Thawhlehni atang IET Centenary

Aizawl; Salvation Army (SA) India Eastern Territory (IET) chuan April 26, 2017-a kum 100 an tlin (centenary) chu Thawhlehni atang R Dengthuama Indoor Stadium-ah an lawm dawn a, Pathianni zan thleng hun an hmang ang.

IET-in Centenary an lawm tur chu Territorial Commander Com. Lalngaihawmi chuan ‘Hnehna Ropui’ tia a hming an vuah thu a sawi a. A lawmna hun an hman chhung hian kawng hrang hrangin Pathian fak, chawimawinate leh lawmthu sawina hun hlimawm tak hman an tum thu a sawi.

IET-in Centenary an lawmna turah hian Salvation Army-a khawvel puma an hruaitu lu ber, Gen. Andre Cox leh a nupui, Com. Silvia Cox, Women Ministry-a World President-te leh khawvel ram danga hruaitute an tel dawn a ni.

Centenary lawmnaah hian naupang pual, thalai pual, hmeichhe pual, officer pual leh vantlang inkhawmte buatsaih a ni dawn a, April 28-ah Temple Square-a Centennial Family Store hawn a ni ang.

Salvation Army hi Mizoramah April 26, 1917-ah din a ni a, kum 2016-a inchhiarna ang chuan member 60,799, corps 238, society 146, outpost 19 leh social institution 15 an awm mek a. IET hian Mizoram bakah, Assam, Manipur, Meghalaya, Tripura, Nagaland, Arunachal Pradesh, Sikkim, West Bengal, Nepal leh Bhutan-ahte rawngbawlna an kalpui mek a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?