Sawhkhawk (Nov 4, 2018)

Sawhkhawk of the day
Congress chuan matric pass tharte hnenah laptop sem an tum a, NLUP kalpui zelna tur nei niin an insawi bawk a. MNF lah chuan NLUP aia tam mah SEDP an sawi ri reng bawk a, kei chu kan party lian pahnih hian Mizote hi thawk lem lova hausak tum dan min zirtir palh ang tih ka hlau a ni. Anmahni insawi danah chuan tanpui ngai puihna a ni a; tin, SEDP phei chu thawk ngei chauh pek tihte pawh an sawi ngei mai a; mahse, politics-ah chuan, a tak tak a thlenin hetiang hian thil a tih leh theih tawh thin si lo va, hei hi nakinah kan ram leh hnam hian a la tuar mai ang tih ka hlau a ni. Mizote hi mahni intodelh tum thin hnam ang lek kan ni ang a, tunah erawh chuan a thlawna dawn theihna a awm chuan dawn tum ran, mahni kea din tumna nei tawh lo kan ni mai ang tih ka hlau hle a ni. ZPM erawh chuan engmah an tiam lo va, anni hi an tha ber pawh ka ti lo va, an thawm pawh zawi hret hret anga lang niin ka ngai a, an tlin hmel si loh. – Mama

Pu Hawla kaihhruai sorkar chu an bansan sup sup mai a, tunah chuan an MLA neih zat pawh a tlem ta viau mai. Heti tak maia an chhuahsan hi chuan eng emaw hi chu a awm tih hi a chiang reng mai a; chuvangin, han infak mawi chawp engang mah se sorkarna chelh leh hi chu a huphurhawm hian ka ring ve khawp mai. Anmahni hi chu an confi, mipui hian kan confi-pui tehchiam tawh lo niin ka hria… – Rsa

Inthlan kan hmachhawn mekah hian bial pakhatah chuan party pakhat candidate chuan an bial chhunga thalai leh bakberh ve deuhte chu inhlawhna a siamsak a; mahse, inhlawhna a siam hi a holam angreng khawp niin an sawi bawk a, ni khata an hlawh pawh a tha khawp mai an ti leh zel a. Pawisa sem anga sawi dawn chuan ni chiah si lo, inhlawhna siamsak, hlawhfaa chhawr a ni tlat bawk si a. Ka sawi duh tak zawk erawh chu, MLA ni tur hian miin an lo inseng huai khawp mai a, ani kher lo pawh hi thil dang dang apply hi an awm ang, hei hi kan MLA nih tumte campaign dan a ni a, an han tling a, a rulh let leh dan tur an ngaihtuah lo thei dawn lo tih hi a hriat reng mai a, mipui hi chu rethei tur chu kan ni. – Mamuana

A tir lamah khan MNF hian thawm an han nei hluai a, tunah hian Congress an han che a, an thawm hi a lian leh tawlh tawlh tawh ni mai hian ka hria. Congress hi chu national party an ni bawk a, an buk hi a rit tlat zel. Tun maiah hian inthlang ila chuan MNF hi an chak mai chuan ka ring a; mahse, a rei leh hret ang a, Congress-in an thiamthil an chhuah chuan an kâng leh deuh zawt zawtin kei chuan ka ring. ZPM lah hi a tira thawm an neih len ngaihtuahin tunah chuan bial tinah hian 2-na nih theihna chance pawh hi an nei ta meuh lovin kei chuan ka hria… Congress pawh hi mipui chuan kan ning chuan ka hria… – Mahmua

Pu Hawla’n ram dang lo zinten kan kawngpui a tha an ti tia a sawi kha, a sawitute kha ka hre châk angreng ngawt mai. Mamit lamah hian an kal lo a ni mai thei, a chhe ve viauin ka hria a, “Kawng in va nei tha ve,” han intihna chi niin kei chuan ka hre lo. – Mamuana

Kar hmasaa tu emawin NRC chungchang a rawn sawi kha ka pawm zawng tak a ni. YMA rorel hi ka thlawp lo lam ni lovin, kan ram a him theih nan chuan tih ngei pawh a tha ka ti a, chutih rual chuan rin ai takin NRC hi kalpui chu a harsat ka ring. Anni pawh tun thlengin an la buai zui a, thil tak taka ti tur chuan rin aiin a buaithlak ang. Kan ram leh hnam himna tur erawh chuan eng emaw tak hi chu kan tih erawh a ngai ka ti, kan tlem si. – YMA thlawptu

Pu Duhoma hi kan sel sel thin a, a zuanglawr tia sawi pawh an tam tih ka hria a; mahse, kan ram hian ani ang pa fing, India sorkar pawhin a rama lal ber a ventir ngam kha a ni a. Exam sang bera inziak tling thei a ni bawk a, mi theuneu lo a ni. Ani ang hi kan ram hian a mamawh niin kei chuan ka hria; tin, inthlanna thianghlim leh dik, roreltu tha kan dil thin a, kumin inthlan phei chu Kohhranhote politics an sawi nasat ber kum a ni thei mai lo maw tih tur khawpin kan kohhran hruaituten an tlangaupui nasa a, ZPM hi kan tawngtai chhanna a ni thei mai lo maw? Party lian dang pahnih chu kan enchhin tawh a, eng min thlenpui lo. ZPM hi enchhin an chakawm ve tawh niin ka hria. – Ram hmangaihtu

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?