Tithate chawimawi

HSLC result chu tunhnai mai khan tih chhuah a ni a, MZP chuan a ti tha zualte chawimawina hun a hmang a, School Education Minister H. Rohluna’n a hmanpui a ni.

Hetiang tho hian sports a ti tha mi 173 hnenah Sports Minister Zodintluanga chuan cash incentive a sem bawk a, thalaite chu sports hmangin ram hming tithatu an nih theih thu a sawi bawk a ni.

HSLC result hi kum 5 chhunga a that ber tum a ni a, nikum aiin 4.48% laiin hma a sawn a, 76.65% lai an inhlangkai thei a, a lawmawm hle mai. Thenkhat chuan internal marking-ah sikul in thu an neih avangin result hi that phah niin an sawi a, mahse result ah hmasawnna kan nei hrim hrim hrim hi thil lawmawmah ngaih tur a ni ang. Sports lamah Mizoram kan hmingtha chho zel a, football-ah phei chuan India ramah Mizo tlangvalte tel lo chuan inkhel a kal hleithei tawh lo hial a ni a, tuna cash incentive award hian discipline dangah pawh infiamite tan phur leh zualna thlen sela. Kan bei tak tak a nih chuan thil tam tak kan ti thei a ni tih min hriatchian tirtu ni thei se a tha ngawt ang.

Zirlai pawl bakah pawl thenkhatte pawhin zirlai a hlawhtlingte hi chawimawi kan ching chho tan a, inchawhphur nan a tha khawp mai a, chumi bakah ngaihsan tur dik tak ngaihsan inzirtirna a nih avangin tun aia uar hian kan ching zel tur niin a lang a ni. Tuna Mizoramin a buaipui pakhat nia lang chu ziak leh chhiar thiam tam si; mahse, thiamna nei tak tak si lo hi a nih a rinawm a. Pawl 11 leh 12 zirzo fumfe mang lo, lehkha zir phurna emaw, a pawimawhna emaw hre pha lo tam tak kan nei mek a, eng hna pawh thawk dawn ila, eng emaw chen lehkha thiam ngaihna khawvelah kan awm mek a ni si a. Hetiang mi hi kan pung zel a nih chuan eizawnna lamah kan harsatna kan nei tam tial tial anga, a nghawng chhia pawh hmuh tur a tam anga, sualna a tam mai ni lovin a sang zawngin a kal thei a ni.

Pianphunga rualbanlo sikul leh college exam paltlang an awm thin bawk a, mi pangngai exam anga paltlang an nih avangin an hmachhawn hi thil nep lo tak a ni a, heng mite hi chawi larin chawimawi lehzual ila mi dang cho nan hman theih an ni bawk ang.

Zirlaite hlawhtling chawimawi kawngah hian tun aiin kan mi hausate hi inhawng lehzual se a duhawm hle mai. Thil lian tham huaihawt a ni fo thin a, chumia tam taka an inphalnate a lawmawm tak meuh a. Zirlaia hlawhtling chawimawi hian a tha zawngin nghawng tam tak a nei a, ngaihhlut tur dik inzirtirna niin kan khawtlang siam that thleng pawhin a nghawng thei a ni. Hetiang lam hi langsar tham tur law lawin intihhmuh teh ang u.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?