Sawhkhawk of the day (Sept. 16, 2018)

Congress that vena riau chu, ram pum huapa chanchin langsar deuh tur ni se; mahse, mipui nawlpui thleng phak tak tak si lo hi an siam thiam riau hian ka hria. Tun hnai lawkah pawh NLUP Kut an ti a, MYC kaltlangin Youth Summit an tih ang chi te pawh… ram pum hriat tham tak meuh niin district tinah an huaihawt a; mahse, khang kha a chhawr tak tak chu an tam vak lo mai thei a. A hnu zelah phei chuan an sum hman a uchuak deuh nia ngaih theihte pawh a lo awm ni awm a ni a. A enga pawh chu lo ni sela, programme lian deuh, ram pum nghawng thil, mi hnuaihnung ber tan erawh chhawr phak ni miah si lo ang chi hi an siam thiam tlat. Hei hi kan sorkar hrawn tawh leh hrawn leh zel turte pawhin an theih ve loh leh thiam loh niin ka hmu a, an boruak hi a lian tlat zel niin ka hria. – Muanpuia

Pu Chhuanliana pawh a lo kir leh ta a, a lawmawm hle mai. A kum zat a sawi/ziak thin a, heti zata upa hi ni tawh ila chuan kei hi chuan ka peih tawh lo hian ka ring deuh va, a fakawm ngawt mai. A lehkhabu thar pawh ka lei a, a chhiar a manhla viau mai. Rei tak min dampui teh se. – Mahruaitei

Zalen hian hma in sawn khawp mai, lo ti ve khanglang ila. Tun hmaa mi thenkhatin an sawi thin, a phek hma bit lutuk, han en maia hawrawp khat phui tlat ang chi kha a awm tawh lo niin ka hria a, thlir pawh a nuam ta khawp mai. Tin, phek hnung lama thalai huangah hian Mizo chanchin thar in chhuah thei reng hi in fakawm khawpin ka hria. In thu chhut pawh a sual a tam ta lo khawp mai. – Amatea

Kan Home Minister chuan Congress boruak a tichhe dawn khawp hian ka lo hre ve a. A insawi fiah dawn em ka hre lo va, a enga pawh lo ni ta se, party lian ber, sorkar lai lehnghala an Vice President meuh, an party miten insawifiah tura an tih ngaia a awm hian kan hriat phak lova ril takah hian an party chhungah neuh neuh chu a awm ngei tih hi chu phat rual a ni lovin ka hria. Eng party mah ka tan bik lem lo va; mahse, Pu Zira khawsak dan leh a chungchang chanchinbua an chhuah hi chuan party dang hi chu a tilawm hian ka ring khawp mai. – Mazuala

Bru-ho chu engtin maw an awm zel dawn? Autonomous District Council hial an dil ta a ni maw? An huangtau salh salh hle mai. Heti khawp hian sorkarin a buaipuiin chhawmdawlna pawh a pe tha dawn a, chuti chunga an lo let duh lo leh phut an nei sang lutuk hi chu a manganthlak a nih hi. Sorkar lah hian engtin nge a kalpui zel dawn ni? NGO-te hi an dinna ngaiah ding reng sela, tuna an kalpui lai ang bak hi chu kalpui zui zel lo teh se. – Sangtei

Tunlai chu Treasury Square, Congress Bhavan chhukthla leh Treasury bazar velah hian damdawi ti hi an va han tam em em ve maw le!! A bulhnai vengte an tanrual kha chuan a ziaawm viau kha a nia, tun lai hi an inthlahdah deuh em ni aw…? A eng emaw zawng chuan heng addict-ho hi an khawngaihthlak ve phian bawk a; mahse, khaw engah, miin kan hmu reng a ni tih hriat lai ngei pawha an kap an keu sawt sawt a, an han inchiu ngam ngat zel hi chu, mi thinchhe lo ber tan pawh hauh mai an awl khawp mai. An tam lutuk hi a ti ve ngai lo tan pawh helai vel hi chu mahni chauh chuan kaltlang pawh a zahthlak lek lek thei dawn mai. – Hmachhuani

Sorkar hun tawp, inthlan hun a hnai ta bawk a, kan Minister-ho pawhin thil ropui tak tak an hawng sup sup mai alawm le!! Chanchin thar enin ngaithla ila, khawilai khaw chengker ve tete-ah pawh eng building thar thar emaw an hawng zur zut mai. Eptu lam lahin sorkar hmalakna fuh tawk lo lai an lo zawng ve ngar ngar bawk a, a ngaihnawm hun lai a ni. Chutih laiin inthlan dawna lo awm ve ziah, a hma zawnga kan hriat ngai ni lem lo, Pathian rinchhan inti deuhva pawl ding leh inthlan chuh tum an lo inlar leh ta bawk a. Mak tak maiin, heng Pathian rinchhan intite hi an tling duh mang miah lo; Pathian hin inthlana dinga tla turin a ko zawk nge ni dawn ni? Mak ve tak chu a ni!! – 8794686442

Pu Modi-an faina beihpui a thlak hi a tha ngawt mai, khaw tin, veng tinah kan intifai deuh sup sup mai a, a lawmawm, tunah lang mai lo mah se nakin lawkah a rah hi kan hmuh a rinawm. Tunah pawh hian kan khawlai hi kum 10 liam taa mi thlir kir chuan fai tawh tak niin ka hmu, chhunzawm zel chi niin kei chuan ka ngai a ni. – Mapuia

Pathian rinchhan tak taktute hi chu eng ang harsatna pawhin nuai mah se an nghing ngai lo, nghet tak hian an ding a, hneh mi an ni ngai lo. Pathian ring intiin i tlu hlen em, inngaihtuah ang che. I tluk hlen chuan Pathian i ring tak tak lo a ni mai thei. Kan rinna hi rin ai takin a lo derdep duh khawp mai. – Muanawmi

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?