The Week That Was (August 13, 2017)

Phut
Ni 7.8.2017 (Thawhtanni) a MPC party Office Bearer meeting chuan Economic & Statistic department hnuaia dan lo a Chakma foreigner unau pahnih Birth Certificate pechhuak tu Sura Bindhu Chakma chu a rang thei ang bera a hna atanga ban tura an phut bakah Chakma foreigner unau Birth Certificate pek te pawh a rang thei ang bera Bangladesh a thawn let nghal turin sawrkar an phut.

GST zir
Ni 7.8.2017 (Thawhtanni) khan sumdawngte tan GST leh a kaihhnawih kawng hrang hrang zirchianna chu Taxation Department huaihawtin Synod Conference Centre ah neih a ni.

Press kawm
Ni 7.8.2017 (Thawhtanni) khan BJP Mizoram Pradesh Media Cell chuan Aizawl Press Club ah chanchinbumite an kawm a, Chief Minister Lal Thanhawla’n Kristiante tiduhdahtu a BJP a puh chu thu diklo a ni tiin pawi an tih thu an sawi.

Result chhuak
Mizoram Hindi Prachar Sabha chuan ni 7.8.2017 (Thawhtanni) khan Hindi pawl 10 atanga Hindi BA thleng Board Examination Exam result a tichhuak a, pumpui a lakin pass percentage hi 94.70% a ni.

Hawng
Information & Public Relations Department bultuma Mizo artist pahnih Vanlalhriata leh S.T.Sailo ‘Duet Painting Exhibition’ buatsaih chu ni 7.8.2017 (Thawhtanni) khan Finance Minister Lalsawta’n S&S Art Gallery, Lower Zarkawt-ah a hawng.

Day hmang
Ni 7.8.2017 (Thawhtanni) khan Assembly Annex Conference Hall-ah 3rd National Handloom Day hman a ni a, Commerce & Industries Department changtu Parliamentary Secretary Joseph Lalhimpuia chu khuallian a niin a hmanpui a ni.

Tlangzarh
Ni 8.8.2017 (Thawhlehni) khan Mizoram Legislative Assembly Annexe Conference hall-ah Social Wefare Department(SWD) in mithiam te ruaia damdawi hmansual a nih dan leh ruihhlo ngai te dinhmun zirchianna a siam, “The Baseline Survey on the Extent & Pattern of Drug use in Mizoram” chu Chief Minister Lal Thanhawla’n a tlangzarh. Survey hi ruihhlo ngai leh ruihhlo kaihnawih a lung in tang mi 2633 an kawmna atanga siam a ni.

Meeting
Ni 8.8.2017 (Thawhlehni) khan Mizo Hnam Run-ah Mizo National Youth Front (MNYF) Headquarters Secretariat Meeting neih a ni a, he hun hmanpuitu MNF President Zoramthanga chuan, “Mizote hi hnam thinlung pua lo ding chhuak kan ni a, chuta hnam thinlung champion-puitu chu thalaite an ni,” a ti.

Guv kawm
Mizoram Governor Lt. Gen. Nirbhay Sharma chuan ni 8.8.2017 (Thawhlehni) khan Wing Cdr. Satish Aparajit (Retd), President, Indian Golf Union leh Captain Satish Pathania, Leading Edge Adventures te chu Raj Bhavan-ah kawm an ni bawk a ni.

Enfiah
I&PR Minister Lal Thanzara chuan ni 8.8.2017 (Thawhlehni) khan Bawngkawn atanga Zemabawk panna kawng siam that mek chu a hmunah kalin a enfiah.

Heroin man
Central YMA hnuaia ruihlo do pawl Supply Reduction Service te chuan ni 8.8.2017 (Thawhlehni) zan khan Bawngkawn Police Station thlangah Zokhawthar Sumo atangin ruihlo heroin hawng 11 leh a kengtu Thankhuma (46) Zokhawthar an man. Ruihhlo hi tualchhung hralhna rate ang chuan Rs. 495,000 hu a ni.

Sawiho
Ruihtheih thil hmangsualtute mumal taka enkawl an nih theihnana a enkawlna hmunin a mamawhte leh tul pawimawh dang engengemaw awmte ni 9.8.2017 (Nilaini) khan Aijal Club-ah Social Welfare Department bultumin sawihona neih a ni.

Day hmang
Ni 9.8.2017 (Nilaini) khan LPS Auditorium-ah ZORO buatsaihin International Day of the World’s Indigenous Peoples hman a ni a, Central YMA President Lalbiakzuala chu khuallian a ni a, thu sawiin ‘CYMA chuan englai mahin kan rama Chakma te hi indigeneous ah a pawm ngai dawn lo a ni’ a ti .

Campaign tum
Ni 9.8.2017 (Nilaini) a MNF Party thuneitu sang thukhawm chuan Aizawl khawpui hmun hrang hrangah sawrkar an duhkhawp lohna leh thil dik tawklo tam tak awm nia an hriat te mipui hma a puanzarna, Furpui Campaign neih nise an ti.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?