Sawrkar bungrua tihchhiat hi

Tunhnaiah Champhai MZP huaihawtin Champhai district hospital a Doctor dahbelh phut vangin Bandh neih a ni a, Bandh hian awmzia a neilo nia an hriat avangin sawrkar pisa leh zirna in te chu an dang leh a. Hetia an chetna kaihhnawih ah hian dan leh thupek kengkawhtu lam nen inhmuthiam lovin Champhai DC Office a lirthei 5 chu a kang ta a. Lirthei kan chhan hi sawidan a inanglo a, a chhan chu engpawhnise lungawilohna kaihhnawih a ni tih chu a chiang mai awm e. Hei mai ni lovin Champhaia Circuit House chu mi thenkhatten a bungrua an tichhe bawk a nih kha.

Champhai thilthleng ang deuha mipui chetna (mob rule) hi tunhnai ah pawh a thleng ta zauh zauh mai a. A liantham zingah nikum maiah Court thutlukna a an lungawiloh vangin Lunglei a Magistrate office leh a chenna in chu mi thenkhat ten an suasam a, hei vang hian hun engemaw chen chu Lunglei Court pawh khar a nih phah hial a nih kha. Tunhnai maiah pawh mi thenkhat lungawi loten kan ram hruaitu lu ber Chief Minister gate paltlangin a bunglow tual hial an thleng thei a. Tunkar maiah Champhai ah lirthei 5 kangin Circuit House pawh suasam a ni leh a ni.

Heng thilthleng zawng zawng hi a demawm a, sawimawi theih chi a ni lo. Chutih rual erawh chuan dan leh thupek kengkawhtu tur Police an awm a, tunhnaia thil thleng hrang hrang han thlir hian Police Battalion awmna hnai vek a ni a. Hetiang thil a thleng hi Police Department lam pawh a inenfiah a ngai hle mai. Mizoramah IR Battalion 5 leh MAP Battalion 3 kan nei a, ram ralmuang Mizoram angah chuan hneh taka dan leh thupek kengkawh thei tura ngaih an ni a. Chuvangin tunhnai thil thleng hi inzirnan leh inenfiah nan hmang thei se a duhawm hle.

Champhai mipuiten Doctor dahbelh tura an ngen hi thiltih awm tak a ni a, chutih rual erawh chuan an chetdan erawh a demawm hle thung. Lirthei 5 kang ringawt mai leh Circuit House bungraw tihchhiat te kha a hlut dan tur a pawisa in han chhut ila, cheng tam tak a ni ngei ang. Sawrkar bungrua tichhia emaw kan intih lai hian sawrkar siamtu leh neitu chu mipuite kan ni a, chuvangin midang bungrua tichhia ni lovin keimahni bungrua ngei kan tichhia a ni zawk.

Champhai mipuiin Doctor an dahbelh an nawrna kawngah hian sawrkar lam pawhin thu leh hla a nei har lutuk hi a dik bik lo. Sawrkarin thil awmzia sawifiahin harsatna a neih leh hmalakna te hrilhfiah se chuan tun ang buaina hi kan pumpelh theih a beiseiawm. Tunhnaiah Home Minister hovin sawrkar mi pawimawh te thukhawm chuan Doctor indaihlohna phuhru turin Doctor lakbelh an rel a, thil lawmawm tak a nih rualin hetiang ti leh tur tho si chu a hmalam deuh ten ruahmanna siam ni ta se chuan tun tum Champhai thilthleng hi chu pumpelh theih a ni ngei ang.

Doctor a ni emaw zirtirtu leh sawrkar hnathawk dangte hi khaw hrang hrangte hian kan khuaa awm vek tur leh indaih turin kan duh vek a. Mahse tuna Mizoram dinhmun ah hi chuan indaih vek tur chuan tihngaihna a awm lova, Mizoram sum neihin a tlinloh bakah mithiam pawhin an daih a rinawm loh a ni. Chuvangin Mizoram dinhmun hre chungin kan harsatna leh mamawh kan auchhuahpui danah mi puitling tihawm taka kan chet a finthlak a ni tih zir thar leh ang u. Tharum thawh leh thil tichhe zawng ni lovin sawrkar hi nawr thin ila, chutih rual erawh chuan sawrkar pawh nawr kher ngai lovin a tih tur chu rang takin ti thin se buaina thleng tur hi kan pumpelh thei ngei ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?