Social media zirnaah hmang tangkai lo : MZU Research

Aizawl: Mizoram University a zirlaite zinga zirchianna (research) neiah social media chi hrang hrang chu zirna atan an hmang tangkai tawk lo tih hmuhchhuah a ni.

Dr. Lallaisangzuali, Assistant Librarian, Mizoram University in research a neihna atanga a lan danin Mizoram University zirlai 200 hnenah zawhna chhan tur chi hrang hrang sem a niin heng zinga 170 (85%) chu a lo kir a, chung chhanna hrang hrang atanga a lan danin social media chu zirna atana hmang tangkai awm mahse zirna atana pui lo thil danga hmang an tam zawk a ni.

Zirchianna tarlan danin social media zingah whatsapp hmangtu tam berin 20.29% an awm a, a dawttu facebook hmang thin 18.8%, youtube hmang 16.93% leh google hmang 15.19% te chu a sang zual te an ni. Heng social media hmangtu hrang hrang te zingah hian ni tina hmang/khawih chu 82.14% niin 10.11% ten a chang changin an khawih a, 5.95% in kar khat chhungin reilote an khawih thin bawk. Social media an khawih chhan zingah 21.69% chuan thil thlengthar hriat an duh vang a ni a, 20.44% chuan an home work te thiante hrilh nan a ni a, 16.98% te chuan hunawl hnawhkhah nan an hmang/khawih tih an sawi. Social media-in a tha lo (negative) zawnga nghawng a neih dan chungchangah 28.24% chuan thlalak leh thu tangkai lemlo an dawng hnem hle tih an sawi a, 24.35% chuan a zuna uai (addictive) a awl avangin hun a khawhral nasa niin an sawi bawk.

Dr.Lallaisangzuali chuan zirlaiten hun an hman tam ang huin social media an hmang tangkailo niin a sawi a. “Zirlaite zingah mahni zirlai chauh ni lo an hriatna tizau thei lehkhabu tha leh tangkai chhiar peihlo an tam hle a. Tunlaia kan buaipui social media hrang hrang kan hman dan atang hi chuan kan hriatna tizau thei leh zirlai puitu tur lam chi hmuh tur a tlem hle a ni,” a ti.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?