Sawhkhawk (Oct. 28, 2018)

Kan ramah hian inthlan kum apiangin kohhran leh mi mal hi kan tawngtai a, tan pawh kan la a, pulpit tlang thleng thlengin kan sakhaw hruaituten an au chhuahpui a. Kumin phei chu kohhran hruaituten politics an sawi nasat ber tum a ni hial mai thei a, a lawmawm takzet a ni. Chutih rual chuan inthlan kan han hnaih leh tak tak a, Pathian thu hi kan ngaichang leh vak lo hlawm niin a lang. Party insawn thawm hriat tur a awm reng a, kan inchirhtheh nasa em em reng a, Pathian thu nena inmil chiah lo hian kan che nasa em em bawk niin ka hmu a. Inthlan hnaih lehzualah phei chuan a ni telh telh ang tih a chiang reng mai. Pathian hi ko ko mah ila, a hnathawhna hmanrua mihringin kan tum loh emaw, lo dawnsawn kan thiam loh emaw chuan awmzia a neih theih lohna a awm; chuvangin, kan thinlung theuhvin he inthlan pual hian Pathian aw ngaithla hlawm teh ang u. – Saktea

In chanchinbuah hian hmana an sawiselna thin che u, chhutsual tam kha a awm ta lo, a lawmawm ngawt mai. A phek hma thu bichilh lutuk kan ti dawn nge, en maia bit thup ang pawh kha tunah chuan a awm ta lo. Han tang zel teh u. – muantei

Inthlan kan hmachhawn mekah hian bial pakhatah chuan party pakhat candidate chuan an bial chhunga thalai leh bakberh ve deuhte chu inhlawhna a siamsak a; mahse, inhlawhna a siam hi a holam angreng khawp niin an sawi bawk a, ni khata an hlawh pawh a tha khawp mai an ti leh zel a. Pawisa sem anga sawi dawn chuan ni chiah si lo, inhlawhna siamsak, hlawhfaa chhawr a ni tlat bawk si a. Ka sawi duh tak zawk erawh chu, MLA ni tur hian miin an lo inseng huai khawp mai a, ani kher lo pawh hi thil dang dang apply hi an awm ang, hei hi kan MLA nih tumte campaign dan a ni a, an han tling a, a rulh let leh dan tur an ngaihtuah lo thei dawn lo tih hi a hriat reng mai a, mipui hi chu rethei tur chu kan ni. – Mamuana

ZPM hi a tan tir lama an thawm a rin tehreng nen khan, a rei tial tial a, an thawm hi a zawi deuh tial tial ta ni maiin ka hria. An kalphung tur an sawi an sawi hi tam tak hi hetia ngaihtuah thuaka tha mai; mahse, a taka tihhlawhtlin harsa deuh tak ni hian a hriat deuh reng tlat. Tute emaw chanchinbua mi dang tih tura ei zawnna leh thil dang dang ziak, a taka tih dawna tih theih miah loh ang deuh hi niin ka hria. – Mahmua

Inthlan kan han hnaih leh tak tak a, eng party mai pawhin tlin chu an han inring theuh mai si a, tu emaw ber chauh an tling thei si a. Party tinin mahni inrintawkna an neih ang hi mi mal hian kan thiltihnaah hian nei ta theuh ila, rin aiin kan changkang chak ang tih lam daih ka lo ngaihtuah mai. – Puipuii

MPF hi han tang tak tak zel sela, tun hnai lawka in chanchinbua thu ziak ka lo chhiara khawi bial emawin candidate tihek lo tura an party miten pawisa an thawh ang chite kha uar a hun khawp mai. Tute mai pawh hi sum duhna hian min chim hneh lutuk tawh a, tute emaw ei theihna zawnga phi ruai ruai reng kan ni mai si hi a buaithlak a nih hi. – Rsa

YMA-in ram leh hnam humhalh a tum leh ta chu ka lawm hle mai. Kan rama Kristiante hi kan tan rual phawt chuan Pathian hian ram tha zawka min dah hi a hreh lo vang tih ka ring. Kan tan ruala a thu erawh kan awih ve thung erawh a ngai thung a ni tih hi i hre reng ang u. – 8794686442

YMA Rorel Inkhawm khan kan rama NRC hman ve kha an rawt niin ka lo hria a, an rin ai tak chuan a buaithlak chuan ka ring. Hetia ngaih maia thenawm state-in an kalpui chin kan hriat hi chu a result chauh a ni tawh a, a thawh chhung leh a buaithlak dan tur hi a tam ngawt ang. NGO phei chu hruaitu inthlak zel kan ni si a, hlawhtling se ka duh em em rualin a hlawhtling lo palh ang tih hi ka hlauhpui lawk em em a ni. – ZPM pa

Pu Duhoma hi kan sel sel thin a, a zuanglawr tia sawi pawh an tam tih ka hria a; mahse, kan ram hian ani ang pa fing, India sorkar pawhin a rama lal ber a ventir ngam kha a ni a. Exam sang bera inziak tling thei a ni bawk a, mi theuneu lo a ni. Ani ang hi kan ram hian a mamawh niin kei chuan ka hria; tin, inthlanna thianghlim leh dik, roreltu tha kan dil thin a, kumin inthlan phei chu Kohhranhote politics an sawi nasat ber kum a ni thei mai lo maw tih tur khawpin kan kohhran hruaituten an tlangaupui nasa a, ZPM hi kan tawngtai chhanna a ni thei mai lo maw? Party lian dang pahnih chu kan enchhin tawh a, eng min thlenpui lo. ZPM hi enchhin an chakawm ve tawh niin ka hria. – Ram hmangaihtu

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?