Synod Inkhawmpui tan dawn

Synod Inkhawmpui tan dawnAizawl; Mizoram Presbyterian Kohhrana inkhawmpui lian ber, Synod Inkhawmpui Vawi 94-na chu Thawhlehni atang hian Bungkawn Kohhran Biak Inah tan a ni dawn a, kumin inkhawmpui hi Bungkawn Bialin  a thleng a ni.

Synod Inkhawmpui vawi 94-na hian Pathianni zan thleng a awh dawn a. Inkhawmpui tan hma hian committee hrang hrang an thukhawm tawh hlawm a ni.

Thawhlehniah hian Nomination an thu ang a. Nilaini atanga Inrinni thleng ni tin nilengin Rorel Inkhawm a awm thin dawn a, zan lam erawh chu vantlang Pathian Biak inkhawm a ni ang.

Pathianni chawhma inkhawmah Pastor nemngheh leh Pro. Pastor atana lak tharte dahngheh inkhawm neih a ni ang a, chawhnuah Moderator-in Lalpa Zanriah Sacrament a theh chu kilho a ni ang a, zan Pathian Biak Inkhawmah Moderator valedictory sermon ngaihthlak a ni ang.

Kumin Synod Inkhawmpui Thlarau lam thupui hi ‘Kohhran – Pathian Chhungkua’ (Ephesi 2 : 19) tih a ni a, Inrinni zanah Rev. Lalbiaknia, Chaltlang-in a sawi ang.

Synod Inkhawmpui hi kum 2010 atang khan Bialin an thleng tan a, kum 2010-ah hian Dawrpui Pastor Bialin Zarkawt Kohhranah thlengin Biala thleng hmasa ber an ni a. Nikum khan Durtlang Bialin Durtlang Kohhranah an thleng a, kumin hian Bungkawn Bialin an thleng veleh ta a ni.

Synod inkhawmpuia vantlang Pathian biak inkhawm hi Hruaina Eng TV channel-ah live-a en theih a ni ang.

Synod 2017 puipate
Moderator : Rev. F. Lalrinnunga
Secretaries : Rev. Lianhmingthanga Sailo (Sr.) Upa R. Dengzikpuia (Jr.)
Finance Officers : Rev. P.C. Pachhunga Rev. H. Remthanga
Statistician : Upa Dr. H. Vanlalhluna
Executive Secy. : Rev. Lalramliana Pachuau Rev. B. Sangthanga

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?