Tinreng feature : Zak lo e, chhung- kua ka chawm zawk alawm

Thalai lehkhathiam hna hmu lote an mut bawrh bawrh laiin khawvar hma atangin hnathawk turin an chhuak a, zing ni chhuah rual atangin zan khawthim thlengin bazar lun lai takah bungraw rit tak tak phurin ruahpui van awn sur lai pawn chawlh tih reng an nei lo. An thawhrim rah erawh an tel a, thalai tam tak ten hnatawh tur avang an tihna ramah hian chhungkaw chawmna tham thla tin sum an la lut thung.
Aizawl khawpui chhunga mutia hnathawkte hi hnam dang, state dang atanga rawn kal an tam ber a, tun hnu ah erawh chuan khaw chhak lama Zo hnahthlak unaute leh hnathawh hreh nei lo thingtlang lam atanga khawpui rawn belte hmuh tur an awm ve ta nual a ni.
Mutia te hian ni khatah chawhrualin Rs. 300-400 inkarte an hlawh chhuak tlangpui thin a,fur lai emaw hna tam loh ni erawh chuan Rs. 100 chauh hlawh chhuah nite pawh an nei thin thung. Thla khatah Rs. 6,000 aia tam lak luh changte pawh an nei thin a. Mahni hrawk an chawm bakah chhungkaw chawm nan an hmang a, hnam dang mutia te chuan an chhungte thla tin Rs.2000-3000 bawr vel an thawn thin thu Zalen an hrilh.
Bihar atanga rawn kal Vijendra chuan mimal dawra regular mutia nih chu a hlawk loh zawk thu Zalen palai a hrilh a, “A remchang apiang chhawr theih tura Sumo stand vela awm chu a hlawk zawk,” a ti a. Hardware dawr bungraw lo thleng te chu mi 6 velin an in thiar tawm thin thu Vijendra chuan Zalen palai a hrilh.
Aizawl khawpui chhunga mutia hna thawk hnamdang then khat chu kum 30 dawn Mizorama awm tawhte an ni hlawm a, an hnathawh chu hnualsuat a hnekin hna dang thawhsan an tum lem lo. Nizam Uddin, kum 30 chuang Mizorama awm tawh chuan a hnathawh hmangin nupui fanau a chawm thu sawiin, thla tin Rs. 1000-2000 inkar dakin kaltlangin a thawn thin thu a sawi a. Mutia rate a to chhoh hnu chuan he hna a thawh tan tirh lai aiin a chhungte pawh sum a thawn hnem deuh tawh thu Zalen a hrilh.
Mizoram khawchhak thingtlang khaw pakhat atanga rawn kal Mawia chuan College kal chunga Mutia hna a thawh thin thu Zalen a hrilh a, “Ka zirna senso, in luah man leh mahni hrawk chawmna bakah ka chhungte pawisa thawn tur thawh chhuah chang pawh ka nei thin,” a ti a. Mutia hna chu hnamdang thawh tur ngawta ngaihna awm thin chu pawi a tih thu sawiin, mutia a nih avanga deusawhna erawh a tawn fo thin thu Zalen palai a hrilh a. Mawia chuan lehkha thiam hna thawh tur hriat loh aia chuan hna hnuaihnung zawk nia ngaih pawh a thawh hreh loh thu a sawi.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?