Stacy VL Muanpuii single music video thar “Thlen ka Nghakhlel” tichhuak dawn

Thla hmasa khan a single music video pakhat, tang tha et awt tak mai a release a. October thla tawp a lo her chhuah meuh chuan Stacy VL Muanpuii hian single thar a rawn tichhuak leh dawn ta. Naktuk lamah local channel ah thlir theih tan lo beisei ila.

 

Stacy hla thar tur hi — Thlen ka Nghakhlel — tih a ni. He hla hi tunlaia gospel hla tha leh tunlai rimawi nen pawha herh mil awl theih tak tur eng emaw zat phuah a sa thintu Andrew Laltlankima phuah a ni. A track hi The Prophets guitarist Eric Renza kutchhuak a ni a. Studio lamah Bluewave Records nen bawk an rawn thawkdun leh a ni.

 

‘Thlen Ka Nghakhlel’ tih hla lo pian dan hi a ngaihnawm riau. Stacy sak tur bik pual liau liaua phuah a nih bakah, album hla tur atana Andrew phuah a ni nghe nghe.

 

Nizan kohhran inkhawm ban khan he hla, ‘Thlen Ka Nghakhlel’ tih hi Stacy chhungte leh thian tha mi tlemte nen Pathian hnenah hlanna an nei a ni.

 

Stacy hian a hla bik chungchang sawiin, “Andrew nen hian kan inkawm ve nasa a, eng eng emaw sawiin kan titi nasa ve thei thin hle. He hla pawh hi kan titi-na atanga a phuah chhuah a ni,” a ti a. “He khawvelah hian kan upa tual tual a, thlakhlelh tur kan nei tam lo em em a. Mihringah rinna tam zawk kan nghat fo thin. Chu’ng chuan min tilungngai fo a. Krista erawh chu a pangngai reng tih lam hawi a ni, a hla hi,” tiin a hla chanchin tawi fel takin a sawi a.

 

Andrew hian a album buaipui mek, a la khawrpum theih chiah loh, ‘Lal Chawimawina’ tia title pawh a vuah thlap tawh album pual liau liaua a siamsak a ni. Tawng dang atanga lehlin hla ni lo, hetianga hla phuah thar hlak, a puala a neih vawikhatna a nih bawk avangin Stacy pawh a lawm hle a. Lawmthu a sawi mawlh mawlh mai.

 

‘Lal Chawimawina’ album sawi takah chuan, Stacy hian a gospel album hmasa ber tur hi khawrpum turin hna hautak zual a zo duak tawh a. Tun dinhmunah album tracklist tur pawh la thleng fel chiah lo mah se, dah tur chiangsa eng emaw zat chu a nei tawh tho a. Tunah hian track 10 chuang chu an ti zo tawh a. Bluewave Records studio nena inthlunzawmna nghet tak neiin, Stachy hian a debut album pumpui hi studio zuan hrang hranga zuang lawr zut lem loin, Bluewave Records-ah hian a bur chat a ni.

 

Album tracklist tur zingah hian naktuka a release tawh mai tur, Andrew hla phuah ‘Thlen Ka Nghakhlel’ bakah, TBZ Choir conductor hlui J Vanlalhruaia hla te, Alpha Studio neitu Rinawma leh Music for Christ band hla leh Incarnation band vocalist hlui Lungmuana hla phuah te chu mimal hla phuah a dah tur zing a mi an ni a. Kristian Hlabu chhung ami pawh keuin, fakna hla, Pathian chawimawina hla pui lam pawh a hrut tel dawn a ni.

 

He’ng album tracklist zingah hian, Stacy chuan vocals lam pawh uluk theihtawp chhuah a tum a. Zaithiam tam takin a hlutna leh mawina an hriatpawh tawk loh thin, backing vocals pawh a uluk hle. A zai pui tur hian a BFF ni a, ‘Ka Vuilo Lalpa’ hitmaker ni bawk Nunui Chhangte leh Abe-a, Electric Veng ten a album hla pumpui deuhthawah part an pek sak a ni.

 

Stacy debut album ‘Lal Chawimawina’ tih hi release hun sawi chian theih a la ni lo. Mahse, nakkum min kaipui dawn tih erawh a chiang.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?