Sawhkhawk (Sept. 23, 2018)

Sawhkhawk of the Day
Pu R.Lalzirliana, Tawi bialtu chu Congress chuan an hnawt chhuak ta ngei mai a, tu tan tak chuan pawi ang maw? Tuna lang chin maiah hi chuan ama tan hian a that hmel rih khawp mai a, a bial mipuite pawhin an la duh hmel viau mai a, Tawlhloh Puan hial an lo bahtir a, inthlanah pawh hian eng party-ah pawh ding sela, a tlin ngei a rinawm hle a. Tun maiah chuan atan hi chuan chhuahsan hi a tha kher lo a nih pawhin, a pawina a la awm rih lo. Congress lam erawh Pu Hawla’n an boruak a tha zawk angin sawi mah se chuti tak chu an ni lo, a tuk lawkah mi dang, an party-a nihna pawimawh tak an hnawt chhuak zui nghal a, eng emaw hi chu a awm chiang tih hi a lang reng mai. Inthlan dawn lai a nia, hetiang chiah hi lo beisei lo mah ila eng eng emaw hi chu a thlen a rinawm sa kha a ni. A enga pawh chu ni sela, Congress hi a nawlpui hian kan ning ve tan em tih hi a ngaihtuah theihin ka hria a, party dang lah rin kan nei chiah bawk si lo, Mizo mipui hi lai deuh hian kan awm a. MNF lah kan lo hre chiang tawh a, ZPM lah kan ring ngam chiah bawk si lo, a tenau deuhho lah eng an nih kan ring ngam bawk si lo ni mai hian ka hmu. – Muanpuia

Pu Zira chet hun chu Congress tan chuan ‘timing’ lo dawn khawp mai. Inthlan a hnai tawh si, Vice President leh Home Minister meuh hetianga a awm chuan insawi tha eng ang mah se an boruak hi a chhiat deuh phah lo thei lo. Amah zuitu an han awm zui nghal zat bawk si. Congress hi chuan thawm lian deuh neih hi an thiam hrim hrim, an rorel chhung pawhin ram pum hriat tur programme lian tak tak an siam a, mi nawlpui erawh an thleng pha tak tak lo niin ka hria. Entir nan, NLUP Kut han tih ang chi te, lian deuh, nawlpui tan erawh chhawr phak tak tak chiah si loh hi siam an thiam riau. – Mahruaitei

Mamit DC chu thlak a ni dawn ta maw? A lawmawm hle mai, Mizote min zah lo lutuk hnam dang hi chu chhuak zel teh se. Kan hnam kan tlem si, hnam dang hi Mizo thalaite hian hnawh chhuak sela, an aiawh tur khawp thiamna nei tur khawpin inzir zel bawk sela, nakin lawkah kan ram hi chu a nuam mai ang. – Amatea

Congress-in an Vice President an hnawt chhuak a, MNF-a lut tur ang deuhva thawm a awm mek lai hian, ZPM hi an va reh angreng ve! Tun lai chu Pu Zira politics bak hriat tur a awm lo va, Congress leh MNF nen sawi zawm loh theih loh an ni bawk si a, ZPM thawm lian tak hi a reh ta niin a lang rih. Kei chuan Congress hun hi a liam leh tawh nia ngaihna ka nei. India-ah state hnih chauh an nei tawh a, pakhat chauhvah an tla lo vang tih hi sawi ngam harsa lo tak a ni tain ka hria. – Mazuala

Bru-ho chu engtin maw an awm zel dawn? Autonomous District Council hial an dil ta a ni maw? An huangtau salh salh hle mai. Heti khawp hian sorkarin a buaipuiin chhawmdawlna pawh a pe tha dawn a, chuti chunga an lo let duh lo leh phut an nei sang lutuk hi chu a manganthlak a nih hi. Sorkar lah hian engtin nge a kalpui zel dawn ni? NGO-te hi an dinna ngaiah ding reng sela, tuna an kalpui lai ang bak hi chu kalpui zui zel lo teh se. – Sangtei

Tunlai chu Treasury Square, Congress Bhavan chhukthla leh Treasury bazar velah hian damdawi ti hi an va han tam em em ve maw le!! A bulhnai vengte an tanrual kha chuan a ziaawm viau kha a nia, tun lai hi an inthlahdah deuh em ni aw…? A eng emaw zawng chuan heng addict-ho hi an khawngaihthlak ve phian bawk a; mahse, khaw êngah, miin kan hmu reng a ni tih hriat lai ngei pawha an kap an keu sawt sawt a, an han inchiu ngam ngat zel hi chu hauh mai an awl khawp mai. – Hmachhuani

Sorkar hun tawp, inthlan hun a hnai ta bawk a, kan Minister-ho pawhin thil ropui tak tak an hawng sup sup mai alawm le!! Chanchin thar enin ngaithla ila, khawilai khaw chengker ve tete-ah pawh eng building thar thar emaw an hawng zur zut mai. Eptu lam lahin sorkar hmalakna fuh tawk lo lai an lo zawng ve ngar ngar bawk a, a ngaihnawm hun lai a ni. Chutih laiin inthlan dawna lo awm ve ziah, a hma zawnga kan hriat ngai ni lem lo, Pathian rinchhan inti deuhva pawl ding leh inthlan chuh tum an lo inlar leh ta bawk a. Mak tak maiin, heng Pathian rinchhan intite hi an tling duh mang miah lo; Pathian hin inthlana dinga tla turin a ko zawk nge ni dawn ni? Mak ve tak chu a ni!! – 8794686442

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?