Thil 3 – Smart City, GST & Remna Ni, Smart City-ah Aizawl a tel ve

Zirtawpni khan M Venkaiah Naidu, Urban Development Minister chuan a hmaa lo puan tawh sa bak smart city 30 dang a puan belh leh a, chung zingah chuan Aizawl pawh a tel ve hlauh mai a, a lawmawm hle a ni. Prime minister Modi-a hian India ram chhung hmun hrang hranga khawpui thlan chhuah 100 te thuam that a, tihchangkanna tur ‘Smart City Mission/Vision’ a lo puang tawh a. Smart city a tel tum hian khawpui hrang hrangte tehfung hrang hrang hmangin an inel a. Tun tuma smart city 30 puan thar zingah hian hmarchhak bial atangin Aizawl bakah Gangtok a tel ve nghe nghe.

A hma hian smart city a puan khawpui 60 an lo awm tawh a, tuna puan tharte nen khawpui thlan bik hi 90 an tling ta a, 10 puan tur a la awm a, chuta tel tum a inel zingah chuan hmarchhak atangin Itanagar, imphal leh Shillong te an tel bawk. Sorkar laipui sum hmanga khawpui 100 thuam that leh tihchangkan tur zinga Aizawl thlan a ni hi thil lawmawm tak a ni a, inelna hmanga thlan zinga a tel hi a ropui khawp mai. Mahse, inelna tehfung chauh hmanga thlan erawh an ni kher lo tih a hriat, politics thil vanga thlan te leh hnawlte an awm niin a lang.

Smart city thlan chhuah zinga Aizawla tel ve theihna atan hian khawpui enkawlna lama mawhphurtu UD&PA te, a changtu minister-te fak an phu khawp mai. Cheng vaibelchhe 500, sorkar laipui atangin dawn a ni anga, chumi hmang chuan Aizawl khawpui chei that a, thuam that a, tihchangkan a ni dawn a ni. Department lamin ruahmanna an thehluh zingah chuan Aizawl khawpui chep lutuk tihthawlna tur kawng hrang hrang te, lirthei dahna tur (Multi-level parking) te, Trauma Centre (Rikrum thila enkawlna damdawi in) dinna tur te leh a dang te a tel a. Hmalatute an fakawm hle a, an hmalaknaa zarah cheng vaibelchhe 500 hmang hian Aizawl hmel a danglamin, a changkang (Smart) sawt turah ngai ila, a tha ang e.

GST kar tawp atangin: Tunkar tawp hian thla a thar dawn a, Inrinni (July 1) atangin India ramin chhiah lak dan thar Goods & Services Tax (GST) a hmang tan dawn a, sorkar laipui a inpeih tawh a, state sorkarte pawh an inpuahchah nasa hle a ni. Nikum lamah khan GST awmzia leh a kalphung hi kan lo ziak tawh a, tun tumah hian a behbawm thil thenkhat ziak leh ila a tha ang e. Sorkar laipui leh state sorkarin chhiah (Indirect tax) an khawn hrang hrangte a tawp vek anga, GST hian a thlak dawn a ni. Chumi awmzia chu Indirect Tax hrang hrang sorkar laipui leh state sorkarin sumdawngte hnena a khawn (CENVAT & VAT) te, sorkar laipuiin ram chhunga thilsiam chhuah atanga a khawn (Excise duty) te, chung thilsiam chhuah hmanna lam atanga chhiah lak te, ram pawn atanga lak luh thilte hi GST ah khung vek a ni tawh dawn a, chhiah khawn dan pawh a dang tawh dawn bawk.
He chhiah thar (GST) thatna langsar tak an sawi chu thilsiam chhuah (bungrua, thawmhnaw, etc.) atang te hian chhiah (VAT) hi chawi nawn chawi nawn thin a ni a, a siam chhuaktuin a pe a, a hlawm a latuten (warehouse/wholesaler) an pe leh a, dawra zuartuten an pe leh a. Chhiah pek chhawng zel hi thil manah chhiar tel a ni a, a man a to phah a, a tawpa tuartu ber chu a leitu a ni. Chutianga chhiah pek nawn tlut tlut chu GST ah hian a bo tawh anga, an lo pek nawn tawhte kha a rulh leh theih dawn a, thil man pawh a tlawm phah tura ngaih a ni.

Hmannia GST Council-ah khan chhiah bi (tax rate) hrang hrang an siam fel a, GST hman a nih huna harsatna awm thei tur te sut kianna tur an ngaihtuah a, mipui nawlpuiin an mamawh thil hrang hrang man a to phah lohna turin ruahmanna pawh an siam a.
State sorkar pawh a inpuahchah mek a, chhiah thar lak hunah hian kan buai phah lo turah ngai ila. Chutih rualin sumdawngte tan chuan thil buaithlak eng eng emaw a awm belh dawn tih a chiang a, dawr te deuhte pawh an inpuahchah lawk a ngai dawn a ni. Kan ramah hian thil man to chungchangah hian dawrkaite hi dem an awl khawp mai, kan thenawm state aia thil an zuar to bik lutuk te, chhiah tihtlem chang pawha thil man a tlahniam ngai lo te, MRP aia sanga thil thenkhat an zuar thin te hi thuneituten ngaihven thin se a tha khawp ang. GST hman tan hunah pawh hian hmun danga thil man leh helaia thil man a inthlau lo turah ngai ila, chhiah lak tihtlem a nih chuan a man a tlawm ve turah ngai ila.

Remna Ni a lo thleng leh dawn ta: Rambuai lai khan remna leh muanna dilin kohhranho an tawngtai thin a, zirlai rualten nasa takin hma an la a, political party-ten auhla atan an hmang a, mipui pawhin 1984 khan remna leh muanna thlen thei tur bera an ngaih an thlang tling a. Mahse, politics thil mak deuh deuh a thleng thin a, remna a thlen a beiseiawm deuh a, a hnuah a beiseiawm lo leh a, politician-te an inpuh kual vel karah mipui an hmanhmawh tial tial a, zirlai rualten an nawr na zel bawk a. MLA inthlan atanga kum hnihna 1986 June 30 khan MNF leh India sorkarin Inremna Thuthlung chu an ziak ta nge nge a, kum 20 chhung zet rambuai chu a lo tawp ta.

Remna leh muanna a thlen theihna tura thawhhlawk bera insawite hian anmahni an inhmuh dan an sawi a ni a, dawt sawia puh chi an ni lo ang. Politician-te thusawi hi chu chik taka ngaihtuah zui phawt loh chuan pawm nghak ngawt a fuh lo thin. Dik tak chuan rambuai kha mipuiin an ning tawh em a, chuvangin remna thlen thei tura insawi leh hmala ngei tur intiam ngamte kha an thlang a ni ber a. An thlan tlinten mipuia an intiamna ang an tihhlawhtling ve thung a nih chuan an inrul tawk chiah tihna a ni ang. Remna a thlenna tura beitu hi an tam hle a, rambuai tirh atanga hmala nghal te an awm a, kohhran hruaitute, zirlai pawl hruaitute, politician-te zingah sum leh hun tam tak senga beitu, tha leh zung nasa taka seng an awm nual mai. Chuvangin, mimala thawhhlawk bika insawi ai chuan hnam pum thawh rah angin sawi ni zawk se, pawm a nuam ber ang.

Engpawhnise, kum 20 chhung rambuaia kan awm chhan kha India sorkarin Mizote min awp dan leh min enkawl danah thalai rualte an lungawi lo a, pi leh pu atanga awp beh ni ngai lo hnam kan nih avangin kan hnam chanvo Zalenna sual chhuak turin huaisen takin an bei a ni a. Chuvangin, mahni hnam zalenna tura beitute hi (an hlawhtling emaw hlawhtling lo emaw) tute mahin an hmusit ngai lo a, an chawimawh zawk thin. Hnam pasalthate hmusit leh diriam chingte hi Mizo an nih pawhin thinlung lamah hnam hmelma rilru pu an ni tal ang. Hnam dang history-ah pawh zalenna sualtute an hlawhtling vek bik lo a, hlawhtlin beiseiawm miah loa huaisen taka sualtute hlei hlei hian ngaihsan an hlawh thin. India-in a awp hnam hrang hrang zingah hian hian mahni chanvo (zalenna) sual ngam hi tlem te an ni a, chung zingah chuan Mizote kan tel hi inchhuanna tham a ni a, hnam dangte pawhin min ngaihsan phah viau zawk.

Mipui duh dana Remna a lo thleng leh thei kha thil lawmawm tak a ni a, Pathian hnathawh liau liau a ni. Chuvangin, Remna Ni champha lo thleng turah pawh hian politics thila inchirhtheh a, na tak taka inbeih nan hmang loin, Mizo mipui tanrualna vanga remna lo thleng a ni tih te hre thar ila. Thangkhat lian zet rambuai hnua remna leh muanna hlut zia te, zalenna sual vanga hnam hmangaihna thinlung kan put phah zia te, hnam pasalthate inpekna ropui zia te ngaihtuah thar ila. Remna vawng nung zel tur leh hnam hmangaihna thinlung pu thar zel turin inpe thar bawk ila a tha awm e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?