Sawrkar office hunbi vawn dik

Mizoram Chief Secretary chuan tunhnai khan Secretary leh Department hotute thutkhawmpuiin hun vawng dik tura a phut thu a hrilh a. Sawrkar chuan ni khatah darkar 8 hnathawk tura a rawih avangin hun vawng dik tur an nih thu a sawi chhuak a ni.

Hun vawn dik hi Mizote’n kan zirthiam thei lo em ni? tiin ngaihdan a awm thei hial awm e. Thil tihkhawmna tam takah vawiin thlengin a huna tan chat ai chuan kim hun innghah khawm hi kan chindan emaw tih tur a ni a. Engpawh nise hmun dangah hun bi vawn hi kan thei mai lo a nih pawhin Sawrkar hi bul tan tha tu atan chuan a fuh berin a lang hrih a ni.

Tun hma atangin Sawrkar hnathawk tam tak te hi office hun chhunga thu mumal lova sawi an ni fo thin a, thudik pawh a ni reng a ni. A hrechiang te sawi dan phei chuan office thenkhatah phei chuan a huna office thleng lemlo, ban hmaa haw leh ching te pawh vawiin thlengin an la awm thin a ni. Hei hi a dik viauin a lang a, hman deuh khan district pakhatah chuan chhunah pawh office kai an la awm mang lova, chanchinbu lamah te pawh thlalak nen hiala tihlan a ni tawh a ni. Office hunbi hman dik lo chingte hian a chhawrtu Sawrkar hun an eiruk sak tihna a ni a, hna kal chak zawng pawh nasa takin an pawt muang thei a, hei hian hna ‘quality’ a tih chhiat bakah thui tak a tithuanawp thei bawk a ni.

Tuna a lan danah hi chuan department hotu, secretary leh officer tam zawk hi chuan hun an vawng dik viauin a lang a, hna a laklawh chuan ban hun pelh thak thaka hnathawk te pawh an awm a ni. Heng mite hian khauh takin office hun vawn dik kengkawh sela, secretary leh chief secretary pawhin office hrang hrang te chu a remchan dan angin vil mai sela a that a rinawm. A tul a nih chuan hun vawng dik lo ching dawk lak te chu hrem thin nise a tha hial ang.

Mihring zingah fak leh chawimawi nuam ti lo kan awm lova, infuih thar reng ngai kan ni vek a ni. Hun vawn dik lamah hian department inkarah inelna awm thei hial sela hma kan sawnin a rinawm a, he lama ti tha te chu chawimawia vantlang hriata puanzar te pawh a tha bawk awm e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?