Tun tum kher lovah pawh, hetiang hi awih tawk an awm a, a buaitlak tlat. – Asangi

Kei chu pawisa nawi vâng aiin kawng chhia hi ka buai zawk. Mizoram chhungah hian khawi lai kawngpui mai pawh hi a chhe em em vek ringawt mai a, a hrehawm a ni. Lirthei khalhtute tan a hahthlak a, lirthei neitute tan lah motor a uiawm bawk si. A tlan loh ngawt theih bawk si loh, Mizoram hian hetiang em ema kawngpui neih chhiat reng bik mai hi a ni thei dawn em ni le?! – Pi Sylvia

Mi state-ah pawh hian fur ruahtuiin nasa takin an kawngpui hi a nan ve tho va, tuihawk hi a luang dur dur ve tho va; ngati nge an kawngpui hi a chhiat ngai miah loh bik ni aw…?! Kan ramah chuan fur khat pawh dawl lo kawngpui kan nei rei ta e, mi ram chu tlangram a ni ve lo va, tui lah a luang ral muangin tuiin kawng a chim chhung a rei daih zawk a, kan ramah chuan a luang ral nghal zel zawk si a. Kawng tha nei thei remchang ber zawk hi kan ni lo’m maw ni le ka ti ve deuh thin a ni. – 9436360899

Hunpui kan lo thleng leh dawn ta a, mi tin tan inbuatsaih a hun leh tan ta. He hun lo thleng tur hi Kristiante hun pui leh pawimawh a ni tih theihnghilh miah lo vang che. I tan leh ka tana inpe Lal Isua hre rengin hmang turin ka ngen che a, he hunpui hmang thiam lova inchhira dam chhung nun chhiar ta tam tak an awm tih theihnghilh lo la, anni anga i awm ve loh nan i nun leh i hun hman uluk ang che. Mi dang tan he hunah hian i tangkai thei lo a nih pawhin mi dangte tana hnawksak leh phurrit nih loh hram tum bawk ang che. – Papuii

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?