Sawhkhawk of the day

Kan ramah hian engati nge electric hi siam that reng mai a ngaih mai ni le aw…? Inrinni tin mai hian khawi lai lai khua leh veng emaw hi chu thim tur hian an puang deuh reng maiin ka hria. Kan la intodelh lo tih hi chu a chiang a, kan lak luh chhun sem rualna khawp hrui em pawh kan zam dik hlei thei lo nge, kan zam dik sa hi a lo chhe leh zawk thin ni. A chhia chu a lo awm thei pawh a ni thei a, a zing lulai lutuk em hi chu a mak deuh a ni. Fur laiin tek leh thli leh ruah hlauvin kan thim a, thalah a hrui zam vang emaw niin kan han thim leh zel bawk a, state khat ve meuh tan chuan a thing ve deuhva hriatna ka nei. – Remrema

Lalthlamuana Ralte khan tun hnai lawk khan a rawn ziak niin ka hria a, kha kha a dik ka ti khawp mai. Mizo, Kristian zawk hian engati nge kan hunpuiah hian kan thil zawrh hi to uchuak taka a man kan chhiar hlauh thin ni tih hi ka zawhna a ni. Hnam dangte chuan an hunpui hi mi dangte tana an inpek theihna hun remchangah ngaiin sumdawngte pawhin a tlawm thei angin an hralh a, kan ramah pawh an infakna kan hmu chei chuai thin a. Kan ramah erawh chuan a letling hlauh thung mai. Krismas puala thilpek, langsar taka mi dangte hnena kan pek thin ai hian mi harsa zawkte pawhin an lei theihna turin man tlawm deuh hlek hian an thil zawrh hi darwkaite hian chhiar ta se, mite chuan a langin an thil tha tih an hmu lo a nih pawhin a man an tihtlawm avanga mi harsa zawkten thawmhnaw leh an mamawh an lo neih ve theih phah dawn avangin Pathian chuan mal a sawm let em em ang tih hi ka ring tlat a ni. – MkSiama

Assembly inthlanpui kan zo va, MNF chuan sorkarna an siam dawn. TV-a an pu ber an kawmna ang deuh sum hi li liau luau mai si a, kan ram mipui chuan nuam takin hun hmang teh ang… hahah – Amawitea

Chhut sual hi mite hian in sim tial tial angin an sawi cheu va, a dikin ka hria, ni tin chhuak thenkhat ang thovin chhut sual hi kar khata vawi chauh chhuak a ni bawk a, a ziain ka hria. – Mapuipuia

Pu chhuanliana huang hi kei chuan ka lo chhiar ve ngai miah lo va, a thu ziak kalhmang hi ka chhiar duhzawng a ni lo ve tlat thung a; mahse, tun hnaiah hian ka chhiarsak ta zauh zauh va, in rawn sawi ang hian, thil hi a hre rei lutuk hi a mak a nih hi maw le! – Amah Sangtea

Thal a lo ni a, khaw hawi a nuam leh tan ta. Mizopa rilruah chuan lung a leng leh ta veng veng mai. Kan Zoram boruak hi ram dang zawng aia boruak nuam nuam chu a lo ni e. – 8794686442

Nu leh pate hnena ka chah ve duh lawk aw… Tun hnaia kan rama harna lo thleng chiam kha naupang lamah a thawk na khawp mai a, a bikin tleirawl kan tih rual vel hian an chang chhah thin khawp niin ka hria a. Hetah tak hian ka hlauhthawn chu, Pathian thu tlangaupui leh eng eng emaw a lang tih vangin kan tu leh fate hi an chhuak tam mah mahin ka hria. Zan rei tak takah tleirawl hmeichhia leh mipa an inzui chhuak a, Pathian thu anga an lan miau avangin khap ngawt theih pawh an ni lo va; mahse, he hun hi Setana pawhin remchangah a hmang ve thiam ang tih kan hriat a va tha em! Nu leh pate hian kan tu leh fate thlarau chan hi tisa tak pawhin kan ven a ngai a ni. Chuti a nih loh chuan kan chhungkua a mualpho palh thei a nia… – MkSiama

Kan ti nek nek a, BAR thla kan kai a. Hriat loh laiin hun a kal a, tunah chuan December thla kan lo chuangkai leh ta rup mai. Kum tirah kha chuan he hun hi hla tak niin kan hria a, kan hmang thei dawn nge dawn lo tih pawh inhre lo kha kan ni a, tunah chuan kan hma maiah Krismas, kan hunpui pawh a lo awm leh ta vung mai. Krismas lo thleng mai tur atan chibai ka buk lawk cheu va, thianghlim leh nuam taka hmang turin a inbuatsaih lai hian i inbuatsaih theuh teh ang u. Nakumah chuan kan hmang thei tawh lo mai thei a, kan hmang thei a nih pawhin kumin angin kan hmang thei tawh lo mai thei a nia…. – Siampuii

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?