Citizenship Amendment Bill 2016 chu a him lo nia hriain nasa taka dodal a ni a, NGO tangrual pawlte chuan Republic Day chu an boycott bawk a, hemi hma hian zirlai pawlte chuan CAB ‘16 duh loh lantirna kawngawh an lo huaihawt tawh bawk a ni. Hetih lai hian Mizoram sawrkar chuan CAB hi an duh loh thu an sawi tawh nangin Bill tihtlang tum ber BJP sawrkar an thlawpna erawh a takin an la tihlawhtling chuang lo a ni.
Republic Day boycott hian thil lian tham tak a entira, Indian Constitution lakluh a nih lawmna ni a ni a. Chu Danpui hnuaiah chuan khua leh tui te chu thlamuang takin kan awm tur a ni a; mahse, Bill pakhat pass-na chuan hei hi a tichhe vek thei a. Hmarchhakin dan loa lo lut rute a buaipui mek a ni a, hmun thenkhatah chuan leilung fate an dâwng tawh zawk a ni. Bill hi a hlawhtling a nih chuan kan hma hun a êng tehchiam lo a ni.
Chief Minister chuan a tul a nih chuan BJP kaihhruai NDA an thlawpna chu hnuhkir a nih tur thu a sawi tawh a; mahse, vawiin thlengin tihhlawhtlin a la nih loh avangin mipui lam hian an thlamuanpui chiah lo niin a lang thei a ni.
CAB 2016 hi hmarchhak pum puiah dodalna a nasa hle a, kan tan a him lo hle bawk a ni. He Bill hi BJP sawrkar NDA chuan tihhlawhtlin a tum hle a, Lok Sabha-ah tihtlang a ni tawh a, Rajya Sabha a la hmachhawn leh dawn a, a hlawhtling nih phei chuan India President-in a hming a ziah hnan duh thlawt lo a nih ngawt loh chuan dan loa ram danga pem tam takte chu India khua leh tui an ni mai dawn a. He bill hi sakhaw tlawhchhana duan a nih avangin Mizoram tan phei chuan a him dawn lo hle a, kan hma hun nasa takin a tichhe thei dawn a ni.
Hetiang hi kan dinhmun a ni mek a, Citizenchip Amendment Bill hi tihtak zetin mipui lamin an do a, an lungrual tih pawh a lang chiang hle a ni a. Mizoram dinhmun a that zawk nan kan Chief Minister pawh hian mipui rilru enin a thawhpui NDA hi a taka a thlauhthlak ngam a hun tawh a, engkim huama hmalak hun a ni e.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.