SEC vawi 279-na thukhawm

Aizawl;?Mizoram Presbyterian Kohhran hnuaia committee sang ber, Synod Executive Committee vawi 279-na chu Thawhlehni leh Ningani inkar khan Synod Office-a JM Lloyd Hall-ah a thu a, member 141 an kal a, thu pawimawh 60 zet an ngaihtuah.
Meeting-ah hian member term hmang zo leh lut thar tur inthlakna tihfel hmasak a ni a, Inneihtir theihna kawltu, Board leh Committee danga inthlak ngaite pawh tihfel a ni bawk.
Committee hi Synod Moderator, Rev. R.Lalhmingthanga’n a kaihruai a, Synod Secretary-in report a pe a, Finance Report ngaihthlak a ni bawk.
Synod Secretary Rev. R.Vanlalnghaka chuan Synod Executive Committee hmasa leh tun inkara thil thleng langsar zual report a pe a, Rev. Lianhmingthanga Sailo, Senior Executive Secretary chu PCI Working Committee member atan ruat a nih thu te, Bible Society hnuaia North East India Translation Advisory Committee (NEITAC) member atan Rev. B.Sangthanga, Executive Secretary ruat a nih thu te, SEC hnuhnung ber leh tun inkârah Synod Relief Fund atangin Rs. 10,63,000/- sem a nih thu te chu report langsar zualte an ni.
Tun tumah meeting thu ngaihtuah zingah chuan KTP Inkaihhruaina enthat dilna te, Vellore Mizoram House-a Staff Nurse dah rawtna te, Home Mission North-a rawngbawlna tha zawka kalpui dan rawtna te, Tunlai thiamna hmanga nau pai leh fa neih chungchang inkaihhruaina tihdanglam rawtna te, Synod Hospital Charity Fund puala thawhlawm thawh chungchang te, Mizo Kristian Inneihna Dan PCI-in kan hman mek hi Indian Christian Marriage Act-in a pawm tura hmalak rawtna te, Champhaia Synod Rescue Home din rawtna te, Mizoram Presbyterian Kohhran din ni, January 11 urhsun taka hman rawtna te, Kût chi hrang hrang hman chungchanga thuchhuah siam thar rawtna te, Synod Sum Vawn Dan 2011 enthat rawtna te, Barak Area Enkawl Dan enthat rawtna te, NEICCYA Biennial Conference 2021 thlen dilna te, Kohhran Hmeichhe Inkhawmpui Lian Chairman leh General Secretary ruat chungchang te, Guwahati-a Vaiphei Kohhran-te enkawl zui dan tur chungchang te leh International Seminar neih dilna te chu a langsar zual an ni.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?