Session ngaih pawimawh

Mizoram Legislative Assembly budget session chu neih mek a niin March ni 29,2018 thlenga neih tura BAC-in a ruahman chu bill lut thar 3 a awm avangin April 2, 2018 thlenga neih turin pawhsei a ni leh ta a ni.

Assembly session hi a pawimawh a, MLA kalkhawmte hi ram dan siamtute an nih mai bakah sum ruahman a, thil pawimawh hrang hrang relna leh sawihona a ni. Hei vang hian mipui pawhin an thu leh hla an ngaihven a, eng emaw thil thleng a awm anih phei chuan mipui titi a tling nghal thin a ni. Sawrkar (Ministry) lam pawh an inpuahchah a, session ah hian sawrkar hmingthatna leh hmingchhiat theihna a awm avangin eptu lam pawh an tang thin hle. Minister ten an hnathawh tha te a tam thei ang ber auchhuahpui an tum laiin eptu lam erawh chuan sawrkar diklohna leh tihsual sawichhuah tur an zawng thin a, opposition MLA te an taimak chuan session pawh a ngaihnawm thin a ni.

Mahse heti hi a ni chungin sawrkar hnathawkte chuan an ngai pawimawh tawk lo hle niin a lang a, hei hi thil pawi tak a ni. Sawrkar department hrang hrangte hi session-ah hian awm ve a, a tul huna che chhuak mai thei tura inring renga awm tur an ni. Mahse, sawrkar hnathawkte hian an zawm lo hle a, zawhna leh chhanna hunah chuan awm bawk mah se an awm reilo thei hle a. Finance Minister-in budget a pharh niah phei kha chuan official an tlem lutukte kha a zahthlak zawk hial a ni. Tun dinhmunah hi chuan an department demand sawi niah chauh hian awm a ngai niin an ngai ta emaw tih pawh a awl rum rum mai.

Hei mai bakah MLA ten thil hriatchian duhin zawhna an zawt a; mahse, a chhan department lam atanga dawn loh eng emaw zat a awm thin te hi thil fel lo tak a ni a, department lam an inenfiah a tul hle. Engemaw sub division leh hmun kilkhawr zawk atanga information lakkhawm ngai a awmte a nih chuan thuhran a ni a, chutih rual chuan MLA te pawh hian a hma thei anga zawhna an thehluh a tha a, session record a zawhna chhan loh a awm tih dah fo mai te hi a fuh lo hle a ni.

Department-ten tan an lak a ngaihna dang leh chu bill thehluh kawngah hian a ni. Tuna a lan dan hi chuan department hrang hrangte hian session neih lai leh neih dawnah chauh bill hi thehluh theihah an ngai em ni tih mai a awl hle. Bill hi session neih karlakah pawh Assembly Secretariat hian an dawng thei reng a, a tul hunah an puangzar leh mai thin. Bill reng reng hi MLA-te hian ni 4 tal an lo zir/enlawk ve a ngaih thin avangin tun aia hma hian thehluh tum thin teh se.

Sawrkar hian tun ai hian a hnathawkte hi session ngai pawimawh lehzual turin hriattir se. Tun aia hian Assembly session hian ngaih pawimawh a hlawhin a zahawm sawt i beisei ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?