Simla thlengin sim chuang lovinSimla thlengin sim chuang lovin

– F.Lalrinfela

Thlawhna chuan hreh vangin chhungkaw thilah pawh ka lo zin loh phah tawh thin a, New Delhi-in 2010-a Commonwealth Games a thlen tum pawh khan press mi zin tura a thlan zingah pawh khan ka tel a; mahse, thlawhna chhuan hreh vangin ka kal loh phah tawh bawk. Thlawhna han chuan ngam loh ngawt chu ni thei ka hriat tak loh avangin Mizoram sorkar leh Information & Public Relation Department (I&PR) ten NEDP sum hmanga India hmar lama tum li Press Tour an buatsaih chuan kal chu ka tum ruh ve hle a, zin tura thlan ka ni tih ka hriat ka lawm tluk zetin ka thlawhna chuan hrehna chuan ka rilru chu a luah zawk a, mahse, thlawhna chuang ngam lo nih reng chu ni theia ka hriat loh avangin Delhi, Chandigarh leh Simla te chu ka han thleng ve ta chu a nia, kan rama tih ve atana awh zawng hmuh tur a tam duh hle.

Air traffic jam avanga Delhi khawpui chunga darkar chanve zet kan din hnuah zan dar 11 pakhat vel bawrah kan tum a, Airport building kan chhuahsan atanga awh ka hmu nghal a, he thlawhthla tum hmun leh a vel an chei dan vel chu khawlum hnuaiah pawh dam sawng sawngna tham a tling. India rama plan city hmasabera chhal Chandigarh duan a nih dan khan ngaihtuah a tam a, inhlat tak taka hmun pawimawh leh dawr hmun te an dah kha khawpui tawt ven nan leh khawpui zauh nan thil tha tak niin a lang a, chumai bakah in sang pui pi hmuh tur a tam lo a, thing a tam em em mai te khan khawpui vah vel a tinuam hle, hmun bikah tih loh chuan In te kha kar nei thlap thlap khan an awm a, phai ram atan chuan khawlum laka invenna tha tak pawh a ni ngei ang. Chandigarh leh Delhi te hi chu phai ngang a ni a, keini ram nena han tehkhin chi pawh niin a lang lo, an khua erawh a thianghlim.

Kan zinna lama awh ka hmuh tamna ber chu keini ang bawka tlangram khua, Himachal tlangram te kha a ni a, sawi tur pawh a tam khawp mai. Mi hi chuan thil hi an lo ti tak tak deuh chu a ni. Phai atangin Simla panin kan han tlan a, Eight lane kawng atangin four lane-ah chutah 2 lane velah kan lut chho a, Simla khawchhung kan han lut te phei chu an kawng te chu te ve tak a ni tawh. An khawchhung kawng te phei chu keini Aizawl leh khawpui dang kawng te aiin a ropui bik lo hle. Mahse, traffic jam a tam lem lo hle a, khawpui chhung dawr awmna leh an hmun langsar, mi tlawh nasatna hmun te hi emergency thilah lo chuan tlan phal a nih meuh loh avangin motor tlan dan phung a mumal phah hle. Motor khati zozai kha khawi hmunah nge an bo zawh tih mai tur hian kawngsirah lirthei ding hmuh tur a tam lo hle. Hotel lian chin ho kha chuan parking kha an nei deuh thlap zel a, chumai bakah sorkar parking (multi level) an nei nual.

A kawngpui zauh nana an hmalakna hmuh khan hmangaihna tak taka thil tih a lang a, tlang ram chhengchhe ve tak, a lei lung pawh nghet bik lo tak a nih avangin kawng chhak lam an rem dan te pawh an uluk hle a, hmun tam takah chuan an rem theih bak pawh Len (net) in an fun a, lung leh lei tla tur an veng nasa hle. Hmun thenkhatah chuan kawngpui chanve dawn dawn te chu kawng thlang lam atanga lung hmanga dawhzawl te a ni a, tumna a awm chuan kawng a awm, an tih chu a takin a hmuh theih. An kawng tam tak four lane a an siam theih ang khu chu an tih ang em em a ti ve lo pawhin kan nei ve thei tih chu a chiang reng mai.
Kawngkama In sak an kalpui dan chu an entawn tlak hle a, Chaltlang kham chho leh Durtlang kham chhova insak chungchanga INTACH, Mizoram chapter ho hmalakna ka hrechhuak rum rum. Simla thleng hma hian khua kan tlan tlang nual a, heng khaw chhung tih lovah hi chuan kawng sirah khaw hawina dala In sak hmuh tur a awm lo, a tih theih. Khualzinna tamna hmun a ni a, kawng sirah hotel leh restaurant hmuh tur a tam hle a, kawi tinah heng inhnangfakna tur hi a awm a tih theih ang. Heng hmun te hi in lian tak tak leh lian vak lo te an ni a, mahse, kawng aia sanga In sak a awm meuh lo a, an ram tlawhtu an an mikhual tur te rawn kal chhan an tlang ram mawi tak rawn tlawhtu khualzin te tana hawina tur anga insak hmuh tur a awm meuh lo. Kawng chhak lama chuan In sang tak tak hmuh tur te pawh a awm a, mahse, kawng thlang lamah chuan khaw hawina dala in sak hmuh tur a awm ngai lo a, kawng atanga feet thum vel aia sang in a awm ngai lo a, an restaurant te pawh kawng atanga chhuk ngai a ni deuh vek.

Sap ho hunlaia India ram mai bakah tuna Pakistan, Bangladesh leh Burma thlenga an awpna hmun a ni bawk a, Simla-ah hian sapho kuthnu a tam hle a, khatihlaia India rama British Lal aiawhtu Viceroy of India te chenna Viceregal Lodge building khuan 1900 hmalam khan Hydel Project hmangin eng a lo chhi daih tawh. Himachal Pradesh hi hetiang khawpa tui chakna hmanga khawlchhetha siamchhuak lo hmang hmasa an ni bawk a, kawlphetha hi an pechhuak hnem hle a, an power tharchhuah theih zata an chhut hi an puitlin thei anih chuan India rama hydel project te tharchhuah 25% hi he state tharchhuah hi a tling hial thei a, tunah hian 8,418 MW tharchhuak ang an ni.

Rain water harvesting lam an uar hle a, Viceregal Lodge tualzawk te chu a hnuai tuizem vek a ni a, he in lian pui ruahtui dawn chu he zemah hian an dah lut zel a, tui lakna dang an nei lem lo. Tin an hmun hmingthang tak The Ridge an tih hnuai pawh hi tuikhuah vek tho a ni a, hei hi chu hmun dang atanga tui lak a ni thung a, an khawpui chawmtu ber a ni.  Simla-ah hian rope-way thui vak lo a awm a, chuan hlau lo tan chuan kal velna atan a awlsam hle a, hlau chung chung chuan kan han chuang ve leh hram a, minute hnih vel chhung a rei duh ngei mai. Himachal-ah hian rope way thui tak tak hmuh tur a awm.

Heng khaw pathum / state pathum kan tlawhnaah thil danglam deuh ka tih chu meizial leh kuhva lam chi lei tur a vâng em em mai hi a ni a, a zu hmuh tur pawh an awm meuh lo. Lei tur hmuh chhun bawh dawr mumal ni vak lo, kawngsira biru deuha inzuar an ni tlangpui a, mi hmuha mei han zuk pawh a nuam hran lo hle, a zu kan hmuh pawh tlema mi hnuaihnung lam hmel pu deuh an ni deuh zel a, keini lamin sim loh kan intihhmuh laiin an nih chuan sim la tih pawh ngai lovin, an ti lo mai niin a lang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?