Synod Moderator-in Praise On hlan

Aizawl;?Synod Information & Publicity Committee-in KTP Branch hrang hrangte puala group zai intihsiakna a buatsaih, Praise On 2017 chu nizan khan Khatla Kohhran Hall-ah Rev. Lalzuithanga, Synod Moderator-in Pathian hnenah a hlan a, intihsiak hi September 26, 2017 atangin tan a ni ang.

Praise On hlanna inkhawm hi Upa V.L.Muanchhana, Secretary, Praise On Organising Committee-in a kaihruai a. Moderator chuan hlanna thuchah sawiin Synfo-in reality show a buatsaih thin chu Kohhran leh ram tan malsawmna a nih thu a sawi a, Synfo rawngbawlna hrang hrangah a tar lang bawk.

Rev. Lalzuithanga chuan, “Mizote hi zai ngaina, lungngaih, hlim leh lawm nia zai thin kan ni a, kan Mizo nun leh zai hi a inzawm tlat a; kan rama lar (hriat hlawh) chak ber berte pawh lehkha thiam leh infiam mite ni lovin, zai mite hi an ni zel,” tiin zai leh Mizo inkungkaih nghetzia a sawi a. “Kan entertainer hlawhtling berte chu zai mite an ni a, rawngbawltute pawhin zai thiam an hruai chuan an tlawh Kohhran an phur phah thin,” a ti.

A sawi zelnaah Synod Moderator chuan, “Chuti taka kan tuipui, zaia hma kan sawn theih nana Synfo-in hma a la hi kan Kohhran, khawtlang leh kan ram tan a hlu a. Kan rama min hiptu dang tam tawh hi Pathian fakna zai hian hneh rawh se,” tiin Pathian ropui nen leh tluang taka intihsiak neih a nih theih nan Pathian hnenah Praise On chu a hlan a ni. He hunah hian Pu R.Lalnuntluanga, Organising Chairman pawhin thu sawiin Praise On chu zai thiam thlan chhuah nan hrim hrima buatsaih an nih loh thu leh thinlung taka Pathian fak duh mi thlan chhuah chu an tum a nih thu a sawi a. A thlengtu, Khatla Kohhran aiawhin an Secretary, Upa C.Ngurthantluanga chuan Praise On an thlen tur atana an inbuatsaih dan hrang hrang a sawi bawk. Praise On hlannaah hian intihsiak endiktu (judge) tur mi pathum puan a ni a. Upa C.Vanlalvuana, Chanmari; Pi Liandingpuii, Mission Vengthlang leh Tv. Lalrinfela, Ramhlun Vengchhak ten an endik dawn a ni.

Tel tur hi group 70 an awm a, September 26 & 27 hian Khatla Kohhran Hall-ah hian audition round neih a ni ang a. He Praise On-a 1-na Rs. 1,00,000; 2-na Rs. 50,000 leh 3-na Rs. 30,000 leh trophy leh certificate an dawng theih ang a. A titha zual group 10 hnenah lawmman hlan a nih dawn bakah Special Prize siam a ni bawk ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?