Takam (Chakma) Infiltrator-teTakam (Chakma) Infiltrator-te- VHL Sailo

1. Thuhma: Khawchhak lam unaute (Myanmar) nena titi phungchang atanga hriat danin TAKAM kan lo tih thin CHAKMA te hi Thailand hmar lam Laos ramri dep lui phai vel ram atanga thlang lo tla ni a hriat a ni a.  Tunhma lam deuh, Zofate thlang kan tlak hma, Mandalay khawpui khi Burma (Myanmar) ram lal “siampahranga” hun lai te pawhin Takam (Chakma) te hi lal vengtu leh Lal ina hnathawkah te pawh an lo chhawr tawh thinin, hun engemaw chinah thlang an rawn tla ta ni a rin a ni. Kan ram chhim tawp lam Arakan kal tlangin East Bengal thlang lam depah inkhuarin tlai khawhnu deuah Chittagong Hill Tracts ah an rawn awm ta a nia rin a ni a.  An mahniin lehkha te engmah an la hriat loh avang leh ziak leh chhiar zir turin Scripture pawh la nei lo an nih avangin Bengali hawrawp (Devanagiri Script) an hmang ve ta mai nia ngaihruat a ni.  An zinga mi engemaw zat chu West Bengal lamah te pawh lutin a then chuan Tripura-ah te pawh an lut bawka hriat a ni. Budha sakhaw zuitu an nihna hian khawchhak lam Thailand or Burma atanga lo chhuk thla an nih ngei pawh ati rinawm phah hle a ni.  Awmhmun nghet nei lo, Nomadic hnam an avangin ‘indegenious people’ nih theihna UNO dan chuan an nei thei hmel lo hle.

2. Kan ram lolut hmasate: Kum 1872-a chhiam lam vailian Brig. General Brownlow a hoten puakphur atan an rawn chhawr Takam (Chakma) te kha Lushai Hills (Mizoram) rawn rap hmasa berte nia hriat an ni.  Mi 500 lai an ni a hriat a ni a, Tlabung (Demagiri) atangin an ni ho hi an kir leh mai nia hriat a ni bawk. Hetianga an rawn kal hian Khawthlangtuipui kam ram vel awmdan te chu hrerengin, kum 1905 atang chuan Samakkaih lui kam velah an rawn lut tan a hriat a ni a.  Helaia Sailo lalte hian chhiah lak nan an khaw ram chhunga awm an lo phal sak a.  Lusei chhungkuain ram chhiah (tax) kum 1-a Rs 2 (cheng hnih) an chawi laiin, anni chuan (Takam-ho) Rs. 5 an chawi thung a, Lal khawchhiar ten Takam te hi khawchhiar bu hrang neiin an chhinchhiah thina hriat a ni.  Tichuan, Takam (Chakma) te hian Khawthlang East Bengal (Bangladesh) ramri hrula lal te chu rawn belin, Laisawral lal ramah te, Phuldungsei lal ramah te leh Pukzing lal ramah te tlem tlem lalin a phalsakte chu an awm thina hriat a ni. Hetianga an awm theihna tur hian Lushai Hills Bawrhsap (Supertintendent) hmasa ber Maj. John Shakespear, IA chuan kum 1894 March ni 21 khan Takam (Chakma) te Lushai Hills chhunga rawn awm ve te awmdan tur (condition) pawh point 8 (riat) lai nei siamin order a chhuah nghe nghe a hriat a ni. Tichuan, Lushai Hills chhimthlang leh khawthlang ramri dep lal te khuaah chuan Tripuri (Tuikuk) leh Takam (Chakma) te chu tlem tlem an awm ve a.  Tuikuk thenkhat, Lushai Hills-a cheng hlen duh te phei chuan Bawrhsap phalna leh an chenna khaw lal phalnain Lushei saphun in an awm nghet hlawm ta nghe nghe a ni. Hetih hunlai thil awmdana kan hriat tur pakhat chu ‘Lushai Hills’ tia ram hming neia siamtu Major Shakespear-a khan Lushai Hills chhunga lal zawng zawngte kha ramri fel takin a then sak vekin, ramri lehkhaa siam sak vek a, he ramri lehkha hi “Shakespear’s System (Permanent) Settlement” tih a ni a, lal zawng zawng hnenah pek vek a ni.  A copy pawh Aizawl Bawrhsap Office-a Record Room-ah India Independent hma kha chuan vawn that a ni thina hriat a ni.  He Bawrhsap hian Lushai Hills Map hmasa ber pawh kum 1898 khan a siam a ni.

3. Mawhphurtu hmasate: Kum 1946-a Political Party lo ding, “Mizo Commoner’s Union” chu a thang chak hle a, India a lo Independent dawn lai te a ni a, Union thli kha Aijal leh Lunglei Sub Division pum puiah a tleh a ni ber a.  Tichuan Assam hnuaiah Lushai Hills mipui te chu min hruai lut ta a.  Kum 1952 April ni 4-a District Council alo din chinah Village Council-te pawh 1954 atanga lo dingin heng lal rama Takam (Chakma) te hi Lusei fate (Mizo) ang maia chhiah Rs. 2/– an chawitir ve tak chinah chuan Tualchhung mi angah an lo inngai ve ta hial a.  Village Council/District Council hotute hian lal te angin a hranin anmahni chhianchhiahna an neih ve pawh hriat a ni lo.  Hemi tichiangtu chu District Council awm hnuah Lushai (Mizo) tawng ni lo, khaw hming eg.- “Kajoysuri, Sumasumi, Borapansari, Bogakhali, Silsuri” tih ang a tawpa ‘suri’, “sora”, ‘hali’, ‘kholi’ hming nei khua Chawngte bialah te, Tlabung bial te leh Marpara velah te a lo awm ta a ni.  Tichuan, Chakmate tana kawng lo hawngtu chu, “Mizo Union” (Assam Pro-Congress) kum 1952 atanga kum 1969 thlenga kan ram roreltute kha an ni kan ti thei ang. Kum 1972-a Union Territory kan nih khan Mizo Union-te hian UT Ministry hmasa ber (1972–1976) chhung kha ro an rel a.  Ni 23 January 1974-ah sorkarna changtu Mizo Union chu Indian National Congress-ah an in merged ta a, Congress Party sorkar kan lo nei ta.

4. Mizoram Congress te khan mawh an phur: District Council hotute hian Sailo lal te angin Takam (Chakma) te hi an hrek zui ve ta lovin, tualchhung mite angin an enzui ve ta mai nia hriat a ni.  Hetih hun chhung hian Takam leh Tuikuk (Tripura-a mi) te hi kan hriatpui lohvin an lo inkal pawhin an insuan kual nasa a, Chhiarpui hmasa ber kum 1901-ah Takam mi 198 lek kha, kum 1951 chhiarpuiah chuan mi 15,297 an lo tling ta hial a.  Kum 50 chhungin kumtin mi 302 in kum 1901 atang khan an pung tihna a ni.  Kum 1966-ah kan ram a lo buai a, Assam sorkarin thingtlang khaw hrang hrangah Administrative Officer (AO) a dahte zingah Ex-Emergency Commissioned Officer (Sipai Officer bang) te engemaw zat an rawn dah zingah Tlabung (Demagiri), Puankhai, Kajoysuri, Bornapansuri, Chawngte tih vel ramri hrulah Bengali AO an dah te avangin nasa takin an lo pung ta a.  Kum 1968 vel atanga Chawngte AO-ah Takam (Chakma) Officer an dah (SP Talukdar) leh Demagiri-a R.Batacharjee te, Bengali unau inawm chhawk chhung, Union Territory kan neih ni 21 January, 1972 inkar laiah khan nasa takin an lo pung ta a ni.  Kum 1970 kum tawp lam ‘Favang’a Demagiri-a District Congress Unit, Mizoram Congress hruaituten an va din atang khan nasa takin Chakma ten hma an la ta nia hriat a ni.  Kristo Mohan Chakma (f/o S.K.Chakma, MCS) kha he District Congress Unit-ah hian President hmasa ber a ni a.  Mizo District chhunga District Congress Unit, Demagiri-a din a ni hi a mak hlein, thil awmphung pangngai a ni lo. Kum 1966 hnu lamah khan Mizo District kha Cachar District nen Administrative Circle Commissioner pakhat hnuaiah kan awm a.  Kum 1970-a Chakma Refugee ho lo luh lai khan Pu S.J.Das IAS (Bengali) kha Commissioner a ni a.  Pu A.C. Ray, IAS (Bengali bawk) kha Deputy Commissioner a ni a.  Hetih hunlai hian Mizo District a ni a.  Autonomous District Council, Aijal Sub-Division leh Lungleh Sub-Division huamin kan nei a, chumi tawp lamah Pawi leh Lakher Regional Council kan nei thung a ni.  Chakma te hi hmun nghet nei lova insuan insuan (Nomadic tribe) thin an nih avangin an vanduai hle.  Chittagong Hill Tracts-a an awmna Kaptai Dam (Kaptai Tuikhuah) chawmtu luikam a awm an nih avangin tuikhuahin a chim phak chin (submerged area) a awm an nih si avangin, a sang tel telin refugee in kan ram chhimthlang ramri atangin an lo lut ta a ni.  Kum 1964-ah leh kum 1970-71 ah khan tam tham takin refugee-in an lo lut a.  Heng Chakma refugee 1964-a lo lut te hi Assam State leh Arunachal lamah thawn an ni a hriat a ni.  Kum 1970-71 a lo lutte erawh chu thawn kir leh an ni nain, tam tak chu dan lovin an lo lut leh a ni.  Hetianga an chenna leh ram anga an lo neih ve ber, tuiin a chim tak siah chuan khawvel leh UNO Headquarters-te hriat khawpin refugee te hi kan ramah an lo lut ta a ni.  Tlabung (Demagiri) hi kum 1870 vel lai atang tawh khan kan rama lo luhna atana hmun pawimawh a lo ni thin a.  Police Station pawh Aijal tih lohah chuan a awmna hmasa a ni a.  Chubakah General Administration lamah pawh kum 1963 lai atang tawh khan Political Assistant and Assistant Deputy Commissioner (PA & ADC) hmun hmasa a ni a, Pu Paul Zakhuma (Paul Z.Hauhnar (L)), Pu R.Zuala (L), AO leh Pu F.Hmingthanga, MCS (Rtd.) te PA & ADC in an lo awm tawh a ni.  Tin, anni bakah hian Pu P.Lungliana (L), MCS (Rtd.), leh Pu Tawnluaia IAS (Rtd.) te pawh Relief Officer in Chakma refugee te avang hian an lo awm tawh bawk thin a, kum 1970 khan Chakma refugee te buaipuiin, hetih laia Lunglei SDO (Civil) Pu V.S.Taffa, IAS kaihhruaina in a sang tel tel Chakma refugee lolut te hi an lo enkawl a ni. Kum1971 January ni 21-a Union Terrutory kan neih khan kan Commissioner Pu S.J.Das, IAS chu Chief Commissioner niin hemi ni atanga Mizo District ni thin “Mizoram” ni taah chuan Administrator hmasa ber a lo ni a.  He Administrator hunlai hian dan leh dun mumal leh chhan pawh awm lovin kan Political Party hruaitute zingah ziaka remtihpuitu an awm avangin Pawi (Lai) leh Lakher (Mara) Autonomous District Council an pek bakah Chakma Autonomous District Council a lo piang ve ta nawlh mai hi a hre pha chin tan chuan thil mak leh rorelna dik lo leh thuneihna dik lo taka hmanna a ni.  Hetih hunlaia Political Party awm chu Mizo Union leh Indian National Congress an ni.

5. MNF ten mawh an phur zual: Hetiang a nih avang hian kum 1978 lai khan Mizoram Peoples Conference Party (hetih hunlai chuan Peoples Conference) a Chief Minister Brig. T.Sailo, AVSM chuan dan lova Chakma Autonomous District Council pek hi Prime Minister of India hnenah Dan lova din anih vangin thiat leh tura ngenna lehkha Memorandum a lo thawn tawh chu hetih laia MNF Peace Emmissary Pu Aichhinga chuan khapna lehkha thawnin lo inrawlh tawh lo tura hriattirna pek anih chinah Chakma lo lut (influx) te hi an hluar leh ta a ni ang. Kan ram hruaitute zingah Congress (INC) leh MNF kum 10 chuang ve ve, kum 1984 -2017 chhunga Chakma te, an vote duh vang ringawt a Mizoram mi leh sa (Indian Citizenship) ni ve ang maia an vulh pung hi a pawi hle mai. Chakma (Takam) te hi dan pangngaia lo lut (Sailo lal ten anmahni ram chhunga chhiah an lo lak nana an chen hawh tir te) Mizo Union rorelna huna khawtual mi anga Zoram chhiah an lo chawi tir tak, kum 1951 hnu lam a mite baka lo lut te kha chu Dan bawhchhia (infiltrators) an ni.  Chakma dan lova lo lut dodal lo Political Party te hian an ngaihtuahna fim hmangin, hnam pawi an lo khawih tawh hi siam that leh dan ngaihtuah se a duhawm hle mai.

6. Thu kharna : Tun dinhmun atan chuan Political Party zawng zawngte leh NGO zawng zawng te hian thukhat vuain (Joint Declaration) Memorandum Brig. T.Sailo in a lo thehluh tawh kha umzui pahin movement thar Chief Minister Office atanga siamin Joint Declaration hi thehluh ni se.  He movement hi Election anih hma ngeia hma lakin awmzia a nei leh zual theih a rinawm. Chakma (Takam) te hi ramdang mi dik tak an nih chu i lo hrechiang ta a, kan rama an lo awm chhoh zel dan pawh i hre chiang ta a.  Dan lova lo awm an nih avngin Danin kan umchhuak ngei ngei tur a ni.  Chief Minister hian Co-ordiantion Committee/Joint Action Committee a rang a ranga ruatin India President/Prime Minister hnenah Memorandum thehluh thuai chi a ni ang. Kum 1951 atanga Census-a Chakma Population:Year Total Population 1951 15,297 1961 19,337 1971 22,393 1981 39,638 1991 54,217 2001 71,283 2011 96,972

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?