Taxation-in chhiah hmu tha, GST hnuah chhiah a pung

Aizawl: Commissioner of Taxes & Registrar, Firms & Societies chuan sawrkar laipuiin Goods & Services Tax (GST) a kalpui hnu April, 2017 atanga February, 2018 chhungin chhiah Rs. nuai 3936,003,415 an hmu a, GST hman hnuah chhiah hmuh a pung tih an sawi.

Zalen palaiin Mizoram Taxation department hotute atanga thu a dawn danin March, 2018 chhunga chhiah lut zat hi peih a la nih chiah loh avangin February thleng hriat theih a ni rih a. GST hman hma April, 2016 atanga March, 2017 chhung khan chhiah tlingkhawm hi Rs. nuai 3,139,053,471 a ni a, a punna hi Rs. nuai 796,949,944 niin GST hman hnuah hian chhiah lakkhawm zat hi nasa takin a pung a ni.

Department hotute chuan chhiah pun nasat chhan chu Integrated Goods & Services Tax (IGST) a tel vang a nih thu an sawi a. IGST hi chhiah pek dan kalphung thar zinga pakhat a ni a. Mizoram atanga state danga thil leiten an thil leina man atanga GST an pek tel zawng zawng chu Central GST hotute hnenah a lut vek a. Hei hi dan thar angin consumer-te awmna state-ah kir leh vek tur a nih thu leh Mizoramah a lo kir leh vek thu department hotute chuan an sawi a ni.

Thudawn danin ram puma GST hman a nih tak avangin Mizoram chhunga Taxation department hnuaia checkgate 4 – Vairengte, Rengtekawn, Zemabawk leh Lengpui Checkgate te chu suspend rih a ni a, hei hi tihtawp ni loin suspend rih lawk a nih thu department hotute chuan an sawi bawk. Department hotute chuan checkgate awm lo mah se tun hnaiah bungrua Rs 50,000 man chin state danga leitute chuan internet kaltlangin e-way bill an file zel a ngai tawh dawn tih an sawi a. Hei hi him tak leh tlang taka harsatna awm loa bungrua a lo thlen theih nan te, IGST dik tak leh kim taka a lo kir leh nan te mipuite tan a tangkai thu an sawi bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?