The Return of SUDDEN MUANGA

KHUHHAWNNA
Sawhthing Milianaire, Tribal Superstar chu a puakruk hnum hlerh hlawrh fual taka pai chung leh, a kekawr tlang arh ve tak chhung lama Burma underpants bekang rawng ha chungin, sa-um leh tuibur rim nam deuh chum chum chung chuan a sakawr Daii chungah rawn chuangin — Hmunkhawhar City — a rawn lut zan zan a; a sakawr no Patea chuan hnung lamah a rawn um dat dat bawk a. Khaw mipuite chuan a khabe duhthawh ve tak te, a hmuihmul sei zen zawn te, a hnar tawk angreng tak te, a pian inkhaithli deuh thik thiak te chu hmuhnawm ti angreng takin an lo thlir hlawm a, mahse eng atan mah a ngai lo; a sawhtling hralhna pawisa a ngah em!

Mary Saloon chu pan ding nghalin, zei fahrana a sakawr atanga a chhuk hnu chuan hawi sang deuh vah chungin, a hnapkhir, vaivut khu-in a bawh deuh lak chu thup tumna nei map lo chuan saloon chhungah chuan a lut ta zan zan a. Duh tawka Mary whiskey a in hnu chuan a ngaih em em, a ‘tawih’ Judy Thiaii rim tur chuan a chhuak leh ta a. Kawng lakah chuan misual tlawngawl Hrangeka leh a kid-te chuan a pawisa ruk sak tumin an lo…

Sudden Muanga comics, Lalsangzuala (Laisaizawks), Churachandpur khawpuia cheng mek buatsaih, Zofa-te rohlu zinga chhiar ngam hi thangthar lehzual tih loh chuan kan hre fur awm e. Television leh Internet-in Mizoram leh Zofa-te chenna hmun hrang hrang a luhchilh hma, kum 1970 chho tawp lam atanga a hnu, kum 1990 tawp lam thlenga min chawk hlimtu pakhat, tun thlenga mi tam tak thinlung luahtu la ni zel thei khawpa Mizo-te “popular culture”-a riahrun changtu hi theihnghilh leh a boral hi kan phal tur a ni lo.

K’u Muanga comics hi chhiar tur vang angreng tawh mahse, tunah hian mi thahnemngaite zarah a movie-in en theih a ni dawn ta.

Hmunkhawhar City movie chu
Leitlang lamin ‘Khawnglung Run’ an rawn ti chhuak a, Aizawl-in ‘Khuanu Samsuih’ an buai ve thung a. Champhai hun a thleng ve ta — Sudden Muanga ‘Hmunkhawhar City’ ah min hruai lut dawn. LSZ comics behchhanin — Sudden Muanga : Hmunkhawhar City — chu movie anga siamin, tunah hian tihchhuah mai theih turin an peih fel tawh a. Tlangzarh hun tur chiang tawh mah se; engtin nge an tlangzarh dawn tih erawh an la sawi thei lo — March ni 28, 2016 khian an ti chhuak dawn tih chauh chu an sawi theih a la ni.

Hmunkhawhar City movie producer B. Rosangzuala (Sangtea) chuan, “A tlangzarh leh kan tihchhuah dan tur hi kan la chiang thei lo. Kan la inrawnkhawm leh phawt ang,” tiin Thalai Khawvel a hrilh.

Foreign-ah an film, Budget
Movie anga Sudden Muanga character kan hmuh hmasakna ber tur ‘Hmunkhawhar City’ hi foreign-ah ngat an film a ni! Burma ram chhunga Bukphir khuaah he movie hi an chang a. Champhai atanga motor-in darkar thum leh a chanve vel tlan a ni a. Kawng chu tha ve pangngai deuh phei se chuan darkar khat chuang awrh chauh an kal ang.
Mizoram chhulchhuak angah he film siamna atana an sum sen ngaihtuah chuan ‘low budget film’ tia sawi theih a ni lo ang. Editing hnathawktu hlawh chu sawi loh, tun dinhmunah cheng nuai thum leh sing nga sen a ni tawh a. Hei bakah hian sing ruk leh sang nga thehchhuahna tur a la awm a. Chumi nen chuan nuai li (4) chuang a ni dawn tih a chiang.
Producer Sangtea chuan, “He film siamna atan hian khawi atang mahin sponsorship ka dawng lo a. Keima mimal pawisa ka seng,” a ti. Bukphir-ah chuan thla khat vel channa hun an hmang a ni.

Minute 15 atangin darkar khat chuangah
K’u Muanga bu keu tawh chuan in hria ang. A bu ang ngau ngau chuan siam dawn se ‘movie’ tia sawi tham a tling miah lo anga — chu chu he film producer chuan a hre chiang a. A bu ang ngau ngau kha chan dawn chuan minute 15 bak daih a ni lo. Sudden Muanga comics neitu Lalsangzuala (Laisaizawks) phalna ngeiin a ‘story’ a phuahbelh niin a sawi.

Sangtea chuan, “Ka phuah belh nual a. A thawnthu laimu ti bo chuang lem loin” tia sawiin, “A thawnthu phuah belhin hna dang thawk miah loin, thla thum inah ka tawm tawp,” a ti a.

He film-ah hian scene 78 a ni dawn a. A rei zawng hi darkar khat leh a chanve thuak a ni ang.

Funny Face, Holy War & Rualrem City
Thangthar zawkte hi kan vannei, Sudden Muanga bu hi chhiar tur vang tawh tak mai a ni a. A bu chhiar pha lo te pawhin rual-u zawkte ‘ka’ atang talin a vir tawka Sudden Muanga bu keu pha a ni ringawt tawh. Mahse, mi thahnemngai fal bikte zarah — Sudden Muanga : Hmunkhawhar City — kan hmu thei dawn a. Hetah mai hian a la tawp dawn lo zui!

Hmuhkhawhar City episode-ah hian Sudden Muanga hi a chawl mai dawn lo. FUNNY FACE-ah min pakai pui nghal dawrh dawn — Laisaizawks phalna ngeiin.

Sudden Muanga fans tan chuan ‘Funny Face’ chungchang hi hriat loh tur a awm lo. Funny Face hi series 1, 2, leh 3 thlengin a awm a. Amaherawhchu, hei hi script khatah khung a ni dawn a. Sudden Muanga movie series-a a pahnihna hi kumin May thla hian tihchhuah hman beisei a ni.

Hrangeka piantharna Funny Face a zawh chiah stage 3-ah K’u Muanga hi kohhran upa atan an thlang tling chhunzawm nghal dawn a. Chuta tangin ‘Holy War’ vel a ni tawh ang.

Sudden Muanga movie series-ah hian Rualrem City pawh min kawhhmuh dawn a. Rualrem City script tur pawh tunah hian buaipui mek a ni. He series bika ‘Bank’ vel tur pawh buaipui fel tawh a ni nghe nghe.

Hmawrbawkna
Sudden Muanga hi a chawrchhuahna LSZ comics kalphunga a fuh hle laiin, ennawm kalphung dang, drama ang zawng te pawhin chan a lo ni tawh a; mipui thinlungah a comics angin a tla na thei tak tak ngai lo. Tuna a movie an tichhuah tur hian K’u Muanga nihna lairil hi “Sudden Muanga hla”, L.T. Muana Khiangte phuah, Zira Hnamte-in thiam taka a lo sak thin ang tlukin rawn phawk thei se duhthusam a ni.

Engpawhnise, tlangval damrei, chuai ngah lo ve tak Hleizuama te; nula duhawm Linda Hermawii leh a pa Pu Darthuama te; K’u Muanga nupui ni ta Tumsangi te; sheriff pahnih — Abraham Chalchhuna leh Pu Kapa te; Zoram tana inhuam em em Tv. Zohmangaiha te; Dr. Hlychho te; a thianpa, mi tih harsa Tv. Lalkhirhvela te; a kid phakar ve tak Darringaia te; Pastor Gospelliana te; zu zuar Pi Dari te; Shabito leh Apache te leh mi chi hrang hrangte’n a hun lai mil zela Zoram khawvel boruak a hlimawm zawnga an rawn tarlang thin kha chhiar nawn leh chak kan kat nukin a rinawm. Tute emaw hian rawn ti nek nek se, “duak” tih tur khawpin Sudden Muanga comics pumpui kha rawn chhuah tha leh thei se tih hi mi tam tak duhthusam a nih hmel e. Sa-um Weekly (Nitin chanchinbu lar ber) te pawh chhiar leh a chakawm alawm le!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?