The Live Show at COCO : Band, zaithiamte leh musician te perform-na karah snacks leh coffee dawm pahin…

An cafe hming chu ka hmu fo mai. Thianho an chawl lai te, a changtupa leh changtunu niawm tak takte’n an chawlh laia eitur an chah niawm tak, an dawhkana inhung tui hmel zet zet Facebook leh Instagram lama an ‘share’ atangin Coco Cafe & Restaurant chu hriat loh theih a ni lo. Mahse, phai lama Hard Rock Cafe te angreng deuha zan lamah hun an buatsaih zauh thin tih erawh ka hriatna a la rei lo a — ka hrereng tawh thung ang.

Caryn Poonte

Caryn Poonte

Nikum chawhnu lam atangin social media kaltlangin — The Live Show At Coco – Coco Cafe & Restaurant — promo ka hmu chho tan a. Tute buatsaih nge tih leh engangin nge show an kalpui tih pawh chuti lutuka ngaihven loin ka lo ‘like’ liam puat thin. A buatsaihtu leh a buaipuitu tute nge an nih pawh ka hriat lem loh ‘The Baybery Sessions’ te ang bawka zaithiam leh musician inkawm khawm thenkhatin musical instrument ‘live’ a an play a show an buatsaih, eng eng emaw dawm paha thlirtu lamin an lo ‘feel’ pui viau ang tho kha a nih ka ring thla ve ngawt a.

Ably

Ably

“Hausa deuh chu ni ila…” tia ka lo suangtuah thin chu a takin ka tawng ang tih ka ngaihtuah pha hauh lo. Nikuma an last show, December thlaa an neih dawn khan, a hun inhriattir leh tura ti chungin Thalai Khawvel chuan sawmna a dawng ve hlauh mai a. Mahse, khami tum khan kan tawiawm ta lo hlauh.

Kum 2017-a chawlhkar hmasa ber, January ni 6-ah ‘The Live Show at Coco’ chu buatsaih an tum leh ta. Tun tum chu he live-show buaipuitu zing ami, thianpa Jeff Ralte chuan sawmna min rawn thawn hlauh mai a. Ani hi Freddy’s Nightmare vocalist, thangthar musician kan neih zinga a tha leh tunlai ber pawl nia ka ngaih, a thianpa EmPy-a nena solo album buatsaih mektu hi a ni. A hnen atanga sawmna dawn chu ngaih pawimawh a hlawh lo thei lo.

The Live Show at Coco — ah ka vawi khat kalna tur a ni. He live show-ah hian promo-a an tarlan angin zan dar 7:30-a tan tur a ni. Show thenkhatte angin ‘hamaradesh standard time’ an hman ve mai ka lo ring deuh a. Mahse, a lo ni hauh lo. Mi pahnih khat chauh pawh awm mah se tan hun tur tihah tan tur a ni tawp!

Mood Station

Mood Station

Zan dar 7:30 a ri ta! A chhung lo lut tur pawn lama intlar an awm pheuh pheuh bawk a, thutna pawh a la awl nual mah se; a buatsaihtu zing ami LR-a (The Scavenger Project vocalist thin) chu a rawn ding chhuak a, “Rawn kal tur chu la awm mah se; a awm ang ang hian kan tan tur a ni. Tan hun tur tihah kan tan chat thin ang,” tih chu thuhmahruaiah neiin, kalkhawmte min lo ‘welcome’ zui nghal a. Live show nei tura an sawm tawh zingah ‘perform’ tur thenkhat an hman theih loh tur thu a puang a; chutih rualin, MIzo zaimi zinga kan la hmelhriat loh hmanga min barakhaih tur thu a sawi zawh hnuah, Snow In July — band chu perform turin a sawm chhuak zui. The Live Show at Coco chu kan hmu tan ta.
January 6, 2017-a The Live Show at Coco hi vawi thum an buatsaihna a ni. Hemi zan hian Ruatfeli (Triau Trackx); Avora Records; Florence; Mood Stattion; Ably; Snow In July; John bakah Sammy te perform tura tih ni mah se; Ruatfeli leh a perform lai hmuh chakawm em em Florence te erawh chuan sawmna an ti hlawhtling thei ta lo.

Perform tura tih, eng emaw harsatna an neih avanga ti hlawhtling thei ta lote hmun ruak chu Caryn Poonte chuan a rawn luah khat a, an ai a awh zo ngei mai. A tira rawn sawi hawngtu LR-a sawi ang ngeiin crowd min barakhaih chiang hle. Ani hi Chandigarh lama khawsa deuh reng thin niin, rimawi lamah pawh hnamdangte lakah a huangtau viau anih hmel a, designer a ni bawk. Chubak chu a chanchin kan hriat theih chhun a la ni. A hre ber tura rin, zai tura sawmtu ber pawhin a zawttu aiin a hre tam vak bik lo. Chutih laiin, Mizorama a rawn chuan chhuah lai changtu — The Live Show at Coco Cafe — chuan an chang fuh thei hlauh chu an vannei teh e! Chu aia vannei zawk chu khami zana kalkhawmte kha kan ni mah zawk.

Snow in July

Snow in July

The Live Show at Coco — hi thianho pali nga velin an huaihawt a ni. Thla khatah vawi khat chauh show neih a ni thin a. Kuminah erawh chuan thla khatah vawi khat aia tam huaihawt an tum niin a buatsaihtu lamin Thalai Khawvel an hrilh a. He live show hi changtlung zawk, huapzau zawk leh tha zawka buatsaih chhoh zel an tum bawk a. Tunah hian a hmun pawhin a dawlzo lo lek lek tan a, kal hma pawh a ngai tan!
Mizoram pawn lama Hard Rock Cafe chanchinte kan hre thin a. Rualawhna khawvelah hun rei tak kan chen hnuin, daifem pan kher ngai loin khawpui chhungah hlim takin, in ‘chitrahar’ pah pawhin rimawi nen hun hlimawm tak him takin kan hmang thei ta. Chutih rual erawh chuan, rui chungin kal duh suh, i tan hmun a awm lo. A chhungah zu pawh beisei suh — savawm erawh talh tur a awm.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?