Siaha-in aieng, berry award

Aizawl: Siaha IWMP hnuaia aieng sawngbawlna, strawberry chinna bakah Rawmibawk leh Phalhrang khuaa ni zung chakna hmanga tui pump-na an siam chuan Prime Minister Excellence Award in Public Administration for Implementing IWMP/PMKSY Award a dawng.

Siaha-in IWMP Award a dawn hi April 21, 2017 khan Mizoram sawrkar aiawhin New Delhi-a Mizoram sawrkar aiawh Residence Commissioner chuan Prime Minister kut atangin a dawng a, Award hian chawimawina thuziak (citation) bakah tangkafai cheng nuai 10 a keng tel a ni. Tun tuma Siaha IWMP in award a dawn te hi Tuisumpui a aieng sawngbawlna ‘Organic Turmeric Processing Unit’ te, Niawhtlanga strawberry chinna te, Rawmibawk leh Phalhrang khuaa ni zung chakna hmanga tui pump-na (solar water pumping system) te an ni.

IWMP enkawltu Siaha Project Director VL Hruaizela Khiangte chuan kuthnathawktute thawhrimna zara award an dawng thei chu an lawm hle tih Zalen a hrilh a. Award dawn chu thil har tak nia sawiin, “IAS senior officer 2-in a hmun ngeia an rawn en hnu leh tehna hrang hranga an teh hnuah an lungawi tawk avangin award dawng tur hian min thlang a. Hei mai bakah hmarchhak leh tlangram state dang atangin keini chauh min thlang hi a lawmawm lehzual hle a ni,” a ti. VL Hruaizela chuan organic Aieng chu a hralhna lamah an buai lo tih sawiin sawngbawl tur an neihloh an hlauh vangin khaw thenawmte ching uar turin an ti zawk niin a sawi a. Strawberry pawh a thlum that avangin Aizawl leh Lunglei lama an thawn te chu an hralh zo nghal zel tih sawiin strawberry chu grape juice ang deuha siam dan an ngaihtuah mek niin a sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?