Sawhkhawk (Nov. 3, 2017)

Sawhkhawk of tha day
Zalen a ngaihnawm thin e. Sawisel pawh in dawl fu zel a, fak pawhin hlawh viau bawk. In chanchinbu hmelhmang hi mi thenkhatin an rawn sawisel thin a, kei chuan Mizoram chanchinbuah chuan han en maia chhiar châkawm ber niin ka hmu ve tlat che u. Mizotawng lamah erawh an rawn sawi thin angin, tihsual ve deuh deuh chu innei thinin ka lo hmu ve a, a har em a, a awm lohna pawh a awm lem lo, tan lakna tur zel a ni a. Engpawh ni sela, in chanchinbu chhiar a nuam hrim hrim mai, Zalen hi lo vul zel rawh se ka ti a ni. – Mamuana

Ka pu, Zalen huang a ni bawk a, zalen deuhvin ka han zawt teh ang che. Hrisel lohna vang pawh ni lova nau titlaho hi tualthat dik tak an ni i ti ve lo maw? Zak thei lo tak tak, mi chet chhiatna lai sawi peih peiah an la tang zui lehnghal a, zah nachang hre deuh turin i chanchinbu kaltlang hian ka rawn chah e. – No. thup

He Mizorama Kristiante hi engtin nge maw Pathian tan leh kan mihringpuite tan kan that theih tehlul ang? Mahni theih thaah kan inngai theih va, Pastor-in ama tawkah tha a inti a, Kohhran Upain a inti bawk a, chutiang zelin rawngbawltu hrang hrang leh bawl lotu thlengin. Tha intih theih avangin kan insawisel theuh va, kan inring lo tawn theuh va, he Kristian ram zimte hian eng kan ti ta nge ni le? Bible chuan, ‘Mi zawng zawng mahni aia thaah ngai rawh u,’ a ti em ni kha? He thu hi vanrama hman tur nge, he leia hman tur? – Muana, Aizawl

He Mizoram, Kristian rama Kohhran pawl hrang hranga hruaitu/hotu leh Revival Speaker hrang hrangte leh Rev., Dr. te u, hei hi ka zawt a che u. Sum tam tak aiin hmingthatna hi thlan zawk tur tih hi eng nge kan ramah hian a awmzia ni ta? Tangka sum ngainat hi sual tinreng bul a ni tih pawh hi eng nge ni a awmzia ni ta le? Mizoram, Kristian rama mi rinawmte tan hmun a chepzia leh a hrehawmzia hi, mi rinawm lo leh mi pamham tan Mizoram nawmzia leh Kohhran leh khawtlanga an chanvo thatzia te hi tute mawhphurh nge ni ta ang le? Mizoram, Kristian rama hlawk ber chu rinawm lohna a ni a, hlawk lo ber leh mite ngaihnep ber chu mi rinawmte an ni ta ber e. – Tea, Azl.

Pu Zodintluanga hian P&E Department hi chang ta se power-a kan indaih lohna hi a ziaawm deuh ang em aw? Sports lama mamawh eng emaw zat a phuhru thei a, PHE a chan hnu pawh hian a ziaawm khawp chuan ka hria. Kum 20 state puitling nih hnu pawha puja vanga power indaih lo tih reng mai hi chu a dik lo a ni! PWD/PHE engineer/politician-te an intodelh tulh tulh laia thil awm dan ngaihtuah hi chuan a lungchhiatthlak a ni e. Synod hian zu ai mah hian kan ram intodelh dan tur leh ram hmasawnna tura ei ruk that lohzia te, ei ruk thawhlawm Pathianin a pawm lohziate inzirtir nasa zawk ta sela aw..? – 9862372482

Kan ram hi a tichhetu chu hnam dang ni lovin keimahni Mizo ngei hi kan ni e. KAN RAM hi a chhiat lohna tura daitheutu tur mi tha, mi dikten hmun an chang si lo. Kan ram hi a damlo a ni e. Pathian duh dana roreltu kan neih theih nan thahnemngai takin i tawngtai zel ang u. – 9856836216

Congress sorkar a ngialngheh chhan nia ka hriat thenkhatte: MLA/Minister a thenkhatte hi KTP Leader rual lek lek an ni ve a; mahse, zu leh sa, mipat hmeichhiat, ei rukna lamah sawisep an kai lo em em mai a. Tin, an senior-te lah Rotekawla vawkpa anga ro hran han rel lah an awm hek lo, hei hian malsawmna a keng niin ka hria. Heng Pu Romawia, Pu Zira, Pu Rohluna te phei hi chu sorkar tihlu zualtute an niin a lang. – M2

Krismas boruakin min chiah leh tan ta a, kan sumdawngte buh lu chuh hun lai a ni leh dawn. Mi ramah chuan kan sawi fo tawh angin an hunpuiah chuan mi dangte tana remchang siamsakin an thil zawrh an titlawm thin a, kan Mizo sumdawngte chuan an tito leh sawt mahna, kan lo thlir dawn ang. – 9856279257

Kan ramah inthlan a lo hun leh ta a, party tin an sahawk leh tan ta a, inzawrh pawh an thiam leh dawn tan khawp mai. Mizote hi kan politician-te hian min hre chiang khawp mai hian ka hre ve thin. Khati chen min sawpa min tiretheitute kha ni mah se thla hnih khat an han intiawhawm a, an han intihniam a, kan awih leh dial dial zel mai. Tute mah hi tha tak tak hi an awm lo ni maiin ka hria. Mizote hi fing tawh ila, tuna kan hrawn tawhte hi chu tumah hrawn nawn tlak an awm lo niin kei chuan ka hria. – 8974232935

Kumin zet chu kumtluanin fur a ni maiin ka hria. Mi thiamten kan khawvel awm dan hi a chhe mek zel tih an sawi a, hei hi keini pawhin kan tuar ve ta niin kei chuan ka hria. Hun awm dan mumal hi a awm thei ta reng reng lo mai. Siam tha tura kan tan hi a ngai hlein kei chuan ka hria. Khuarel hi a buai chuan a tuartu chu tu dang ni lovin keimahni bawk hi kan ni zel tih hi kan hriat a tha khawp mai. Kan tu leh fate tan a hrehawm lutuk ang. – Ama

Central YMA hruaitute chu an tha dawn thehthawh hle mai. A bikin President leh Vice President ka lawmpui hle a ni. Anni pahnih hi ka lo ralkhat hriat dan chuan pa huaisen, Mizo min hmangaihtute an niin ka hria a, YMA hminga an chet chhuah tawhnaah pawh thawm an nei lian hle thin a. An pahniha an thawkhova a lu ber pahnih an ni tur hi kan ram leh hnam himna atan pawh a that ngei ka ring. Duhsakna sang ber ka hlan e. – Mapuia

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?