Sawmtea Chhangte single video thar – i tan ka hlan a che

Sawmtea Chhangte single video thar – i tan ka hlan a che – tih chu nizan khan local TV-ah tih chhuah tan a ni.

Kum hmasa lamah te hlawhtlinna tam tak a neih hnuah, kum bul rawn tan leh tawhin Sawmtea Chhangte chuan a single hmasa ber a rawn ti chhuak ta. Kumina a single video hmasa ber ni turin — I Tan Ka Hlan A Che — tih a rawn thlang.

Nikuma Lelte Award leh Vulmawi Award-ah Gospel Artist of the year award dawng kawp thei Sawmtea hian a ze ngai bawk rawn chhuah lehin, kohhran inkhawm leh thil tih khawm nikhua pawha sak dup dup theih tur lam chi bawk a rawn ti chhuak leh a. A single tih chhuah tawhte pawh hla nung tak zel a nih kha.

I Tan Ka Hlan A Che — tih hla hi Zarkawt venga awm, Lalrinmawii phuah a ni a. He hla hi Bible chang, Matthaia 29:1-16 behchhana a phuah a ni a. “Pathian khawngaihna avanga a hnuhnung ber pawh a hmasaber kan ni thei,” tih puanchhuahna lam hla a ni ber.

A hla chungchang sawi zuiin Sawmtea chuan, “Tlinglo inti leh induhkhawplo chungin rawng kan bawl tawk tawk thin a. Mahse, tunhma atanga theihtawpa rawngbawltute chanvo leh lawmman, Pathian khawngaihna avangin kan dawng ve thin a,” tia sawiin, “Khawngaihna avangin a hnuhnung ber pawh a hmasa ber kan ni thei a ni tih puanchhuahna hla a ni,” a ti a ni.

“He hla hi ka duh em em a. Ka nunah hian a takin a thleng dik chho mek zel bawka. Amah fak leh chawimawia rawngbawl ka tanna hi a la rei lo a. Heti chung hian Pathian khawngaihna avangin award pahnih (Lelte Award leh Vulmawi Award) te kum khat chhungin ka dawng kawp a. Mi tan chuan engtham vak ni lem lo mah se, ka tan hian a hluin a lawmawm tak zet a ni. Ka chunga Pathian thiltih hi a ropui ka ti takzet,” tiin Sawmtea chuan a sawi.

Kuminah zai lamah theihtawpa tan lak a tum thu a sawiin, single video pawh tihchhah nual a tum thu a sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?