Thlirna: Mizo Hnam Movement History

Lehkhabu ziak ve ngai ka ni lo va, Article erawh chu ka ziak ve zeuh zeuh a. Lehkha chhiar erawh ka peih ve khawp mai. Zoramthanga lehkhabu ziak, Mizo Hnam Movement History hi vawi hnih vel ka chhiar chhuak a. Mizo National Front lo pian chhuah nachhan tlangpui a rawn tarlang a, khatah khan kei pawhin duhthawh thua ka lo vei ziak loh a nei a.

Indopui II-na thlen dawn, 1941 August-a US President Franklin D.Roosevelt leh British Prime Minister Winston Churchill ten Atlantic Charter an ziah zulzuia British leh a thurualpui sipai Allied Force te dopui ve ramte duhthlan theihna (Self-determination) siam sak an nih tur angin Mizo Lalte chuan Allied Force zawm vein Mizo tlangval thi leh hliam pawh eng emaw zat an awm ve a ni. Kum 1960-ah chuan UNO member ramte an mahni awp ramte chhuah zalenna (Decolonization) a puang a. He thu hi Laldenga te khan hriain UNO beng an thlen ve theihna a nih ringin leh Mizoram chu dik lo taka India hnuaia awp kan ni tih thlangau turin Mizo National Front (MNF) din chhan pakhat a nihna a telh lo va.

Zoramthanga’n MNF din a nih dan a  ziak, Mizoramin Mautam tampui mitthi kan tuarna avanga Tam do pawl, Mizo National Famine Front atanga Mizo National Front (MNF) hi rawn indin a ni tia ziak chu, PC Lawmkunga chuan Mizo National Front chu Mizo Famine Front-in a hrin chhuah nia sawi a ni ber a, chu chiah chu he lehkhabu ziaktu Zoramthanga pawh hian a rawn sawi nawn leh a, chu pawl hmingah chuan National tih a rawn belh a, chu pawlah chuan hruaitute chu R. Dengthuama leh JF. Laldailova te an ni a. Laldenga khan nihna a nei ve lo tiin a rawn ziak a. A. Thanglura ziak ‘Mizoram Politic Inlumlet Dan’ page 190-naah khan “Kum 1961 October ni 24 khan Pu Laldenga leh Pu R. Vanlawma te kaihruaiin Mizo National Famine Front (MNFF) kha Political Party-ah rawn letin, Mizo National Front an rawn din ta nge nge a,” tiin a ziak a. Mizo National Famine Front leh Mizo Famine Front hi pawl hran hruaitu hran an awm a ni mai em?

LL. Peters Superintendent of Lushai Hills hova Lal leh mi chhia (Commoner), sipai bâng aiawh te, sawrkar hnathawk, Kohhran leh Pastor aiawhte mi 50, August 14, 1947-a kalkhawmten point pathum an passed zinga a tawp ber, “Kum sawm a ral chinah chuan an duh hun hunah India ram atangin Lushai-ho an inlak chhuah phalsak an ni tur a ni (That the Lushai will be allowed to opt out of the India, when they wish to do so, subject to a minimum of ten years)” tia Assam Governor hnena an thehluh hi PC Lawmkunga chuan Zoramthanga chuan hei hi Assam Governor-in chhantlakah a ngai lova thup bo mai mai ni awmin a sawi a. Mahse a ni chiah em? Hetah hian hranghlui kal ta R. Thanhlira lehkhabu, ‘Mizoram leh Kei’ phek 219 hi i lo pun teh ang. R. Thanhlira chuan Governor-in 2 September  1947-a a rawn chhannaah chuan “Lushai Hills chu  Excluded Area niin a Assam ramah lo awm tawh sa an ni a. India an chhuahsanna tur dan a awm lo,’ a rawn ti hmiah mai a ni,” tiin a ziak a. Governor-in a rawn chhanna hi vantlangah tlangzarh a ni lo niin a lang a. A rawn chhang lo anga ngaih theih tak tur a ni. Mizo Union District Council hotute khan an hupbet niin a lang a. Engvanga hupbet nge an nih hriat a ni lo. PC Lawmkunga ziak Governor rawn chhanna tia PC Lawmkunga ziak, “Lushai Hill chu Excluded Area niin, Assam ramah an awm tawh sa a ni a, India a chhuahsan tur dan a awm lo,” tih hi tan chhan tling lo niin a lang a ni. “Excluded Area” chu “Huam tel loh” tihna a ni a. Mizo Lalten Indopui II-na Allied Force an zawm dawn khan, India emaw Assam sawrkar emaw khan an aiawhin thutiam an la thei lo va, ram hrang daih, British Foreign Department-in direct-a a awp a ni a. Union Jack, British hnam puanzar kal hualin Allied Force zawm turin Mizo Lal leh Upa 300 rualten chhia an chham a ngai a ni. A chhan chu British India-a telh ve loh/huam tel loh ram hrang daih an ni.

A kawma a bu hming hi chu, a ziaktu thuneihna liau liau a ni. Author Previlege a ni veah dah theihah ngai ila. PC. Thanliana hming hi ti lo hian Thanliana Pachuau tih zawk awm alawm tih ang vel a ni. “A history of Mizo Nationalism Movement” tih hi a saptawng chheh dik leh dik loh lam chu sawi ta lo ila. “Mizo National Front Independence Movement” kha India chuan “Insurgent Movement” an ti a, Laldenga leh a thawhpuite chuan Mizo Nationalism Movement an ti a ni. Zoramthanga hian MNF underground chet velna leh an hmalakna leh thiltawn hrang hrang a ziak hi. Mizo National Front Movement kha Insurgency tinge kan niha, Mizo Nationalism Movement titu tihah a ingnhat ang.

Nation tih leh National tih thuah pawh hian ngaihdan a inpersan thei hle awm e. Nation/National chu ram hrang, mahnia ro inrelna hran nei, independent ramte hi Nation/National tia invuah theite chu an ni. India Constitution hnuaia remna siama intulut tawhte hi Nation an ni thei dawn em ni? PC. Lawmkunga’n tih lam hawiin a ziak a. (Memorandum of Settlement)-ah khan Bung 3 (b)-ah khan, “MNF Party-in an pawl kaihhruaina dante chu Dan pangngai kalphung nena inmil turin a siam danglam nghal ang (The MNF Party will take immediate stepes to amend the Articles of Association so as to make them conform to the provisions of law),” tiin dah a ni a. National tih party hminga telh an ngaimawhna lam engmah India sawrkar hian an sawi lo.

Zoramthanga lehkhabu ziak, Mizo Hnam Movement History (A history of Mizo Nationalism Movement) hi copies 10,000 (Singkhat) a chhut a ni a, thla hnih chhunga hralh zawh a ni a, copies 5,000-in chhut leh a ni a. Mizoram lehkhabu chhuak tawhah chuan Bible leh Kohran Sunday School zirlaibu etc. tih lovah chuan hralh tam ber a ni ang.

Thuhmahruaia, “Mizoram College-a zir turin….,” tih PC. Lawmkunga ka hre thiam lo a tih hi, pa pakhat khirh ve tak hian “Rall ehlam ti suh, he lam ral tih tur,” a tih ang deuh niin a lang. Mizoram University-in Mizoram College te, Mizoram buai chhung leh Inremna Thuthlung zir tura tia Subject-a a telh tak avanga he lehkhabu hi ziak a nih thu a sawina niin a lang a, ngaih kawih tur awmin a lang lo.

Hetihlai hian PC. Lawmkunga’n Zoramthanga lehkhabu ziak a rawn chikin a ngaihdan a fel tawk lo laite a rawn thurchhuak peih hi a fakawm ngawt mai. Mihringte hi famkim lo kan nihzia hei hian a tichiang hle a. He lehkhabu pawh hian chhiartu a neih belh phah hlein a rinawm a ni. Mizo zinga pa chhuanawm, zirna kawng leh sawrkar hnaah pawh a vawrtawp thleng pha ngat, PC. Lawmkunga te angin chipchiar taka a rawn chhiar chhuak dapa, uluk taka a zir zui peih hi thilti mai mai chi a nih lohzia a tilang chiang hle a. Amahin a ziak angin lehkhabu chhiar thin zingah hian a tam ber hi chuan chhiar liam puat a, kha lehkhabu khan eng nge a tum, eng nge zirtir a tum tih lam ngaihtuah lem lo, a ngaihnawm em tia chhiar thin hi a tam zawk kan ni awm e.

Ani hi chu chutiang mi ni lo, uluk taka chika, he lehkhabu hian eng nge a tum, a thuziak literature eng ang quality nge a nih. A thumal hman leh a sentence chheh dan a dik em tih thlengin a zirin a chik peih hi pa namailo tak a nihzia a tichiang hle a ni.

Zoramthanga lehkhabu ziak, Mizo Hnam Movement History (A history of Mizo Nationalism Movement) hi Mizote tan chuan chhiar ngei chi a niin, Mizoramin kan pi leh pu atanga kan hun tawng kan hriat theih china thil thleng danglam, a ropui titu tan ropui tak, a rapthlak titu tan rapthlak tham thil thlenna a ni a. Mizo hnam hi a awm reng a, hnam hmasawn tak a lo nih ve theihna tur atana kawng tha ber nia an hriat tihlawhtling tura mahni nunna pawh hlana Mizoram leh hnam tana beihna thu a ni a. Mizo thangthar lo awm zel turte pawhin an la rawn hlut deuh deuh zel a rinawm. A ziaktu, Zoramthanga ngei pawh hi Mizoram leh hnam tana kawng dik leh tha ber nia a hriat hlen chhuak tura beitute zinga hruaitu pawimawh tak, tuarna chhiar sen loh lo tuar tawhtu a ni. A lehkhabu ziak hi ama tawn ngei, mit leh benga a hriatte a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?