Thalai tibeidawng tawh lo hram ang u

Mizoram sawrkar chuan tunlai hian police lak runpui bei mekin 400 lai lak tur an ni a. Thalai sing telin an dil a, nimin lam khan written exam an nei zo a, chumia tlingte chu interview hmachhawn leh tur an ni dawn a ni. Hetih lai hian Home Minister chuan hna lak turah tling lo pui intihtlin a awm loh tur thu a lo sawi tawh a, vawi khat mai a sawi tawh lo lehnghal a ni.

Tuna hnalak hi pawl 8 chin tih ni mah se graduate leh post graduate tam takin an dil bawk a. Hei hian thil tam tak a lantir awm e. Hna kan sawi hian sawrkar hna hi hamthatna tam zawk pe thei a nih avangin kan bawh lo thei lo a, kan ngaisang bawk a ni. Mihring kan pung zel a, sawrkar hnain min daih zo seng tawh lo a, ‘hna a vang’ tih tawngkam chu ngaiah kan nei tawh a ni ber a. Tun tuma hna diltu hi an tam hle a, hnathawh tur inchuh a lo ngaih takah chuan lekhathiam kan tihte pawhin pawl 8-in an chhan tur pawh an hreh loh phah niin a lang a. Kan home minister-in a induhsakna uchuak a awm loh tur thu a sawi vang hian dik taka tih a nih beiseiin thalai tam tak hian an dil a ni thei bawk.

Sawrkar hmasa lam khan term tawp dawn lamah tun ang hian home department hnuaiah hna tam tak lak a ni tawh a, khami tuma hnalak khan sawisel a hlawh hle a, party list awmin a tling turte chu tihfel lawk an ni sa tawh nia sawi te a awm a. Rinzawn theih tur tingin physical test a intihtlin te, ngawlvei leh sipaia tling zo lo tur an lut nual niin sawi zui a ni reng a. Chu chuan tihpuitu nei tha ve lo, tling zawk sia inngai thalai rual tam tak lung a tikeh a, hlauhthawnna lo nei sa tawhte chu nasa takin a tibeidawng zual bawk a ni. Tun tum pawh hian hlauthawng chunga intlar, tih that vanga ‘dah law maw’ tih rilru pu an tam ang.

Tun tum police lak tur hi sawi a awm tehchiamin a lang hrih lo a, hna lakah hian induhsakna a awm tawh thin avang erawhin ‘ring lo’ ve hrim hrim erawh an awm a ni. Written test neih dan erawh duhthu a sam lo deuh nia ngaih theih chu a ni. Sang tam tak a rualin open air-ah an hmachhawn a ni a, ven hneh an har a rinawm khawp mai. Lehlamah chuan sing rual semsawma written exam tura han khungkhawmna tur hmun a awm kher lo thei a, awm pawh nise co-ordinate huphurhawm tak tur chu a ni.”

Engpawh nise, thil dangah pawh hleihluak taka induhsakna hi a awm thin avangin hna zawng thalaite rilru tihkhawlohin a awm phah fo tawh thin a. Tun tum police lak turte hi dik takin lak ni ngei sela tih hi kan thupui tur a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?