Sawhkhawk of the day (June 4, 2017)

Sawhkhawk of the day
Zalen hi a chhiar rei ve pawl tak chu ka ni tawh mai thei a, thawkkhat laia kan venga a semtu khaihlak zeuh tih loh chu, a colour lo a nih lai atang tawh khan ka chhiar tan a. A phek pali chauh a la ni a. Khata tang khan regular tak hian ka chhiar ziah a, ka ngaihtuah leh hian hma in sawn hlein kei chuan ka lo hmu thin. A hunin a hril avanga hma sawn in nihna lai pawh a awm ang a, chutih rual chuan thawhrimna avanga hmasawnna chu a tam zawk a nih ka ring. Ka chhiar tirh ata tawh in thu chhuahte hi ngaihnawm ka la ti reng mai a, phek tin mai hi ka chhiar deuh dap vek zel a ni. Tan lakna tur erawh in nei ang, tang zel ula, hmasawn zel rawh u. – Hmahruaia

In chanchinbu thu ziak a ngaihnawm viau zel mai. Min tibengvar thin a, Pathianni tuk hi chuan chhungkuain kan inchuh nak nak zel a nia! Tihsual velah an sawisel thin cheu va; mahse, kei chu ka ngaihdam zel mai che u, tihsual lian tham lutuk a nih loh hi chuan paw ka lo ti ve vak lo. Tha erawh thlah lo ula. – H.Maruata

Sawhkhawk chhuak hmasaa an rawn tih ang deuh khan, Pu Chhuanliana hian a chanchin ngaihnawm tak tak leh a thil hriat hlui tak tak, kan ram chanchin ni hlawm si, thu urhsun pui ni si lo hi a buin chhuah sela a hralh a kal zek hian ka ring a ni. A kum a upa ve tawh si a, a ziak rei thei tawh lo vang tih ka hlau hle a ni. – Ka Huang fan

Zalen chanchinbu hi tan han teh u, chanchinbu dang pawh ni tin kan hmu a, a man kan chawi ve tho si a, thla khatah chawlhni vawi li chauh pawh khaw nawm loh vanga kan hmu lo hi chu a semtu thiam loh nge a chhututen in chhu hman lo tih hi a latute hian kan hre duh a ni. – 9436360899

Kar hmasaa Lalthlamuana Ralte thu ziah chu tute emaw tan chuan na si, na tih tihlan dawna thu dik ni si a ni ngei ang. A hma lawkin chanchinbu dangah NLUP vel a hlawhchhamzia chhuah a lo ni tawh bawk si a, kan ram sorkar hian an flagship programme, mi retheite khai chhuahna tura an tih hi hlawhchham chu an ti phal hauh lo vang, hmun thenkhatah chuan din chhuahpui pawh an awm mahna; mahse, a nawlpuia lak hi chuan a lo hlawhtling tehchiam lo a nih hmel ta hle mai. Mahni infak mai lova mi dangin min teh pawha min teh tlin theihna tur ti thei party an sorkar hun a nghahhlelhawm zual hle mai. – Pa Mawia

Kar hmasaa in article chhuah, Rev. Darchungnunga ziah chu a tha ka ti hle mai. Ka fiah deuh kuar mai. Khatiang thu ziak tha, mi tifing leh mi tibengvar thei ang chi chhuah lamah khan tan la zel teh u. – Sylvia

Tunlai chu ngati nge tuitla a tam em em mai le aw….? Chanchin thar han chhiar ila, ni tin mai a thleng zut zut reng mai. Khua a lum a, chutih rualin ruahtui tam hun lai a ni bawk a, lui kal vel pawh fimkhur hun lai a ni. Vanduaina kan tih tam tak hi fimkhur tawk loh vanga thleng a ni ve fo thin a; chuvangin, lui kal hun leh fimkhur hun kan hriat a tul takzetin ka hria. – 8974232935

Kan ramah vanduaina, a bikin tun laiah chuan lui lama chetsualna a thleng nasa hle mai a. Hetiangah chiah hian Mizo tlawmngaihna hi a lo va la sang em ka ti thin. Eng emaw chang chuan tlawmngaihna hi thi tawh leh awm tawh lo ang hialin han chhuah thin mah ila, miin kan hmuh phak renga tanpui an ngai a ni tih kan hriat hi chuan Mizo pangngai hi chu kan tlanchhe tak tak thei lo niin ka hria. Hmanlai angin kan tlawmngaihna kan lantirna hmun leh lantir dan chu a dang tawh a ni mai thei a; mahse, kan tunlai mil zel hi chuan Mizote hi kan lo la tlawmngai em em reng ni chuan kei chuan ka hmu a ni. – 9436360899

Social media hman thiam chungchang hi mite hian an sawi nasa thin tawh a, ka vei hi a tawp thei meuh lo, ka lo sawi ve lawk teh ang. Tun laiah chuan WhatsApp kan hmang nasa tawh a, chanchin thar rapthlak tak tak hi kan dawng zut zut reng mai a, nimin piaha thil thleng tawhte hi ‘nichin mai khan’ tih ang chia han dawnte hi kan han nei a, keini ang duang chuan kan lo buai phah mai zel a, hei vang hian thu kan post hian a ni hi dah a tha ngawtin ka hria. Tin, an sawi fo angin thlalak rapthlak tak tak thehdarh pawh kan hreh lo chhunzawm zel hi chu a fuh lo ngawtin ka hria a ni. Naupang thlengin an lo khawih thiam ve zel si a, an hmuh atana tha lo hi kan tidarh fo mai a, a dawngtu lam tan fimkhur sen a har si a, a thawn darh lamah hian fimkhur ta mai ila a fuhin kei chuan ka ring a ni. – 8794686442

Kan ram hi chu kan vannei thin hi ka tia, hmanni lawkah khan Cyclone Mora-in min nuai dawn emaw kan tia, engtin tin emaw min nuai lo va (hmun thenkhatah chuan chhiatna thleng tho mah se) Hmanah lah Mahasen kan ti a; mahse, min nuai leh lo bawk. Mite tuar ang hi tuar ila kan ngam loh dawn nen hian, kan him leh tlat zel hi Lalpa zawn chhuah ram kan nih vang a ni ngei ang. at loh chuan,’ an ti fo hi a ninawm ta e! Kan thurin bu, Bible duh loh zu zawrh hi Mizo Kristian tan a tha thut dawn lo va, a tha lo zel bawk ang! – 9774354495

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?