SOCIAL MEDIA & PRIVACYSOCIAL MEDIA & PRIVACY

Kum 15 chhung chu Mizoramin mobile phone kan hmelhriat ve ta a. Reliance Jio avangin internet speed chak 4G pawh mi tin banphakah duhtawka hman theihin 2016 kum tawp lam atangin a awm ta bawk a. Internet khawvelah kan cheng a, kan naute tap thlem nan pawh YouTube kan play-sak a, tawng la zirtir chauh pawhin toys dang aiin smartphone chu inawmtlei nan an hmang ta. Smartphone kan hman tamna ber chu games, social media leh YouTube te an ni a tih theih ang. Social media bik hi i han thlurbing dawn teh ang.

Engnge Social Media chu? Mizo tawng ang maia kan hman tak, Social Media tih chu internet kaltlanga inkawmkhawma tiin a sawifiah theih mai awm e. India rama social media kan hman larte chu Facebook, Whatsapp, Instagram etc te an ni a, Mizo zingah phei chuan thalai kum 15 chin zingah Facebook account nei lo chu tlem tê chauh kan ni awm e. Zirchianna pakhatin a tarlan dan chuan India ramah hian mi maktaduai 462.1 hi internet hmang thin kan ni a, chu chu ram mipui zawng zawng atanga 34% zet a ni. Chung zinga 61% chuan ni tin internet an hmang a, ni tin mi pakhatin darkar 7 leh minute 25 zel hmang ang kan ni. Internet hmang zinga a zahve aia tam hi social media hmangtu kan ni bawk a ni.

Mi mal zalenna: India Danpui chuan kan duh zawng leh ngaihdan sawi tura dikna chanvo, ‘Freedom of Speech and Expression’ min pe a. He dikna chanvo avang hian kan sawrkar dinglaite pawh kan sawisel thei a, ram kalphungah ngaihdan kan thawh a, kan ram hruaitute dik lohna nia kan hriatte pawh huai takin kan sawi ve thei a, chumi avang chuan kan chungah thubuai hlabuai sawrkarin min siamsak ngawt thei lo. Social Media hmangin mi tin hian mahni inlum leh kan buzawl atangin ram kan vei thu kan aupui a, sualna kan huatzia kan tarlang a, roreltu (judge)-ah kan insiam nghal a, sel leh fak lamah kan tuan a rang hle. India Danpui vek chuan mipuite hi zahawm taka kan nun theihna turin ‘Right to Life’ mi pe bawk a, hemi hnuaiah hian mi dang tihbuai loh leh mahnia zalen leh finriala awm theihna tura dikna chanvo ‘Right to Privacy’ chu India Court sang ber chuan a khung a ni.

Facebook/Whatsapp/Instagram data te hi: Facebook leh social network site danga kan in-sign-in reng rengin keimahni chanchin kimchang te, ka email address te, date of birth te thlengin dah a ngai thin. Tin, heng social media-ah hian kan thian kawm te, kan group awmna te, kan thlalak leh thu post zawng zawng te, hemi site kaltlangah online shopping-a kan luh kualna te leh a hnuaia link games leh applications kan hman zawng zawngte  hi record vek a ni a. Website hrang hranga kan luhna tawh zawng zawngte chu record vek a lo ni tihna a nih chu. Chumi avang chuan tun hnaiah pawh Facebook hmangtu maktaduai 87-te data chu Facebook chuan Cambridge Analytica hnenah a hlan chhawng a, Trump-a pawhin political campaign-ah a hmang tangkai hle tih kan hriat kha.

Keini buaina ve hi: Cambridge Analytica tih vel hi keini tan buaina tham a la tling ve lem lo. Kan buaina ber chu mi thlalak hmanga profile lem lo siam te, mi thlalak an phalna la lem lova lo thehdarhsak te, mi chetchhiatna mi dang hmuh loh atana an duh ngawih ngawih lo pholansak te, mi dang mualphona tura an thlalak leh thu post hmansak leh lak kawihsak te, mi dang huatna avanga dawt leh thu tak chawlhpawlha groupa thil post chiam te, hmelhriat loh hmeichhiat mipatna lam hawia han biak ngawt te a ni deuh ber a. Kan fiamthu duh luatah mi rilru kan hliam fo a, mihringina zahawmna kan neih vete kan intihchhiatsak fo a, mi tahna chu kan hlimpui zawk chang a tam fo thin.
Hremna: Facebook fake profile kan siamna chhan chu mahni profile pangaia kan tih duh loh thil tha lo tih kan duh thin vang a ni fo.  Fake profile siama mi thlalak emaw, mi hminga profile emaw lo siam ve ngawtte hi  a hremna a na thei viau a, IPC Section 468 leh IT Act Section 66D angin kum 7 thleng tan theihna a ni.

Social media hmanga hmeichhiat mipatna hmanpuia mi va sawm emaw, thlalak mawi lo tak tak thawn emaw te, anmahni than mawi loh theihna tura post siam emaw te pawh hi kum tam tak tan theihna a ni a, Mizo zingah pawh hetiang thubuai avanga tang mekte pawh an awm a ni. Mihringin dikna chanvo kan neih zinga pawimawh tak chu kan zahawmna humhim hi a ni a, dawt leh thu dik chiah lo hmanga intihmualpho leh behchhan mumal awm loa an mizia leh eizawnna chungchangah te rin thu sawi vak vakte hian nasa takin mi a timualpho thei a, chungah chuan a tuartuin thubuai an siam duh a nih chuan siam theih a ni tih i hria ang u. Tah hian duhtawk hrih phawt mai ang, a sei lutuk dawn e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?