Sawhkhawk (Oct. 29, 2017)

SAWHKHAWK of the day
In chanchinbu a ngaihnawm thin e. Sawisel pawh in dawl fu zel a, fak pawh in hlawh viau bawk. Sawhkhawk hi thu ngai chhuah a awm em ka hre lo va, inang deuh erawh chhuah a awm thin. In chanchinbu hmelhmang hi mi thenkhatin an rawn sawisel thin a, kei chuan Mizoram chanchinbuah chuan han en maia chhiar châkawm ber niin ka hmu ve tlat che u. A mawi a, colour inchawih pawh a mawi thei viau mai. Mizotawng lamah erawh an rawn sawi thin angin, tihsual ve deuh deuh chu innei thinin ka lo hmu ve a, a har em a, a awm lohna pawh a awm lem lo, tan lakna tur zel a ni a. Engpawh ni sela, in chanchinbu chhiar a nuam hrim hrim mai, Zalen hi lo vul zel rawh se ka ti a ni. – Mamuana

Thawk khat lai khan in chanchinbu hi fakna lian deuh deuh kha tihchhuah in ching ve deuh thin a; mahse, tun hnaiah a awm ngai ta lo va, in fakawm hlein ka hria. Fakna a awm kha ka sawisel a ni lo, in intunnun nana in mamawh thil a ni ang; mahse, chanchinbu thenkhata uchuak lutuka fakna awm ang chi hi chu tih loh hram hram dan zawng zel thung teh u. Fakna aia ngaihnawm chhiar tur lo chhuah zel teh u. – Sangtea

Pathianni hmasa khan Puipuia khan a rawn sawi a, fur laia tuichhe paihna fimkhur a tulzia kha. Ka lo vei ve thin a, kan compound a pelh tawh hi chuan kan tuichhe luanna hi kan ngaihven zui tawh lo va, kan luantir vel mai mai zel a. Hei hi kan thenawmte chhiatna thlentu a ni thei tih kan hriat a tha khawp mai. Fur a lo thlen hian kan tuichhe paih leh dithlifarfemin a nan nem tawh kha ruah tak zawkin a rawn chhu a, lei nasa takin a tihnem belh a, chu chuan chhiatna lian zawk hi a thlen thin fo mai a, kan fimkhur a ngai a. Mahni him viau si hian kan thenawmte tan mangkhawng kan siam a ni ve reng thei a ni. – Asangi

Central YMA chu an conference zo va, inthlang zo leh ta a, Chakma chungchanga an thutlukna hi tihlawhtling hlauh sela ka ti hle mai. President chak tak an nei dawn a, a thachhangdawltu a tha dawn bawk a, mi huaisen pahnih, thothang tha an ni a, beisei ka nei sang khawp mai. Conference boruak pawh a nuam viauin kei chuan ka hria. – 9436360899

Central YMA President atana sorkar hnathawk lo thlan chhuah a ni chu ka lo lawm ve khawp mai. Activity an ngah si a, hetianga sorkar mi chhawr ni lo, mahni duhthua khawsa thei nge nge chu hun awl pawh a ngah deuh turah ngai ila, an chak phah sawt ka ring a. A thawhpui turte pawh duhsakna ka hlan a, an rorelte pawh an tihhlawhtlin ngei ka ring tlat. – Muana

Mi sawi hi ka lo hre ve thin a, BPL ni tur si lo, a tehnaa tling phak lo; mahse, BPL?chhungkuaa inziak lut an awm thu hi, a tha lo hle mai. Heti hian ka ngaihtuah ta a, tute mai pawh hi kan theihna lai zawnah hi chuan kan hlemhle em em vek ni mai hian a hriat a ni. Officer liante ei ruk hi a len avangin an langsar hma a, chutih rualin keini mi retheite pawh hian kan ei ve theihna lai zawnah hi chuan tih hreh hi kan lo nei bik lo vek mai hian ka hmu. Kan Pathian thu awihnate hi a takin lang chhuak se ka va ti thin em! – MkSiama

Hmanah khan ka rawn Sawhkhawk ve tawh a, ka rawn ti leh dawn. Pathianin a hun ruat angin fur kan lo thleng a, leimin avanga in hnawl, nunna chân hial chanchin kan hre leh thin a. Khuarel chhiatna kan ti a, a dik takmeuh mai, chutih rual chuan chhiatna kan tawh thinte hi tam tak chu keimahni insiam a awm niin ka hria a (tuna a tuartute ka tihna ni lovin); chuvangin, kan tui chhe paih leh thli kan luantir dawnah hian kan fimkhur lehzual a ngai ka ti a ni. – 8794686442

Hman deuh khan Delhi sorkar chuan an khawpuia lirthei tawt lutuk tihziaawm nen diesel hmang lirthei upa tawh deuhte chu tlan chhuah a khap hmiah mai a, a huaisenthlak khawp mai. Kan ramah pawh hetiang deuhva hmalak hi a ngai ve thuaia rinna hi ka nei a; mahse, kan hruaitute hi an huaisen zo ve kher lo mai thei bawk. Ram hruaitu tan chuan mi tin lawmna siam tuma hruai ai chuan ram tana tha tur, mipui nawlpui tana sawngsawhlawtna awm hi an tih ngam a ngai niin ka hmu. – 9856279257

Mahni Kohhrana Inkhawm a awm reng laia hmun danga lo inkhawm thin hi thil dik a ni thei dawn em ni? Miin a lawina Kohhran (a Kohhran chu eng Kohhran pawh lo ni sela) hi a hransan chhung chuan Thlarau Thianghlim hian a pawl thei ngai ang em? Mahni tuina leh nuam tihna lama kal mai mai an ni zawk lo maw? – 8974232935

Veng pakhata zu dawr kudam chu mi tuten emaw an rawk tih thawm ka hre thawi a, a tha lo hle mai. Zu zawrh thlawp lotu ka ni a; mahse, mi ta ruk ang chi hi chu a tha lo, a Kristian lo lehzual niin ka hria. An rawk an sawi hi khawtlangin an duh loh avanga an khar a ni a, chu chu an lo rawk ni awm tak a ni. – Amuana

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?