Sawhkhawk (Oct. 15, 2017)

Sawhkhawk of the day
Tunlaia Aizawl khawpui leh kan rama kan titi ber chu kawngchhia hi niin ka lo hre ve a, a hahthlak khawp mai. Sorkarin hma la tan tih han hriatte hi a lawmawm hle a ni. A tuartu hi chu mi rethei kan ni zel bawk si a, VIP (mi retheite) hi kan VIP ta lo nge sorkar tak hian tihngaihna a awm lo zawk ni ang le?. – 8794686442

zalen hi a chhiar a manhla thin thu an rawn sawi tehchawk a, a lo nih hi! A hmelhmang pawh kan ramah chuan a mawi deuh ber maiin ka hria, tan han la sauh sauh teh u. – Rinzuali

Tun kara Article in rawn chhuah chu a tha hle mai. Mizote hi fai inti ve hle tawh mah ila kawng tam takah tawp nihna lai kan la nei. Keimahni leh kan inchhung hi kan enkawl fai em em a, kan compound chin pawh kan theih ang angin kan tifai tha bawk. A piah lamah hian kan la fai tawh lo thin a, khawlaia bawlhhlawh paih leh chinai tat mai, chil chhak mai duh hi kan la tam. Hei hi chu rilrua fai duhna tak tak a la awm loh vang niah ka ngai a, theihtawp chhuaha tan kan lak zelna tur hi a la tam hle a ni. Hawh u, keimahni leh kan inchhung piah lam hi faina kawngah hian i vei ang u. – 9436360899

Sorkar hnathawk hlawh pun huphurhtu kha kan huphurh a inang khawp mai. Keini ang mi inhnuai luah, inhlawhfa chawp hi a tuar ber tur kan ni dawn tih hi ka hre chiang khawp mai. Hlawh a pun chuan veng mawng bera dawrkai thlengin an thil zawrh an rawn tito nghal dawn tih a chiang a, keini hlawh hi a pung ve dawn der mai si lo va, ka huphurh lawk takzet a ni. Mi fate pha lo reng reng hian kan awm kumkhua dawn a nih hi. – Rinzuali

Gas bur khat Rs. 1500 chung lamin kan lei leh tawh a nia, keini mi rethei hi chuan chaw chhum tur ngaihtuah ngai bawk, a chhumna tur man to lutuk, chu pawh zawn fe ngai lehnghal hi chu a hahthlak em mai. – Zuala

Tunlai hian veng pakhatah chuan rawngbawltu pakhat bawh deuh mai a awm a, Mizo Kristiante hian eng emaw deuhva pianthar kher kan tum te, thil mak kan lawm em em maite hi Kristian ram kan nih rei tawh ngaihtuaha rinna kawnga kan la hniamzia tihlanna niin ka hria. Chu ai chuan Pathian thu kan hriat hi, a tlem emaw, a tam emaw, zawm mai ila, chu chu Pathian duh dan pawh niin ka ngai. Piangthar chu a nunah hian a lang mai a, chutiang chu kan nih loh chuan kan piangthar lovah hian ka ngai deuh reuh tlat a ni. – Sawma

Gas chuan min va han tibuaiin min va han tihah kher em! State pakhat ve meuh heti tak maia gas tama kan han tam hi chu sorkar thuneitu lam pawh hian zahah an la lo em maw ni ka lo ti ve a ni. An VIP-te dinhmun hi min han ngaihtuah ve zuai teh se, a hahthlak em em lutuk a nia…. – 9436360899

Chanchinbu pakhatah gas chungchang ziahna tha deuh mai ka lo chhiar fuh a, ka var ve deuh chauh mai a. Khata a inziak ang khan sorkar hian hmala sela, state puitling kum 30 chuang tawh harsatnaah chuan a ho em mai, chin fel a harsa lovin ka hria. Mipuite pawh tanrual a ngai a nih chuan tangrual turin inpeih bawk ila a tha ang a… . – Rosie Muani

October thlaah hian hetiang tak mai hian ruah a sur ngai em maw ni? Khuangchawi thla arkaideng pawh kan hmu lo mai dawn alawm maw le? Mahse, lungngai lo phawt ang, khuangchawi thla hi chu a nuam leh tho vang. Pathian hian a hun tak zelah ro a rel leh mai ang, kan ram hi chu Pathian hian min hmangaih a, min duat tih hi in sawi fo tawh angin ka ngaihdan chiah a ni a, a dik leh zel pawh ka ring ve tlat a ni. – Ama

Kan ramah ruah a han sur tak tak hi chuan chhiatna chanchin thawm hi a ri nghal chuah chuah zel mai a, a hrehawm thin ngawt mai. Chutih rual chuan kei chu Pathian hi kan chungah hian a tha hi ka ti a, a tuartute ka tawrhpui loh lam vang ni lovin, ruah avanga chhiat tawk an han awm rap rap chinah hi chuan a bâng mai zel ni hian ka hria a. Heti taka awihpanga in sa huai hian chhiatna hi kan tawk tam lo ngawt zawk hian kei chuan ka hria a ni. – Arini

Tunlai gas harsat dan em em hi a va han buaithlak em! Keini ang inhlawh chawpin gas bur khat Rs. 1500 vela kan lei chuan kan inchawm zo dawn lo a ni ta e. A ngaihna hriat han che chhuak teh u! – Ama

Gas a vang lutuk ta mai hi a va hahthlakin a va hrehawm tehlul! Bur khat man pangngai pawh keini ang tan chuan a harsat tawh laiin cheng sang chuang takmeuhvin kan han lei a nia, engtin nge kan inchawm zawh ang ni?! Chutah kan lei lah hi a khat lo hlawm si, hman chhung a rei lo, a leak a lo awm phei hi chuan mi rethei fa hi kan indawm kun mek a nih tak hi. – Rosie Muani

Sorkarin kan khawpuia lirthei jam a awm lohna tura ruahmanna a siam leh a kalpui tan tur chu a lawmawm hle mai. India ramah hian khawpui tin maiah hian lirthei jam hi problem lian tak a ni deuh vek mai hian ka hria a, tun hnaiah Delhi-ah chuan polllution kaihhnawih tel chungin lirthei hlui chu sorkarin a hluihlawn tawp mai tawh a. Kan khawpui inrelbawlna hi a fuh lo laklawh tawh si a, siam tha leh tur hi chuan keini pawh roreltute hi huaisen deuh tak, sawisel pawh tuar ngam tura hma an lak hi a ngai niin ka hria. Ruahmanna thar pawh hi hlawhtling ngei teh se. – 9436360899

Aizawl khawpuia lirthei jam awm tawh loh hun chu nghahhlelhawm hle mai, khawpui tihmawina lamah sorkarin hma a la mek zel bawk si a; mahse, a tak hi kan tawng zo lo vang tih erawh ka hlau hle mai. Kawng han siam belhna tur eih hi a awm mang bawk si lo va, chutih rual chuan hmalakna a awm hrim hrim erawh a lawmawm ka ti. – Azuala

Zu tha kan zuar ta che’ng a, kan ramah ruihhlo dang a hluar phah sawt ni mai hian ka hria, ni tin mai man tih thawm a awm reng mai. SRS an fakawm ka ti a, mahni pawimawh kalsanin thil tha lotitute dova an thawhna zawng zawng hi a lo thlawnin a luang ral lo vang tih ka ring tlat a ni. – Ama

Tunlai hian kan ramah hian ruihhlo a va han hluar awm em em ve aw!! Ni tin mai hian chanchinbu leh chanchin tharah hian ruihhlo man hi a awm reng mai a, a zia lo ngawt mai. Zu kan lo zuar tawh bawk si a, zu tha chu a awm a ni mai thei; mahse, a aia hlauhawm damdawi ruihhlo hian kan ram hi a run tak meuh meuh niin kei chuan ka hmu. Theihtawp chhuaha dova beitute an fakawm a, kan ram tan a ni tih hriaa kan tawngtaipui mawlh mawlh pawh a ngai niin kei chuan ka hria. – Rosie M

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?