The Week That Was (August 13, 2017)

Siam tha
General Administration Department chuan Peace Accord Review Committee chu siamthain Chairmanah Lalthanhawla Chief Minister, Vice-Chairman ah R.Lalzirliana Home Minister, Member Secretary-ah Lalrinmawia Ralte te bakah member mi 7 an ruat thar.

Kawngzawh
Ni 31.7.2017 (Thawhtanni) khan Saitual District tih puitlin ngiat nan Saitual mipui ten kawng an zawh a, August ni 12,2017 thleng sawrkar an ngaichang dawn niin an sawi.

Boxer chawimawi
Ni 31.7.2017 (Thawhtanni) khan Sports and Youth Services Minister Zodintluanga pisa-ah 21st International Boxing Simon Trestin Memorial Tournament, Odessa, Ukraine-a neih taka 52kgs category inelna a Gold Medal latu boxer Laldinmawia, Tuipui khua chawimawina hun hman a ni.

Hmanpui
Government Kolasib College chuan ni 31.7.2017 (Thawhtanni) khan Parish Hall, Venglai Kolasib-ah Freshers’ Social hun an hmang a, R. Romawia, Higher & Technical Education Minister chuan khuallian niin a hmanpui.

Inkawm
Ni 31.7.2017 (Thawhtanni) khan Aizawl Superintendent of Police thar Neihchungnunga IPS chuan a office ah Press mite kawmin thawhopui ah a sawm a, tunlaiin rukruk a hluar nia sawiin mipuite chu fimkhur turin a chah.

Inkhawmpui
Mizoram chhunga kutthemthiam thil hrang hrang thawka eizawngtute intelkhawmna pawl, Mizoram Mistiri Association (MMA) chuan ni 1.8.2017 (Thawhlehni) khan Chanmari YMA Hall-ah an pawl din champha vawi 10-na lawmin Chief Minister Lal Thanhawla hovin hun an hmang.

Bun dawn
Bharat Sanchar Nigam Ltd. (BSNL) general maneger VK Mahuli chuan ni 31.7.2017 (Thawhtanni) khan Press mite kawmin Aizawl khawpui ah mobile station thar 9 din tum a nih thu leh wifi hotspot hmun 19 ah din tum a ni tih a sawi.
CHC din tum
ZNP President Lalduhoma chuan ni 31.7.2017 (Thawhtanni) khan an party office ah thu sawiin, “Kan sawrkar hun chuan Community Healing Centre changtlung tak kan din dawn a ni,” a ti.

Inkawm
Ni 1.8.2017 (Thawhlehni) khan PWD Engineer-in-Chief (E-in-C) Committee Room ah PWD hotute leh I&PR Department hotute an inkawm a, fur ruahtuiin Mizoram chhung hmun hrang hranga harsatna a thlen chungchang leh mipuite hnena kan hmasawnna ruhrel hrang hrangte awmze nei zawk a zirtirna pek dan tur an sawiho.

Tlangzarh
PRISM chuan ni 1.8.2017 (Thawhlehni) khan Mizoram State Guest House, Aizawl-ah ‘PRISM MLA Election Manifesto, 2018’ chu an President Vanlalruata’n a tlangzarh.

ZNP-in duh
ZNP President Pu Lalduhoma chuan ni 1.8.2017 (Thawhlehni) khan a office ah Press mite a kawm a, Citizenship Amendment Bill chungchang leh hnam issue hrang hrangah ngaihdan thuhmun neia hmalak a tul thu a sawi.

Sawiho
Chief Minister Lal Thanhawla leh sawrkar mi pawimawh ten ni 2.8.2017 (Nilaini) khan Chief Minister’s Office Cabinet Room-ah Autonomous Districts Council(ADC) 3 te inrelbawlna chungchanga ennawn ngai lai te leh Minority chungchanga thil pawimawh te an sawiho.

Lung phum
Mizoram Upa Pawl (MUP) Zarkawt Unit Building thar sak tur lungphum chu ni 1.8.2017 (Thawhlehni) zing khan Information and Public Relations (I&PR) Minister Lal Thanzara, bialtu MLA ni bawk chuan a phum.

Kût 2 rawt
Ni 2.8.2017 (Nilaini) a Kut Review Committee thukhawm chuan Mizoram a Kut chi hrang hrang awm thin chu Kut chi 2 chauh awm tawh turin an rawt.

Phal lo
Mizoram sawrkarin CAG report chhuichiang tura High court Judge tanglai ruat a tum chungchang chu ni 2.8.2017 (Nilaini) khan sawifiahin Assembly Deputy Speaker R.Lalrinawma chuan, “CAG report hi House property anih tawh avangin a hranpaa sawrkarin chhui a tum hi kan phal lo a ni,” a ti.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?