Sawhkhawk (Sept. 24, 2017)

Sawhkhawk of the day
Inthlanpui a hnai a, party an inbei leh tan a. MNF-in furpui campaign an bei ngawrh a, Congress lah an tang em em bawk a. Chutih laiin party thenkhat inchhun finin thawm an lo nei reng bawk a, a ngaihnawm chho zel dawn e. Eng pawh ni sela, tute pawh hian ram an rawn hmangaih leh chiam chiam hlawm dawn a, an sawi thiam leh hlawm khawp ang a, mi chhiatna pawh an hmu hma leh dawn khawp tih hi mipuite hian kan chiang tlang tawhin ka hria. Kum tharah phei chuan chanchin mak tak tak pawh kan hre leh sek mai thei bawk a, mipuite hian kan ram tana tha tur ngei thlan chhuah nachang kan hriat a hun a. Sawi thiam ringawt aiin a taka thawk thei tur hi kan mamawh tawh tih kan hriat a tul hle a ni. – Muana

Kawngpui chhia avanga bandh han neih ngawt mai ang kha mi ramah hian a thleng ve ang em? Kan sorkar chak tawk lohzia a lantir chiangin ka hria a ni. CAG report-ah lah khan PM package anga an lo sawi, NLUP kha a lo ni chiah lo em maw ni, kan sorkar hian NLUP atan kawngpui a siamna tur hi a lo hmang vek a nih ka ring ta rum rum mai. Sorkar dang pawh kan hrawn tawh thin a; mahse, tun ang em ema khawi lai khaw kawng mai pawh a chhiat hi a la awm lo hialin ka hria. – Mapuia

Lirthei intlanchhawk chu kan ti dawn ta a, a tha khawpin ka hria. Hmanah khan ka lo sawi tawh a, ei zawn nana hmang, nupui fanau hrawk chawm zawkte kan intlanchhawktir a, chutiang ni lem lo, tam tak phei chu tul lem lo taka teihawia chhuak mai maite duh duh huna chhuak theiin kan siam kha a dik lo hi ka lo ti ve em em ringawt a. Mi ramah pawh, lirthei tawt deuhna hmunah chuan tuna kan kal dan tur ang hi an ti fo mai a, a tha viauin ka lo hria a, sorkar hian a enchhin ngam har ka lo ti khawp a, kan ziaawm sawt ngeiin kei chuan ka ring a. Kan zawngchhang viau ka ring tlat. Tumah hek bik pawh kan awm lo turah ka ngai a ni – 8794686442

Kawngpui chhia avangin kan han bandh rup mai a, sorkar pawhin hma a la dawn a, a bikin Champhai kawngpui siam tumin a intintuah tih han hriat hian a lawmawm hle mai. A hmaa an siam ang mai mai ni lo, fur khat daih lek emaw, lirthei lian deuhvin an zawha chhe leh mai ang lo deuh khan siam tawh sela tih hi ka duhthusam a ni tel bawk. A duh chuan siam dan a lo hre reng tih pawh a lang chiang viau mai. – Ampuia

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?